រដ្ឋាភិបាលអាមេរិកបានដំណើរការស៊ើបអង្កេតឧបករណ៍វាស់ស្ទង់ជាតិពុលក្នុងរថយន្តប្រើម៉ាស៊ូតនៅតាមបណ្តាក្រុមហ៊ុនផលិតរថយន្តនានា ក្រោយពីក្រុមហ៊ុនវ៉ុលវ៉ាហ្គេន សារភាពថា ប្រើឧបករណ៍នេះដើម្បីបញ្ឆោតបទដ្ឋានបរិស្ថានរបស់អាមេរិក ។ ក្រសួងយុត្តិធម៌ក្រុងវ៉ាស៊ីនតោនចាប់ផ្តើមស៊ើបអង្កេតរកកំហុសជាមួយក្រុមហ៊ុនអាល្លឺម៉ង់នោះ។
អង្គភាពគ្រប់គ្រងបរិស្ថានសហរដ្ឋអាមេរិក (EPA) ឱ្យដឹងកាលពីថ្ងៃទី២១ កញ្ញា ២០១៥ ថា នឹងដំណើរការស៊ើបអង្កេតឧបករណ៍នោះនៅក្នុងរថយន្តប្រើម៉ាស៊ូតដែលផលិតដោយក្រុមហ៊ុននានា ក្រោមកិច្ចសហប្រតិបត្តិការជាមួយគណៈកម្មការគ្រប់គ្រងជាតិពុលផ្នែកអាកាសធាតុរបស់រដ្ឋកាលីហ្វ៊័រនីញ៉ា ។
ការស៊ើបអង្កេតកើតឡើងក្រោយពេលសេចក្តីថ្លែងការណ៍របស់ EPA និងអាជ្ញាធររដ្ឋកាលីហ្វ៊័រនីញ៉ា កាលពីថ្ងៃទី១៨ កញ្ញា ២០១៥ ថា ក្រុមហ៊ុន វ៉ុលវ៉ាហ្គេន ជាក្រុមហ៊ុនផលិតរថយន្តដ៏ធំនៅអឺរ៉ុប ទទួលស្គាល់ថា បានភ្ជាប់ឧបករណ៍សម្រាប់បំភាន់ភ្នែកពីកម្រិតជាតិពុលខុសច្បាប់ដើម្បីបានឆ្លងកាត់ការសាកល្បងលើជាតិពុលនៅក្នុងរថយន្តចំនួន៤៨២.០០០គ្រឿងដែលលក់ក្នុងអាមេរិក ។
EPA បញ្ជាក់ថា វ៉ុលវ៉ាហ្គេន ប្រើឧបករណ៍ Software សម្រាប់ភ្ជាប់កម្មវិធីត្រួតពិនិត្យចាប់កំហុសនៅពេលរថយន្តត្រូវអាជ្ញាធរវាស់ស្ទង់ការបញ្ចេញផ្សែងពុល ។ នៅពេលរថយន្តឆ្លងកាត់ការសាកល្បង និងបើកបរធម្មតា Software នឹងបិទប្រព័ន្ធគ្រប់គ្រងផ្សែងធ្វើឱ្យរថយន្តនោះបញ្ចេញជាតិពុលខ្ពស់ជាងច្បាប់កំណត់ ។ រថយន្តដែលទទួលផលប៉ះពាល់គឺរថយន្តម៉ាស៊ីន៤ របស់វ៉ុលវា៉ហ្គេន និងរថយន្តប្រើម៉ាស៊ូតរបស់ក្រុមហ៊ុន Audi ផលិតនៅឆ្នាំ២០០៨ ។
នៅក្នុងច្បាប់ស្តីពីអាកាសធាតុបរិសុទ្ធមានសិទ្ធិពិន័យក្នុងតម្លៃខ្ពស់ គឺ ៣៧.៥០០ដុល្លារ ក្នុងមួយគ្រឿង មានន័យថា វ៉ុលវ៉ាហ្គេន អាចត្រូវពិន័យច្រើនជាង១៨.០០០លានដុល្លារ ។
អ្នកនាំពាក្យរបស់ EPA ឱ្យដឹងថា អង្គភាពមិនបានប្រកាសប្រមូលរថយន្ត វ៉ុលវ៉ាហ្គេន ទេ ប៉ុន្តែមានន័យថា នឹងចេញបទបញ្ជាឱ្យក្រុមហ៊ុនប្រមូលរថយន្តទាំងនោះដើម្បីកាត់បន្ថយផលប៉ះពាល់លើជាតិពុល និងនៅពេល វ៉ុលវ៉ាហ្គេន រួមជាមួយ Audi មានដំណោះស្រាយល្អអាចឆ្លងកាត់ការយល់ស្របពី EPA អាចប្រគល់រថយន្តជូនអតិថិជនប្រើបន្តបាន ៕
ចែករំលែកព័តមាននេះ