រាជធានីភ្នំពេញ ៖ នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានថ្លែងអោយដឹងនារសៀលថ្ងៃទី២២ មេសានេះថា ពិតជាមានការឃាត់ខ្លួនមន្ត្រីយោធាម្នាក់ ឈ្មោះ ស៊ុំ ពៅ ឋានន្តរស័ក្តិ ថ្នាក់ឧត្ដមសេនីយ៍ទោ ពិតប្រាកដមែន ពេលនេះ កំពុងសួរនាំនៅស្នងការដ្ឋាននគរបាលខេត្តស្វាយរៀង ដើម្បីចាត់វិធានការតាមផ្លូវច្បាប់ ។
សូមជម្រាបថា សមត្ថកិច្ចនគរបាលខេត្តស្វាយរៀងនៅយប់ថ្ងៃទី២១ ខែមេសា ឆ្នាំ២០២១ បានឃាត់ខ្លួនឧត្ដមសេនីយ៍ទោ ស៊ុំ ពៅ មានតួនាទីជា អនុប្រធានក្រុមការងារស្រាវជ្រាវយុទ្ធសាស្ត្រយោធា នៃអគ្គបញ្ជាការដ្ឋានកងយោធពលខេមរភូមិន្ទ ពីបទពាក់ព័ន្ធដឹកជញ្ជូនជនជាតិចិន ចំនួន២៨នាក់ លើ្មសនឹងសេចក្ដីសម្រេចរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ។
លោកផ្កាយ២ ស៊ុំ ពៅ កាន់លិខិតឧទ្ទេសនាមដល់កងទ័ព ចេញដោយឧត្តមសេនីយ៍ឯក មាស វណ្ណា ប្រធានក្រុមការងារស្រាវជ្រាវ យុទ្ធសាស្ដ្រយោធាអនុញ្ញាតឲ្យធ្វើដំណើរតាមរាជធានី-ខេត្ត ចាប់ពីថ្ងៃទី០១ ខែមេសា រហូតដល់ ថ្ងៃទីផុតកំណត់ ទី៣០ ខែឧសភា ឆ្នាំ២០២១ ។ ប៉ុន្តែលោកផ្កាយ២ ស៊ុំ ពៅ យកលិខិតបេសកកម្មនេះ ទៅប្រើប្រាស់លួចរត់ពន្ធជនជាតិចិន២៨នាក់ ដឹកតាមរថយន្តជាច្រើនគ្រឿង ទៅខេត្តស្វាយរៀង ក៏ត្រូវសមត្ថកិច្ចនគរបាលនៅខេត្តស្វាយរៀង បង្ក្រាបបានតែម្ដង ។
បើតាមសារជាសំឡេង ដែលត្រូវបានគេចែកចាយតាមបណ្ដាញសង្គមរបស់នាយឧត្តមសេនីយ៍ វង្ស ពិសេន អគ្គមេបញ្ជាការកងទ័ព បានដាក់បទបញ្ជាផ្ទាល់ថា ករណីនេះ នឹងអនុវត្តតាមវិធានការច្បាប់ ដោយមិនការពារនោះឡើយ ពោលគឺអនុវត្តទៅតាមបទបញ្ជារបស់សម្ដេចតេជោ ហ៊ុន សែន និងបើកផ្លូវឲ្យសមត្ថកិច្ចខេត្តស្វាយរៀង អនុវត្តទៅតាមនីតិវិធី ។
នាយឧត្តមសេនីយ៍ វង្ស ពិសេន បានបញ្ជាយ៉ាងដូច្នេះថា «កិច្ចការនេះ មិនមាននរណាការពារទេ។ រឿងនេះ ជាបទល្មើសជួញដូរមនុស្ស ត្រូវអនុវត្តតាមច្បាប់។ សម្តេចតេជោ បានដាក់បទបញ្ជារួចហើយ ហាមឃាត់ការដឹកជញ្ជូនមនុស្សដូច្នេះ។ បុគ្គល ឧត្តមសេនីយ៍ទោ ស៊ុំ ពៅ ជាករណីជួញដូរមនុស្ស ដែលសម្តេច បានហាម។ ខ្ញុំបានប្រាប់យប់មិញហើយ ឲ្យធ្វើតាមច្បាប់ទៅ» ។
ជាមួយគ្នានេះ នាយឧត្តមសេនីយ៍ វង្ស ពិសេន ក៏បានបញ្ជាឲ្យឧត្តមសេនីយ៍ឯក មាស វណ្ណា ប្រធានក្រុមការងារស្រាវជ្រាវយុទ្ធសាស្ត្រយោធា នៃអគ្គបញ្ជាការដ្ឋានកងយោធពលខេមរភូមិន្ទ ដែលបានចេញលិខិតឧទ្ទេសនាមដល់កងទ័ព ក្នុងការធ្វើដំណើរ អំឡុងពេលបិទខ្ទប់រាជធានីខេត្តនាពេលនេះ ត្រូវពិនិត្យលិខិតទាំងអស់នោះ ផងដែរ ៕
ចែករំលែកព័តមាននេះ