អ្នកលក់ទំនិញ ឡើងថ្លៃ គឺជាឈ្មួញទុច្ចរិត ដែលអភិបាលរាជធានីភ្នំពេញ មិនអាចទទួលយកបាន និងព្រមានចាត់វិធានការម៉ឺងម៉ាត់បំផុត
- ភ្នំពេញ
ភ្នំពេញ៖ ក្នុងសន្និសីទកាសែត នៅព្រលប់ថ្ងៃទី១៥ ខែមេសា ឆ្នាំ២០២១ ឯកឧត្តម ឃួង ស្រេង អភិបាលរាជធានីភ្នំពេញ បានហៅក្រុមអ្នកលក់…
ភ្នំពេញ៖ ក្នុងសន្និសីទកាសែត នៅព្រលប់ថ្ងៃទី១៥ ខែមេសា ឆ្នាំ២០២១ ឯកឧត្តម ឃួង ស្រេង អភិបាលរាជធានីភ្នំពេញ បានហៅក្រុមអ្នកលក់…
ភ្នំពេញ៖ ក្នុងសន្និសីទកាសែត នៅព្រលប់ថ្ងៃទី១៥ ខែមេសា ឆ្នាំ២០២១ ឯកឧត្តម ឃួង ស្រេង អភិបាលរាជធានីភ្នំពេញ បានហៅក្រុមអ្នកលក់ ដែលដំឡើងថ្លៃទំនិញ ក្នុងពេលបិទខ្ទប់រាជធានីភ្នំពេញ និងក្រុងតាខ្មៅ រយៈពេល ១៤ថ្ងៃ ចាប់ពីថ្ងៃទី១៥-២៨ ខែមេសា ថាជាឈ្មួញទុច្ចរិត ដែលអាជ្ញាធរមានសមត្ថកិច្ច នឹងចាត់វិធានការម៉ឺងម៉ាត់បំផុត។
ឯកឧត្តម ឃួង ស្រេង បានបញ្ជាក់ថា «យើងកំពុងសំឡឹង ហើយខ្ញុំបានប្រជុំជាមួយឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រួមទាំងរដ្ឋមន្ត្រីក្រសួងពាណិជ្ជកម្ម ពិនិត្យមើលល្អិតល្អន់។ ខ្ញុំបានឲ្យក្រុមការងាររបស់ខ្ញុំ មន្ទីរកសិកម្ម មន្ទីរពាណិជ្ជកម្ម ចុះទៅពិនិត្យតាមទីតាំងសត្វឃាតរួចស្រេចហើយ មកដល់ពេលនេះ ហើយបានសួរ និងធ្វើកំណត់ហេតុទីតាំងទាំងអស់នៅរាជធានីភ្នំពេញ ទីតាំងសត្វឃាតទាំងនោះ មិនបានដំឡើងថ្លៃ ក្នុងការធ្វើឃាតសត្វក្នុងការយកទៅផ្គត់ផ្គង់ទីផ្សារនោះទេ។ អីចឹងខ្ញុំនឹងស្រាវជ្រាវទៀត ថាតើការឡើងតម្លៃទំនិញនេះ មូលហេតុអី? បើរាជរដ្ឋាភិបាល ចេញសេចក្តីសម្រេច ហើយមិនបិទអ្នកដែលដឹកទំនិញ ពិសេសគ្រឿងឧបភោគបរិភោគ ឲ្យមកផ្គត់ផ្គង់ប្រជាពលរដ្ឋ នៅក្នុងរាជធានីភ្នំពេញ មិនត្រូវបានបិទទេ។ អីចឹងសួរថា អស់លោក លោកឧកញ៉ា ដែលដំឡើងថ្លៃ ឬក៏អាជីវករ នៅតាមផ្សារ គ្រឿងឧបភោគបរិភោគ ឈរលើមូលដ្ឋានស្អី? បើខ្វះមូលដ្ឋាន ខ្ញុំនឹងមានវិធានការរដ្ឋបាលហើយ។ ទី១-ខ្ញុំនឹងណែនាំឲ្យបញ្ចុះតម្លៃទំនិញទៅតាមប្រក្រតីភាពដូចការពីមិនទាន់ Lockdown រាជធានីភ្នំពេញឡើងវិញ។ ទី២-ខ្ញុំអាចមានវិធានការទៅថ្ងៃអនាគតថែមទៀត ខ្លួនជាឈ្មួញទុច្ចរិត ឆ្លៀតឱកាសពេលដែលប្រជាពលរដ្ឋ កំពុងតែមានទុក្ខលំបាក ធ្វើការដំឡើងថ្លៃ គ្មានហេតុផល ថ្វីត្បិតតែយើងអនុវត្តទីផ្សារសេរីក៏ពិតមែន ក៏យើងត្រូវមានវិធានការចំពោះឈ្មួញទុច្ចរិតដែរ។ ទី១-ទំនិញធានាថា មានគុណភាព ធានាថា ត្រូវមានសុខមាលភាពជូនប្រជាពលរដ្ឋ អ្នកបរិភោគ ទី២-តម្លៃទំនិញ ត្រូវឡើងថ្លៃ ឲ្យមានហេតុ មានផល មិនមែនចេះតែនឹកឃើញទេ»។
ឯកឧត្តមអភិបាល ឃួង ស្រេង បញ្ជាក់ថា «ឥឡូវ ខ្ញុំក៏លឺសូរដែរថា ពងមាន់ ឡើងថ្លៃ ១០គ្រាប់ ថ្លៃ ១ម៉ឺនរៀល។ យើងក៏ត្រូវតែមើលកិច្ចការងារហ្នឹងដែរ។ ខ្ញុំបានដាក់ផែនការនេះ រួចស្រេចហើយ ហើយស្អែកនេះ ឯកឧត្តមរដ្ឋមន្ត្រីក្រសួងពាណិជ្ជកម្ម ក៏ចាត់ក្រុមការងារគាត់ ចុះមកពិនិត្យលើបញ្ហានេះ។ យើងនឹងធ្វើការងារនេះ ដើម្បីប្រជាពលរដ្ឋរបស់យើង។ មិនអាចឆ្លៀតឱកាស នៅពេលដែលប្រជាពលរដ្ឋមានទុក្ខ ខ្លួនសោយសុខនៅលើទឹកភ្នែករបស់ប្រជាពលរដ្ឋរបស់ប្រជាពលរដ្ឋបានទេ។ យើងនឹងធ្វើកិច្ចការងារនេះ ឲ្យដល់ឫសគល់ ហើយក៏សូមអំពាវនាវដល់អាជីវករទាំងអស់ថា ចូលរួមសហការជាមួយអាជ្ញាធរ ក៏ដូចជារាជរដ្ឋាភិបាល ដើម្បីជួយដល់អ្នកក្រៅក្រ ជួយដល់ប្រជាពលរដ្ឋរបស់យើង ដែលកំពុងមានទុក្ខ ហើយរួមគ្នាកាត់បន្ថយឲ្យខាតតែបាននូវជំងឺកូវីដ១៩ ដែលកំពុងរាតត្បាតនៅពេលនេះ។ មនុស្សរស់ របស់បាន! កុំឆ្លៀតពេលចំណេញអត់ហេតុផល ដូចដែលអ្នកខ្លះបានលើកឡើងនេះ គឺជាកិច្ចការមួយ ដែលខ្ញុំ ក្នុងនាមគណៈអភិបាលរាជធានីភ្នំពេញ ទទួលយកអត់បានទេ ក្នុងបញ្ហានេះ ( ការឡើងថ្លៃទំនិញ )»។
ឯកឧត្តមអភិបាលរាជធានីភ្នំពញ បានលើកឡើងយ៉ាងដូច្នេះ ក្នុងសន្និសីទកាសែត ដែលបានធ្វើឡើងក្រោយកិច្ចប្រជុំតាមប្រព័ន្ធវិដេអូជាច្រើនម៉ោងរវាងអភិបាលរាជធានីភ្នំពេញ ជាមួយគណៈកម្មការចម្រុះ ដឹកនាំដោយឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ពាក់ព័ន្ធនឹងការអនុវត្តតាមសេចក្ដីសម្រេចរបស់រាជរដ្ឋាភិបាលកម្ពុជា លេខ៤៩ ស.ស.រ ចុះថ្ងៃទី១៤ ខែមេសា ឆ្នាំ២០២១ ស្ដីពី ការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្ដាល ជាបណ្តោះអាសន្ន សម្រាប់រយៈពេល១៤ថ្ងៃ គិតចាប់ពីវេលាម៉ោងសូន្យថ្ងៃទី១៥ ដល់ថ្ងៃទី២៨ ខែមេសា ឆ្នាំ២០២១ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
សូមរម្លឹកថា ចាប់តាំងពីមានការបែកធ្លាយសារជាសំឡេងរបស់សម្តេចតេជោ ហ៊ុន សែន ស្តីពីការបិទក្រុងភ្នំពេញ និងក្រុងតាខ្មៅ កាលពីល្ងាចថ្ងៃទី១៤ ខែមេសា ឆ្នាំ២០២១ ប្រជាពលរដ្ឋជ្រួលច្របល់ បានសំរុកទៅទិញទំនិញ ម្ហូបអាហារ មី ថ្នាំពេទ្យ ដើម្បីស្តុកទុក។ តែអ្វីគ្រប់យ៉ាង ពិសេសពងទា ត្រីសាច់ មី ជាដើម បានឡើងថ្លៃ ហើយមិនមានលក់ថែមទៀតផង។
យ៉ាងណាក៏ដោយ ក្រោយដាក់ចេញវិធានការបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ភ្លាមៗ កាលពីយប់ថ្ងៃទី១៤ ខែមេសា ឆ្នាំ២០២១ សម្តេចតេជោ ហ៊ុន សែន បានចេញសារជាសំឡេងមួយទៀត អំពាវនាវកុំឲ្យប្រជាពលរដ្ឋ រស់នៅភ្នំពេញ និងក្រុងតាខ្មៅ ព្រួយបារម្ភ ព្រោះថា បិទតែការធ្វើដំណើរ និងមិនឲ្យចេញពីផ្ទះ តែបើទៅទិញម្ហូបអាហារ និងការធ្វើដំណើរបន្ទាន់ផ្សេងទៀត នៅអនុញ្ញាត ហើយផ្សារមិនបិទនោះទេ៕
ចែករំលែកព័តមាននេះ