ថ្លែងនៅចំពោះមុខមេដឹកនាំសាសនាទូទាំងប្រទេសនៅរដ្ឋធានី N’Djamena កាលពីថ្ងៃទី១៧ មិថុនា ២០១៥ មុនបួសតមអាហាររ៉ាម៉ាដានមួយថ្ងៃ នាយករដ្ឋមន្ត្រីឆាដ លោក Kalzeubet Pahimi Deubet ប្រាប់ទាំងអស់គ្នាថា ពេលនេះរដ្ឋាភិបាលឆាដ សម្រេចហាមឃាត់រាល់ការស្លៀកពាក់បាំងជិតរាងកាយ ដូចយ៉ាងអាវ Burqa និង Niqab របស់ស្ត្រីជាដើម ។ រដ្ឋាភិបាលសម្រេចចិត្តហាមឃាត់ដូច្នេះ ដើម្បីជាវិធានការទប់ស្កាត់សកម្មភាពភេរវកម្មរបស់ពួកអ៊ិស្លាមជ្រុលនិយម Boko Haram ដែលពួកនោះមានប្រភពនៅភាគឦសានប្រទេសនីហ្សេរីយ៉ា តែឥឡូវធ្វើសកម្មភាពភេរវកម្មរាលដាលដល់ប្រទេសជិតខាងទៀត រួមទាំងប្រទេសឆាដផង ។ «ចាប់ពីពេលនេះទៅ សម្លៀកបំពាក់គ្របជិតខ្លួនត្រូវហាមប្រើ មិនថាតែនៅទីសាធារណៈ ឬសាលារៀនទេ ឱ្យតែនៅលើទឹកដីឆាដ គឺអត់ឱ្យប្រើដាច់ខាត» ។ ក្នុងការថ្លែងនោះ លោកនាយករដ្ឋមន្ត្រី បានសុំឱ្យអ្នកដឹកនាំសាសនាអ៊ិស្លាមគ្រប់រូប ជួយផ្សព្វផ្សាយបន្តតាមព្រះវិហារ ក៏ដូចជាកន្លែងប្រមូលផ្តុំ ធ្វើកិច្ចការសាសនា ដើម្បីឱ្យប្រជាជនយល់ដឹង ហើយអនុវត្តតាមដោយស្ម័គ្រចិត្ត ។
ជាមួយគ្នានេះដែរ លោករដ្ឋមន្ត្រីក្រសួងមហាផ្ទៃឆាដ បន្ទាប់ពីផ្សព្វផ្សាយសេចក្តីសម្រេចចិត្តថ្មីមួយរយៈ បានបើកយុទ្ធនាការទូទាំងប្រទេស ដកហូតនិងដុតចោលសម្លៀកបំពាក់ ត្រូវហាមឃាត់ ដែលដាក់លក់តាមទីផ្សារ និងហាងសម្លៀកបំពាក់ដេរស្រាប់ ។ ក្នុងយុទ្ធនាការនោះ លោករដ្ឋមន្ត្រីនិយាយច្បាស់ថា «ចាប់ពីពេលនេះទៅ អ្នកណាមានចេតនាមិនគោរពតាមការហាមឃាត់របស់រដ្ឋាភិបាល ដោយនៅតែលួចស្តុកទុកសម្លៀកបំពាក់គ្របជិតខ្លួន នឹងត្រូវប្រឈមមុខវិធានការតឹងតែង ដូចជាចាប់ខ្លួនគ្មានកាលកំណត់ និងបញ្ជូនទៅតុលាការកាត់ទោសដាក់ពន្ធនាគារ» ។
សម្លៀកបំពាក់ប្រពៃណីស្ត្រីអ៊ិស្លាម ចែកជា៣ប្រភេទខុសគ្នា ដែលមានឈ្មោះហៅអាស្រ័យលើការបិទបាំងផ្នែកណាមួយនៃរាងកាយ ។ ប្រភេទដែលគេនិយមប្រើជាងគេ គឺកន្សែង hijab ប្រើសម្រាប់គ្របក្បាល បិទបាំងរហូតដល់ក ដោយទុកចំហផ្ទៃមុខ ។ ប្រភេទសម្លៀកបំពាក់មួយទៀតហៅថា Niqab ជាប្រភេទអាចគ្របជិតពីក្បាលរហូតដល់ជើង ទុកតែចន្លោះប្រហោង តូចៗពីរ សម្រាប់មើលផ្លូវ ។ ប្រភេទទី៣ ឈ្មោះ Burqa ក៏ជាអាវគ្របពីក្បាលដល់ចុងជើងដែរ តែត្រង់ផ្ទៃមុខបិទបាំងដោយផ្ទាំងក្រណាត់ស្តើង ដើម្បីអាចមើលឃើញផ្លូវដើរ ។
ពួកអ៊ិស្លាមជ្រុលនិយមចូលចិត្តប្រើអាវ niqab និង burqa សម្រាប់បម្រើឱ្យការវាយប្រហារអត្តឃាត ។ ពួកគេឱ្យអ្នកប្រយុទ្ធស្រីចងគ្រាប់បែកជុំវិញខ្លួន ហើយឱ្យពាក់អាវ Niqab ឬ burqa គ្របពីក្រៅ, លុះទៅដល់កន្លែងអ៊ូអរ ក៏ចុចបំផ្ទុះតែម្តង ។ ការវាយប្រហារអត្តឃាតដែលពួកអ៊ិស្លាមជ្រុលនិយមអនុវត្តក្នុងប្រទេសឆាដ កន្លងមក ថ្មីៗនេះ បានសម្លាប់មនុស្សអស់៣៤នាក់ របួសធ្ងន់-ស្រាលរាប់រយនាក់ និងមនុស្សរាប់រយនាក់ទៀត ក្លាយជាជនពិការអស់មួយជីវិត ដូច្នេះហើយទើបរដ្ឋាភិបាលឆាដសម្រេចចិត្តហាមប្រាមការប្រើសម្លៀកបំពាក់គ្រប់ជិតខ្លួន ៕
ចែករំលែកព័តមាននេះ