CCTV របស់ចិនកាលពីពេល ថ្មីៗកន្លងមកផ្សាយថា គូស្នេហ៍ជនជាតិចិនជាង១០០គូ ប្រឈមមុខនឹងសេចក្តីស្លាប់ដោយថតរូបនៅបរិវេណឆ្នេរក្នុងក្រុងរឺចាវ ខេត្តសានទុង ខណៈព្យុះ «Dujuan» កំពុងបោកបក់ ។ ការថតរូបប្រឈមនឹងព្យុះនោះដើម្បីទុកជាអនុស្សាវរីយ៍ពិសេសរបស់ពួកគេក្នុងពេលរៀបអាពាហ៍ពិពាហ៍ ។
នៅពេលរលកបោកបក់ខ្ទប់ឆ្នេរធ្វើឱ្យគូស្នេហ៍ទាំងនោះទទួលបានរូបភាពដ៏ស្រស់ស្អាត នៅពេលពួកគេថតកៀកកើយគ្នា ។ ចំពោះអ្នកទេសចរដែលទៅកម្សាន្តនៅបរិវេណនោះ និយាយថា គូស្នេហ៍ទាំងនោះចង់បានរលកបោកបក់ខ្លាំងធ្វើជាសាក្សីក្តីស្រឡាញ់របស់ពួកគេ ។
ព្យុះ Dujuan បានបង្កើនកម្លាំងទ្វេដង ក្រោយមកបោកបក់ខ្លាំងទៅតំបន់ឆ្នេរខេត្តអឺឡាន នាភាគខាងកើតកោះតៃវ៉ាន់ កាលពីល្ងាចថ្ងៃទី២៨ កញ្ញា ២០១៥ ។ កម្លាំងព្យុះបង្កឱ្យបាក់ដើមឈើ ភ្លៀងធ្លាក់ខ្លាំង និងងបាក់ដីនៅក្នុងតំបន់ជាច្រើនទៀត ។
តាមរបាយការណ៍បញ្ជាក់ថា មានអ្នកស្លាប់យ៉ាងតិច៣នាក់ និង៣២៤នាក់ទៀតរងរបួស ខណៈអាជ្ញាធរតៃវ៉ាន់ជម្លៀសប្រជាជនជាង១២.០០០នាក់ និងប្រជាជនជាង២លានគ្រួសារគ្មានអគ្គិសនីប្រើប្រាស់ ៕
ចែករំលែកព័តមាននេះ