ទស្សនាវដ្តី «ហ្វប់» (Forbes) បានបង្ហាញចំណាត់ថ្នាក់ជនជាតិអាមេរិកដែលមានទ្រព្យស្តុកស្តម្ភបំផុតចំនួន៤០០នាក់ប្រចាំឆ្នាំ២០១៥ កាលពីថ្ងៃទី២៩ កញ្ញា ២០១៥ ។ ចំណាត់ថ្នាក់ទី១ គឺលោកប៊ីលហ្គេត អ្នកបង្កើតក្រុមហ៊ុន «Microsoft» ដោយលោកស្ថិតក្នុងតំណែងនេះជាឆ្នាំទី២២ ជាប់គ្នា ។ លោកប៊ីលហ្គេត មានទ្រព្យសម្បត្តិ៧៦.០០០លានដុល្លារ ធ្លាក់ចុះចំនួន៥.០០០លានដុល្លារ កាលពីឆ្នាំ២០១៤ ។
ចំណែកលោកវ័ររ៉េន បាហ្វហ្វេត ប្រធានក្រុមហ៊ុន «Borkshire Hathaway» ស្ថិតក្នុងលំដាប់ទី២ មានទ្រព្យសម្បត្តិសរុប៦២.០០០លានដុល្លារ ។
លោកលែរ៍រី អេលលីសុន អតីតប្រធានក្រុមហ៊ុនអ័៊ររាខល ជាប់ចំណាត់ថ្នាក់ទី៣ មានទ្រព្យសម្បត្តិ៤៧.៥០០លានដុល្លារ ។
ទស្សនាវដ្តី «ហ្វប់» បញ្ជាក់ថា ទ្រព្យសម្បត្តិមធ្យមរបស់ជនជាតិអាមេរិកដែលមានស្តុកស្តម្ភទាំង៤០០នាក់ ស្ថិតក្នុងកម្រិត៥.៨០០លានដុល្លារ គឺជាតួលេខថ្មី ព្រោះច្រើនជាងឆ្នាំមុន ដែលមានចំនួនទ្រព្យមធ្យម៥.៧០០លានដុល្លារ និងចំនួនទ្រព្យសរុបទាំងអស់មានប្រហែល២,៣៤លានលានដុល្លារ ដោយកើនលើសពី២,២៩លានលានដុល្លារកាលពីឆ្នាំ២០១៤ ។
ចំណែកបុគ្គលស្ថិតនៅក្នុង១០ចំណាត់ថ្នាក់ដំបូងនៃមហាសេដ្ឋីអាមេរិក គឺមានអ្នកចូលរួមបង្កើតប្រព័ន្ធអនឡៃចំនួន៣រូប គឺលោកជេហ្វ ប៊ីហ្សូស ពីក្រុមហ៊ុន អាម៉ាហ្សូន ដោយមុននេះស្ថិតនៅចំណាត់ថ្នាក់ទី១៥ បានស្ទុះឡើងស្ថិតក្នុងលំដាប់ទី៤ ប្រចាំឆ្នាំ២០១៥មានទ្រព្យសម្បត្តិ៤៧.០០០លានដុល្លារ មូលហេតុដោយសារភាគហ៊ុនរបស់អាម៉ាហ្សូន ។ បន្ទាប់មកគឺលោកម៉ាក សាក់ហ្គ័រប៊ើក ប្រធានក្រុមហ៊ុន «Facebook» ស្ទុះពីលំដាប់ទី១១ ស្ថិតក្នុងលំដាប់ទី៧ មានទ្រព្យសម្បត្តិ៤០.៣០០លានដុល្លារ និងលោកលៃរ៍រី ផេច ប្រធានក្រុមហ៊ុន «Google» បានងើបពីលំដាប់ទី១៣ កាលពីឆ្នាំមុន ស្ថិតក្នុងចំណាត់ថ្នាក់ទី១០ មានទ្រព្យសរុប៣៣.៣០០លានដុល្លារ ៕
ចែករំលែកព័តមាននេះ