ប្រាក់កាក់ប្រភេទ១ដុល្លាររបស់សិង្ហបុរីដែលមានភ្ជាប់និមិត្តរូបយ័ន្ដ៨ជ្រុង ឬយ័ន្ដក្បាល៨ គឺជាគំនិត «បង្ក្រាប» អំពើអាក្រក់ ដើម្បីកសាងផ្លូវរថភ្លើងដអគ្គិសនីក្រោមដីរបស់លោកនាយករដ្ឋមន្ដ្រីសិង្ហបុរី លី ក្វាន់យូ ។ សព្វថ្ងៃប្រាក់កាក់ប្រភេទ១ដុល្លារនេះ ត្រូវគេចាក់ទុកជានិមិត្ដរូបការពារប្រជាជនសិង្ហបុរីទាំងមូល ។
អតីតនាយករដ្ឋមន្ដ្រីសិង្ហបុរី លី ក្វាន់យូ ត្រូវគេទទួលស្គាល់ពេញពិភពលោកថា ជាអ្នកនយោបាយមួយរូបដ៏ពូកែ ។ គាត់បានធ្វើឱ្យកោះសិង្ហបុរីក្លាយទៅជារដ្ឋដ៏រីកចម្រើន និងទំនើបត្រដែតត្រដឹម ។ ថ្វីបើមានទំហំតូច តែសិង្ហបុរីទាក់ទាញអ្នកទេសចរដ៏ច្រើនកុះករ មិនមែនដោយសារភាពលេចធ្លោជាងគេខាងសេដ្ឋកិច្ចនៅក្នុងតំបន់ប៉ុណ្ណោះទេ តែដោយសាររឿងរា៉វអបិយជំនឿអាថ៌កំបាំងមួយទៀតផង នោះគឺរឿងប្រាក់កាក់ប្រភេទ១ដុល្លាររបស់សិង្ហបុរីមានភ្ជាប់និមិត្តរូបយ័ន្ដក្បាល៨ តាមតម្រាហុងស៊ុយ ។ នេះពិតជាគំនិត «បង្ក្រាប» អំពើអាក្រក់ ដើម្បីអាចកសាងបានផ្លូវរថភ្លើងអគ្គិសនីក្រោមដីដែល ក្រោយៗមកគេចាត់ទុកអ្នកណាមានប្រាក់កាក់ប្រភេទ១ដុល្លារក្នុងខ្លួននឹងមានសំណាងល្អជានិច្ច ។
វត្តមានប្រាក់កាក់ប្រភេទ១ដុល្លារសិង្ហបុរីកើតឡើងក្នុងរង្វង់ទសវត្ស៨០ នៃសតវត្សទី២០ ដោយសារការនឹកភ្នកដល់តម្រាហុងស៊ុយ របស់លោកនាយករដ្ឋមន្ដ្រីលី ក្វាន់ហូ ។ ពេលនោះជាដំណាក់កាលកសាងផ្លូវរថភ្លើងអគ្គិសនីក្រោមដីសម្រាប់សិង្ហបុរី តែការកសាងនោះជួបការលំបាក់ខ្លាំង ព្រោះពេលកសាងជិតរួចរាល់ តែងមានការស្រុតរលំបាកបែកទៅវិញម្ដងហើយម្ដងទៀត ។ លោកនាយករដ្ឋមន្ដ្រីលី ក្វាន់យូ ឈឺក្បាលហួសប្រមាណ ចំពោះឧប្បត្ដិហេតុអាក្រក់ ផ្ទួនៗបែបនេះ បើគ្មានផ្លូវរថភ្លើងអគ្គិសនីក្រោមដីទេ សិង្ហបុរីមិនអាចដោះស្រាយបញ្ហាស្ទះចរាចរណ៍បានឡើយ ព្រោះសិង្ហបុរីកំពុងស្ថិតក្នុងដំណាក់កាលរីកចម្រើនខ្លាំង ។
ប្រាក់កាក់ដ៏អស្ចារ្យ
អ្នកម៉ៅការសាងសង់ផ្លូវរថភ្លើងក្រោមដីឱ្យសិង្ហបុរី ជាមហាក្រុមហ៊ុនលំដាប់ថ្នាក់ពិភពលោក មានថាមពលហិរញ្ញវត្ថុខ្ពស់ និងបច្ចេកទេសខ្លាំងបំផុត ។ ប៉ុន្តែចម្លែកម៉្លេះ ពេលសាងសង់កាត់តំបន់ភូមិសាស្ដ្រស្មុគស្មាញមួយតែងតែជួបការលំបាករាប់រយជំពូក លុះសាងសង់ជិតរួច ស្រាប់តែរលំបាក់បែកអស់ទៅវិញជាបន្ដបន្ទាប់ធ្វើឱ្យមហាក្រុមហ៊ុនទាល់តម្រិះ រហូតដល់រាយការណ៍ជូនរដ្ឋាភិបាលតាមត្រង់ថា ខ្លួនលែងមានលទ្ធភាពសាងសង់ហើយ ព្រោះចេះតែមានហេតុការណ៍អាក្រក់កើតឡើង ផ្ទូនៗ ហួសការស្មាន ។ ដោយហេតុទឹកដីសិង្ហបុរីតូចពេក ពុំអាចសាងសង់ងាកទៅខាងណាទៀតបាន ទន្ទឹមនឹងនេះសិង្ហបុរីស្ថិតនៅក្នុងសន្ទុះរីកចំរើនខ្លាំងមិនអាចអត់ផ្លូវរថភ្លើងអគ្គិសនីក្រោមដីបានដូចគ្នា ហេតុនេះលោកនាយករដ្ឋមន្ដ្រីលី ក្វាន់យូ ដែលជាអ្នកមានជំនឿលើតម្រាហុងស៊ុយស្រាប់ផងពេលស្ថិតចំពោះមុខភាពទាល់ច្រកបែបនេះ គាត់ស្រាប់តែនឹកភ្នកដល់តម្រាហុងស៊ុយ ក៏ប្រញាប់បញ្ជូនមនុស្សទៅសហរដ្ឋអាមេរិក អញ្ជើញគ្រូហុងស៊ុយជនជាតិចិនដ៏ល្បីឈ្មោះម្នាក់ទៅ សិង្ហបុរី ដើម្បីឱ្យជួយកម្ចាត់ភាពអាក្រក់ «សាងហើយសាងទៀតមិនចេះសម្រេច» ។ ក្រោយពិនិត្យយ៉ាងល្អិតល្អន់ចប់សព្វគ្រប់ គ្រូហុងស៊ុយរូបនោះប្រាប់ថា មកពីការកសាងផ្លូវរថភ្លើងអគ្គិសនីក្រោមដីកាត់លើខ្នងនាគធំមួយក្បាល ជានាគមានចរិតកាចសាហាវកំពុងដេកក្រោមបាតសមុទ្រ ទាល់តែរកមធ្យោបាយដែលធ្វើឱ្យគេនោះដេកលក់ជារៀងរហូតអត់ឮសន្ធឹងនៅខាងលើខ្នង ទើបសំណង់មួយនេះអាចសម្រេចបានដូចក្ដីប្រាថ្នា ។ មធ្យោបាយដែលធ្វើឱ្យនាគនោះដេករហូតគឺត្រូវឱ្យប្រជាពលរដ្ឋដែលរស់នៅសិង្ហបុរីទាំងស្រីទាំងប្រុស ពេលចេញពីផ្ទះត្រូវដាក់យ័ន្ដក្បាល៨ក្នុងខ្លួន ។
ពេលលោកគ្រូហុងហ៊ុយដាក់មធ្យោបាយនេះចេញមក ការលំបាកមួយថ្មីក៏កើតឡើងទៀត គឺសិង្ហបុរីជាប្រទេសពហុជាតិសាសន៍ មានតាំងពីជនជាតិចិន ម៉ាឡេស៊ី ឥណ្ឌូណេស៊ី ឥណ្ឌា… ហើយជាប្រទេសពហុសាសនាទៀតផង មានតាំងពីសាសនាអិស្លាម សាសនាហិណ្ឌូ សាសនាកាតូលិកជាដើម មិនមែនសុទ្ធតែអ្នកកាន់ព្រះពុទ្ធសាសនាដូចជាជនជាតិចិនឯណា ។
មធ្យោបាយនេះទើបតែស្ដាប់ភ្លាមស្មានតែងាយលើគោក ប៉ុន្ដែធ្វើយ៉ាងណាបញ្ចុះបញ្ចូលមនុស្សទាំងអស់នៅសិង្ហបុរីយល់ព្រមធ្វើរឿងចម្លែកនោះបាន0x017d7 ហេតុការណ៍ថ្មីធ្វើឱ្យលោកអតីតនាយករដ្ឋមន្ដ្រីលី ក្វាន់យូ និងគណៈរដ្ឋមន្ដ្រីរបស់គាត់ដកដង្ហើមធំម្ដងទៀត គឺដើរក៏ដកដង្ហើមធំ ដេកក៏ដកដង្ហើមធំ អង្គុយក៏ដកដង្ហើមធំ ដោយសារទាល់តម្រិះមែនទែន ។ ខណៈ អ្នកណាៗក៏មុខស្លុងគិតអ្វីមិនចេញ ស្រាប់តែលោកជំទាវភរិយាលោកអតីតនាយករដ្ឋមន្ដ្រីលី ក្វាន់យូឱ្យយោបល់ថា ដើម្បីធ្វើឱ្យមនុស្សទាំងអស់នៅសិង្ហបុរីយល់ព្រមដាក់យ័ន្ដក្បាល៨ក្នុងខ្លួន មានតែមធ្យោបាយមួយគត់ គឺចាក់ពុម្ពប្រាក់កាក់ប្រភេទ១ដុល្លារសិង្ហបុរីជាថ្មី ដោយប្រើផ្ទៃនិមិត្តសញ្ញាយ័ន្ដក្បាល៨ ដល់ពេលនោះទោះចង់ ឬមិនចង់ក៏មនុស្សទាំងអស់នៅសិង្ហបុរីដាក់យ័ន្ដក្បាល៨ក្នុងខ្លួនទាំងយប់ទាំងថ្ងៃ ។ យោបល់របស់លោកជំទាវ ធ្វើឱ្យអតីតលោកនាយករដ្ឋមន្ដ្រីលី ក្វាន់យូ និងគណៈរដ្ឋមន្ដ្រីរបស់គាត់អរសែនអរដូចលើកបានដំុថ្មដ៏សែនធំចេញពីដើមទ្រូង ។ មិនបង្អង់យូរលោកអតីតនាយករដ្ឋមន្ដ្រីលី ក្វាន់យូ ចេញបញ្ជាឱ្យគេធ្វើតាមភ្លាម ។
នៅពេលប្រាក់កាក់ប្រភេទ១ដុល្លារសិង្ហបុរីថ្មី បានប្រជាជនសិង្ហបុរី និងអ្នកទេសចរ ក៏ដូចអ្នករកស៊ីចេញចូលសិង្ហបុរីប្រើប្រាស់ទូលំទូលាយ ផ្លូវរថភ្លើងក្រោមដីកសាងបានរលូនអត់មានជួបឧបសគ្គអ្វីសោះរហូតដល់រួចរាល់ទាំងស្រុង ដែលប្រើប្រាស់ដល់សព្វថ្ងៃ ។
វត្ថុសក្ដិសិទ្ធិ
ប្រាក់កាក់ប្រភេទ១ដុល្លារថ្មីរបស់សិង្ហបុរី ដែលមានភ្ជាប់និមិត្តរូបយ័ន្ដក្បាល៨ ចាប់ផ្ដើមក្លាយទៅជាវត្ថុដែលប្រជាជនសិង្ហបុរី និងអ្នកមកពីក្រៅពេញចិត្ត ខ្លាំងឡើងៗ ហើយមនុស្សភាគច្រើនថែមទាំងហៅវាថាវត្ថុស័ក្ដិសិទ្ធពិតប្រាកដគួរតែមានក្នុងខ្លួន ដើម្បីកម្ចាត់ឧបទ្រពចង្រៃផ្សេងៗ មិនអាចអត់សោះបានឡើយ ។ ជ្រុង៨ដែលភ្ជាប់តាមហាមប្រាក់កាក់ប្រភេទ១ដុល្លារនោះជានិមិត្តរូបនៃយ័ន្ដក្បាល៨ ដែលគេតែងលើកឡើងក្នុងតម្រាហុងស៊ុយ ។
បច្ចុប្បន្នចំពោះអ្នកដឹងរឿងពិតនេះ តែងតែហៅប្រាក់កាក់ប្រភេទ១ដុល្លាររបស់សិង្ហបុរីជាវត្ថុស័ក្ដិសិទិ្ធ ពេញៗមាត់ ។ គេថែមទាំងជឿទៀតថា ឱ្យតែមានប្រាក់កាក់ប្រភេទ១ដុល្លារសិង្ហបុរីនៅក្នុងខ្លួន ទោះទៅដល់ទីណាក៏ជួបតែសំណាងល្អ ដោយសារឧបទ្រពចង្រៃ ផ្សេងៗបៀតបៀនមិនបាន ។
មិនត្រឹមតែជួយឱ្យគេកសាងផ្លូវរថភ្លើងអគ្គិសនីក្រោមដីបានសម្រេចប៉ុណ្ណោះទេ ឆ្នាំ១៩៩៧ ប្រាក់កាក់ប្រភេទ១ដុល្លារ ដែលមានភ្ជាប់និមិត្តរូបយ័ន្ដក្បាល៨នេះ នៅបានជួយសិង្ហបុរីឈរយ៉ាងរឹងមាំ ខណៈវិបត្តិហិរញ្ញវត្ថុធ្វើឱ្យប្រទេសជាច្រើនរកកល់ដួលរលំទៀតផង។ ដោយសារហេតុការណ៍ជាក់ស្ដែងទាំងពីរនេះហើយ ទើបប្រជាជនសិង្ហបុរីកាន់តែមានជំនឿលើប្រាក់កាក់ប្រភេទ១ដុល្លាររបស់ខ្លួនខ្លាំងឡើង៕
ចែករំលែកព័តមាននេះ