អ្នកវិទ្យាសាស្ត្របានរកឃើញលលាដ៍ក្បាលបុរាណដែលសន្និដ្ឋានថា តាំងពី៩០០០ឆ្នាំមុន ជាក្បាលកាត់ចេញពីដងខ្លួនដ៏ចំណាស់បំផុត និងជាលើកដំបូងនៅលើពិភពលោក ។
សារព័ត៌មានបរទេសកាលពីពេល ថ្មីៗកន្លងមកផ្សាយថា លាលដ៍ក្បាលនោះរកឃើញដោយលោកអង់ក្រេ ស្តេរ៉ាស់ អ្នកវិទ្យាសាស្ត្រពីស្ថាប័នមនុស្សសាស្ត្រ «ម៉ាក់ផ្លាង» នៅតំបន់ឡាប៉ា ដូសានតូស ភាគខាងកើតប្រទេសប្រេស៊ីល ។ លលាដ៍ក្បាលនោះមានអាយុជាង៩០០០ឆ្នាំ និងជាលលាដ៍ក្បាលដែលគេកាត់ចេញពីដងខ្លួនដ៏ចំណាស់បំផុតនៅលើសាកលលោក ។ លោកស្តេរ៉ាស់ ទីប្រឹក្សារបស់សាស្ត្រាចារ្យស៊ូប្ល៊េក អ្នកវិទ្យាសាស្ត្រពីមជ្ឈមណ្ឌលសរីរាង្គសាស្ត្ររបស់មហាវិទ្យាល័យដានឌី ប្រទេសស្កុតលែន បញ្ជាក់ថា លាលដ៍ក្បាលដែលលោកប្រទះឃើញនោះមានលក្ខណៈស្រដៀងលលាដ៍ក្បាលមនុស្សបច្ចុប្បន្ន ប៉ុន្តែវាចម្លែក ព្រោះប្រទះមិនឃើញមានបំណែកផ្សេងទៀត ក្រៅពីឆ្អឹងប្រអប់ដៃទាំងសងខាងគ្របពីលើ ពោលគឺអត់មានដងខ្លួន ។
លោកសាស្ត្រាចារ្យស៊ូប្លេ៊រ បញ្ជាក់ថា «ពួកយើងបានធ្វើការរួមជាមួយក្រុមជំនាញ និងតាមការត្រួតពិនិត្យលើលលាដ៍ក្បាលនោះ អាចសន្និដ្ឋានបានថា កើតឡើងដោយសារការកាត់កពាក់ព័ន្ធនឹងបញ្ហាសង្គមជំនាន់បុរាណនៅទ្វីបអាមេរិកខាងត្បូង ដែលកើតមានប្រើអំពើហិង្សាជាញឹកញាប់ ។ បញ្ហានោះអាចជាមូលហេតុឈានទៅដល់ការកាត់ក្បាល» ។
នៅក្នុងសេចក្តីថ្លែងការណ៍របស់អ្នកវិទ្យាសាស្ត្រជាច្រើនទៀតឱ្យដឹងថា ពួកគេបានបង្កើតការសន្និដ្ឋានពីការកាត់ក្បាល ផ្សេងៗពីគ្នា ទាក់ទិននឹងរបត់សង្គម និងជីវភាពរបស់ជនជាតិអាមេរិកខាងត្បូងគ្រាអតីតកាល ព្រោះធ្លាប់បានប្រទះឃើញលលាដ៍ក្បាលបុរាណជាច្រើនលើក ដោយពួកគេយល់ថាទ្វីបអាមេរិកខាងត្បូងនាសម័យកាលនោះមានការប្រយុទ្ធគ្នា ដូច្នេះអាចជាហេតុផលនៃការកាត់ក្បាល ។
មានការសន្និដ្ឋានទៀតថា លលាដ៍ក្បាលនោះហាក់ដូចជាទាក់ទងនឹងនិមិត្តរូប ឬជាការលះបង់ក្នុងពិធីកម្មអ្វីមួយ ។ លោកចន វ៉េរ៉ាណូ អ្នកមនុស្សសាស្ត្រពីមហាវិទ្យាល័យ «ធូលេន» សហរដ្ឋអាមេរិកបញ្ជាក់ថា «តាមការពិសោធធ្វើឱ្យយើងដឹងថា ដៃដែលគ្របលើផ្ទៃមុខនៃលលាដ៍ គឺបញ្ជាក់អ្វីម្យ៉ាងដល់យើង ហើយយើងក៏ធ្លាប់ប្រទះថាមានឆ្អឹងបាតជើង នៅលើផ្ទៃមុខលលាដ៍ក្បាលកាលពីមុន ប្រៀបបាននឹងនិមិត្តរូបនៃការមាក់ងាយអ្វីម្យ៉ាង»៕
ចែករំលែកព័តមាននេះ