ទីភ្នាក់ងារសារព័ត៌មាន «យ៉នហាប» កាលពីពេល ថ្មីៗកន្លងមកផ្សាយថា កូរ៉េខាងត្បូងគ្រងតំណែងជាប្រទេសមានអត្រាអ្នកធ្វើអត្តឃាតខ្ពស់បំផុតនៅក្នុងបណ្តាប្រទេសជាសមាជិកអង្គការសហប្រជាជាតិផ្នែកសេដ្ឋកិច្ច និងការអភិវឌ្ឍ(OECD) ។
របាយការណ៍បញ្ជាក់ថា ជាមធ្យមមានពលរដ្ឋប្រហែល២៩,១នាក់ ក្នុង១សែននាក់ របស់កូរ៉េខាងត្បូងបានធ្វើអត្តឃាតនៅក្នុងឆ្នាំ២០១២ ខ្ពស់ជាងចំនួនមធ្យមសរុបរបស់ប្រទេសនៅក្នុងក្រុមOECD ដោយមានអត្រាធ្វើអត្តឃាត១២នាក់ក្នុងចំណោម១សែននាក់ យោងតាមទិន្នន័យផ្នែកសុខភាព OECD នៅក្នុងឆ្នាំ២០១៥ ។ ប្រទេសស្ថិតក្នុងចំណាត់ថ្នាក់ទី២ គឺប្រទេសហុងគ្រី មានតួលេខ១៩,៤នាក់ និងនៅជប៉ុនមាន១៨,៧នាក់ ស្ថិតនៅលំដាប់ទី៣ ។
កូរ៉េខាងត្បូងជាប្រទេសមានសេដ្ឋកិច្ចស្ថិតនៅលំដាប់ទី៤ នៅអាស៊ី មានអត្រាអ្នកធ្វើឃាតឡើងខ្ពស់យ៉ាងឆាប់រហ័សចាប់តាំងពីឆ្នាំ២០០០មកដោយផ្ទុយនឹងនិន្នាការនៅលើពិភពលោកដែលធ្លាក់ចុះជា រឿយៗ ក្នុងរយៈពេល២០ឆ្នាំ។ តាមលទ្ធផលអង្កេតមានជនជាតិកូរ៉េខាងត្បូងត្រឹមតែ៣៥,១% ដែលជឿជាក់ថាខ្លួនមានសុខភាពល្អជាចំនួនដ៏តិចបំផុត បើប្រៀបធៀបទៅនឹងតម្លៃមធ្យមរបស់ប្រទេសក្នុងក្រុម OECD ដែលមានប្រហែល៦៨,៨%ជឿថាខ្លួនមានសុខភាពល្អ ។
បញ្ហាធ្វើអត្តឃាតបានក្លាយជាកត្តាចម្បងរបស់កូរ៉េខាងត្បូង ក្រោយពីរកឃើញថាការធ្វើអត្តឃាតគឺជាមូលហេតុនៃការស្លាប់លំដាប់ទី១របស់ក្រុមយុវជនក្នុងឆ្នាំ២០១៣ ធ្វើឱ្យមានការអំពាវនាវដល់រដ្ឋគួរជួយដល់ក្រុមមនុស្សដែលជួបប្រទះនឹងស្ថានភាពតប់ប្រមល់ឱ្យបានប្រសើរជាងនេះ ៕
ចែករំលែកព័តមាននេះ