បុរសជនជាតិអេត្យូពីលោកអាស្មេឡាស ហ្សេរ៉េហ្វូ បានចំណាយពេលជិត២ឆ្នាំ និងប្រាក់ប្រមាណជា ៧.៥០០ដុល្លារ ផលិតយន្ដហោះមួយគ្រឿង ដើម្បីបំពេញក្ដីសុបិនរបស់ខ្លួន ។ យន្ដហោះនោះមានឈ្មោះ «K-570A» ហើយលោកហ្សេរ៉េហ្វូ បកស្រាយថា តួអក្សរ K គឺតំណាងឱ្យឈ្មោះរបស់ម្ដាយលោក «Kiros» លេខ «៧៥០» តំណាងឱ្យចំនួនថ្ងៃដែលលោកបានចាប់ផ្ដើមផលិត រហូតដល់ចេញរូបរាងយន្ដហោះ និងអក្សរ A តំណាងឱ្យពាក្យ «Aircraft» ប្រែថា «យន្ដហោះ » ។
លោកហ្សេរ៉េហ្វូ និយាយថា គោលបំណងនៃការផលិតយន្ដហោះនេះ គឺដើម្បីបំពេញក្ដីសុបិនរបស់លោកតាំងពីកុមារភាពមកម្ល៉េះ ពោលគឺលោកស្រលាញ់ការហោះហើរលើអាកាស ។ មុននឹងផលិតបានយន្ដហោះនេះ ពីដំបូងនៅឆ្នាំ២០០១ លោកបានសិក្សាស្រាវជ្រាវទិញសៀវភៅពីសហព័ន្ធរដ្ឋបាលអាកាសចរណ៍ មកមើលពីគម្រោង និងការបង្ហាត់បង្ហាញពីរបៀបមើលតួម៉ាស៊ីន ដំឡើង ក៏ដូចជាមើលវីដេអូតាមប្រព័ន្ធយូធូប ។
លោកហ្សេរ៉េហ្វូ បានឈប់រៀនថ្នាក់បរិញ្ញាបត្រនៅសាកលវិទ្យាល័យ ហើយដាក់ពាក្យចូលធ្វើការនៅក្រុមហ៊ុនអាកាសចរណ៍អេត្យូពីកាលពី១៥ឆ្នាំមុន តែលោកមិនត្រូវបានគេទទួលយកទេ ដោយសារកម្ពស់លោកមិនសមតាមការចង់បានរបស់ក្រុមហ៊ុន ។
ចំពោះយន្ដហោះ K-570K ដែលលោកហ្សេរ៉េហ្វូផលិតនេះប្រើប្រាស់ម៉ាស៊ីនជជុះរបស់ក្រុមហ៊ុន Volkswagen គឺ Volkswagen Beetle កម្លាំងសេះចំនួន៤ ស៊ីឡាំងចំនួន៤ និង Stroke4។ យន្ដហោះនេះអាមហោះហើរក្នុងល្បឿនយឺត និងកម្ពស់ទាប ។
មនុស្សមួយចំនួនចំអកថាលោកហ្សេរ៉េហ្វូ ជាមនុស្សឆ្កួតដោយចំណាយពេលច្រើនឆ្នាំ និងប្រាក់ច្រើន ដើម្បីផលិតយន្ដហោះដែលវាមិនអាចទៅរួច តែនៅទីបំផុតលោកក៏បានសម្រេចក្ដីបំណង ។
កាលពីខែកក្កដា២០១៥ លោកហ្សេរ៉េហ្វូបានសាកល្បងហោះហើរយន្ដហោះរបស់លោក តែមិនបានជោគជ័យទេ មកពីគ្រឿងយន្ដហោះ ចាស់ៗពេក ដូច្នេះលោកត្រូវដោះដូរកែច្នៃវាឡើងវិញនូវរបស់ថ្មីៗ ៕
ចែករំលែកព័តមាននេះ