រាជធានីភ្នំពេញ ៖ មនុស្សខ្លះមានការភ័ន្តច្រឡំថា ចង់ធ្វើអាជីវកម្មទាល់តែទៅរៀនជាមួយអ្នកជោគជ័យ ទើបអាចទទួលបានភាពជោគជ័យ ប៉ុន្តែប្រសិនជាអ្នកបន្ថែមការរៀនជាមួយអ្នកបរាជ័យក្នុងការអាជីវកម្មទៀតនោះ អ្នកនឹងអាចដឹងពីភាពខុសគ្នា និងវិធីសាស្ត្រផ្សេងៗរបស់អ្នកបរាជ័យដែលអាចធ្វើឱ្យអ្នកមានការប្រុងប្រយ័ត្នកាន់តែខ្លាំងផងដែរ ។ យោងតាមការបកស្រាយពីអ្នកជំនាញល្បីល្បាញមួយរូប បានលើកឡើងថា រៀនទ្រឹស្តីអាជីវកម្ម ឬរៀនធ្វើជំនួញនៅសាលាមិនគ្រប់គ្រាន់ទេ ចូរឈ្វេងយល់ពីរៀមច្បង ឬមិត្តភក្តិបន្ថែមទៀត ព្រោះដូចរូបលោកបានលើករួចមកហើយថា ការរៀន គឺមិនចេះចប់ទេ ។
រូបភាព ៖ ក្រុមការងារ Mengly J. Quach Educationលោកឧកញ៉ា វេជ្ជបណ្ឌិត គួច ម៉េងលី ដែលជាប្រធានក្រុមប្រឹក្សាភិបាលនៃក្រុមហ៊ុន Mengly J. Quach Education បានចែករំលែកដូចនេះថា ៖ «មហាសេដ្ឋីពិភពលោកមួយចំនួន គឺរៀនរហូតដល់សក់ស្កូវ ឬរហូតដល់អស់ជីវិត ទើបឈប់រៀន ។ រៀន គឺគេរៀនទាំងទ្រឹស្តីនៅសាលា និងរៀនពីបទពិសោធអ្នកនៅជុំវិញខ្លួន រៀនពីបរិស្ថានសង្គមជាដើម ។ កាលពីជួបជាមួយនឹងប្អូនៗ ក្មួយៗ សិស្សានុសិស្ស នៅក្នុងវេទិកាសាធារណៈមួយ ខ្ញុំបាននិយាយថា ដើម្បីជោគជ័យលើអាជីវកម្ម ពេលសិស្ស និស្សិត រៀនចប់បរិញ្ញាបត្រ ឬអ្នកចង់បើកអាជីវកម្ម គួរតែរៀនសូត្របន្ថែមទៀត តាមរយៈការងារស្ម័គ្រចិត្ត ហាត់ការ ឬធ្វើការឱ្យគេយ៉ាងតិចពី ៣ ឆ្នាំទៅ ៥ ឆ្នាំ» ។
លោកឧកញ៉ា វេជ្ជបណ្ឌិត បានបន្តថា ការទៅធ្វើការឱ្យគេ គឺដើម្បីរៀនសូត្រពីការដឹកនាំ ពីរបៀបធ្វើថៅកែ តើការធ្វើជាថៅកែគេហ្នឹងលំបាកយ៉ាងម៉េច ? គេគ្រប់គ្រងបុគ្គលិកយ៉ាងម៉េច ? គេនាំចេញនាំចូលផលិតផលរបស់គេដូចម៉េច ? គេធ្វើទំនាក់ទំនងជាមួយអតិថិជនយ៉ាងណា ? ហើយការចាយវាយរបស់គេជាថៅកែយ៉ាងម៉េច ? គេដោះស្រាយបញ្ហាប្រឈមយ៉ាងណា ? លោកឧកញ៉ា វេជ្ជបណ្ឌិត បន្ថែមថា ៖ «មានន័យថាយើងត្រូវដឹងទាំងអស់ ព្រោះរៀននៅសាលាយើងរៀនតែទ្រឹស្តីប៉ុណ្ណោះ ហើយប្រសិនបើយើងគ្មានការយល់ដឹងពីកត្តាខាងក្រៅជាក់ស្ដែងទេ ទោះបីរៀនបានខ្ពស់យ៉ាង ណា មានទ្រព្យសម្បត្ដិច្រើនយ៉ាងណា ក៏យើងមិនងាយនឹងទទួលបានជោគជ័យដែរ» ៕
ចែករំលែកព័តមាននេះ