Galileo គឺជាប្រព័ន្ធផ្កាយរណបរុករកពិភពលោកហៅកាត់ថា GNSS ផលិតឡើងដោយសហគមន៍អឺរ៉ុប និងទីភ្នាក់ងារលំហអាកាសអឺរ៉ុប (ESA) ។ គម្រោងចំណាយ
ទឹកប្រាក់ប្រមាណជា 5.578.250.000ដុល្លារនេះត្រូវបានដាក់ឈ្មោះតាមតារាវិទូជនជាតិអុីតាលី គឺលោក Galileo Galilei ។
គោលបំណងមួយក្នុងចំណោមគោលបំណងផ្សេងទៀតរបស់ប្រព័ន្ធផ្កាយរណបរុករក «Galileo» គឺផ្តល់នូវប្រព័ន្ធកំណត់ទីតាំងជាក់លាក់ខ្ពស់ដែលប្រទេសនៅសហភាពអឺរ៉ុបអាចពឹងផ្អែកបាន ពោលគឺមិនចាំបាច់ជាប់ពាក់ព័ន្ធជាមួយប្រព័ន្ធ GLONASS រុស្ស៊ី, GPS របស់អាមេរិក និងប្រព័ន្ធត្រីវិស័យរបស់ចិនដែលនឹងត្រូវកាត់ផ្តាច់ប្រព័ន្ធច្រើនដងពេលមានសង្គ្រាម ឬជម្លោះនយោបាយជាដើម ។
ពេលស្ថិតក្នុងដំណើរប្រតិបត្តិការវានឹងប្រើប្រាស់ទីតាំងមជ្ឈមណ្ឌលចំនួនពីរលើដីក្បែរទីក្រុង Munich ប្រទេសអាល្លឺម៉ង់ និងទីក្រុង Fucino ប្រទេសអីុតាលី ។ កាលពីឆ្នាំ ២០១០ រដ្ឋធានី Prague ប្រទេសឆែកត្រូវបានបោះឆ្នោតដោយរដ្ឋមន្ត្រីអឺរ៉ុបថាជាទីតាំងស្នាក់ការសម្រាប់គម្រោងមួយនេះ ។ ឆ្នាំ២០១១ ផ្កាយរណបពីរក្នុងចំណោមផ្កាយរណបប្រតិបត្តិការ៤ ត្រូវបានបង្កើតឡើងដើម្បីឱ្យមានសុពលភាពលើប្រព័ន្ធរុករក ។ ឆ្នាំ២០១២ ក្រុមអ្នកវិទ្យាសាស្ត្រឈានដល់ការសាកល្បងបង្កើត Galileo ។ នៅចុងបញ្ចប់មានផ្កាយរណបទាំងអស់ចំនួន៣០ ក្នុងប្រព័ន្ធ Galileo ខណៈពេលផ្កាយរណបចំនួន២៧ កំពុងប្រតិបត្តិការ ចំណែក៣ផ្សេងទៀតស្ថិតក្នុងដំណាក់កាលផលិតនៅឡើយ ។ នៅឆ្នាំ២០១៩ អឺរ៉ុបនឹងមានប្រព័ន្ធរុករកផ្កាយរណបឯករាជ្យផ្ទាល់ខ្លួន៕
ចែករំលែកព័តមាននេះ