រាជធានីភ្នំពេញ ៖ នៅក្នុងវិបត្តិនៃជំងឺកូវីដ ១៩ ចាប់តាំងពីឆ្នាំ ២០២០ មកម្ល៉េះ គេឃើញថា អាជីវកម្មតាមវិស័យមួយចំនួនបានជួបផលប៉ះពាល់ជាពិសេសអាជីវកម្មក្នុងវិស័យទេសចរណ៍ ដែលធ្វើឱ្យអ្នកប្រកបអាជីវកម្មនោះត្រូវងាកទៅរកអាជីវកម្មផ្សេងបន្ទាន់…
រាជធានីភ្នំពេញ ៖ នៅក្នុងវិបត្តិនៃជំងឺកូវីដ ១៩ ចាប់តាំងពីឆ្នាំ ២០២០ មកម្ល៉េះ គេឃើញថា អាជីវកម្មតាមវិស័យមួយចំនួនបានជួបផលប៉ះពាល់ជាពិសេសអាជីវកម្មក្នុងវិស័យទេសចរណ៍ ដែលធ្វើឱ្យអ្នកប្រកបអាជីវកម្មនោះត្រូវងាកទៅរកអាជីវកម្មផ្សេងបន្ទាន់ ដើម្បីស្ដារ ហិរញ្ញវត្ថុរបស់ខ្លួនឡើងវិញ ក្នុងនោះគេឃើញថា វិស័យអចលនទ្រព្យដែលមានការពុះ ដីឡូត៍នៅតែមានសកម្មភាពផុសផុល និងទទួលបានវិនិយោគិនថ្មីៗពីវិស័យផ្សេងមក បណ្ដាក់ទុនវិនិយោគ ។
អ្នកជំនាញអចលនទ្រព្យបានលើកឡើងថា ការបណ្ដាក់ទុនវិនិយោគទៅលើវិស័យតែ មួយក្នុងពេលតែមួយនឹងធ្វើឱ្យមានផលប៉ះពាល់នៅពេលអនាគត ជាពិសេសទៅលើ ទីផ្សារផ្ទាល់តែម្ដង ។
លោក សំ សុខនឿន ប្រធានសមាគមអចលនទ្រព្យសកលបានឱ្យដឹងថា វាមិនមែន ជាការល្អនោះទេ ដែលវិនិយោគិនសម្រុកអភិវឌ្ឍទៅលើវិស័យអចលនទ្រព្យកាន់តែច្រើន ក្នុងពេលតែមួយនេះ ។ សកម្មភាពបែបនេះ វានឹងជំរុញឱ្យតម្លៃអចលនទ្រព្យកើនឡើង ឆាប់រហ័សហើយនឹងធ្វើឱ្យទីផ្សារជួបបញ្ហានៅពេលណាមួយព្រោះមានតែការលក់មិនចេញ ហើយតម្លៃខ្ពស់ពីទីផ្សារជាក់ស្ដែង ។
លោកបន្តថា នៅពេលមនុស្សម្នាក់វិនិយោគតែលើវិស័យមួយ ដូចជាផ្ដោតតែលើ អចលនទ្រព្យ នៅពេលវិស័យនេះមានបញ្ហានឹងធ្វើឱ្យបុគ្គលនោះ វិនិយោគិនរូបនោះ នឹង ទទួលរងផលប៉ះពាល់ដែលមិនអាចរកអ្វីមកទប់បាន តែបើសិនជាគាត់ឆ្លាត គាត់អាច វិនិយោគទៅលើវិស័យផ្សេងៗទៀត ដូច្នេះនៅពេលវិស័យមួយប៉ះពាល់ ឬក៏ដួលរំលំក៏ មានវិស័យជាច្រើនទៀតចាំទប់ដែរ ។
មិនខុសពីសេដ្ឋកិច្ចរបស់កម្ពុជា បើសិនជាកម្ពុជាពឹងលើតែវិស័យមួយសម្រាប់ទ្រទ្រង់ សេដ្ឋកិច្ច ដូចជាពឹងតែលើទេសចរណ៍ ឬក៏កាត់ដេរ នៅពេលវិស័យណាមួយមានភាព រង្គោះរង្គើ នោះនឹងទាញទម្លាក់សេដ្ឋកិច្ចកម្ពុជាបានយ៉ាងងាយស្រួលផងដែរ ។ កម្ពុជាបាន ធ្វើពិពិធកម្មសេដ្ឋកិច្ចជាបន្តបន្ទាប់ ដើម្បីទប់ឥទ្ធិពលពីសម្ពាធខាងក្រៅ ជាក់ស្ដែងពីមុនគេ ថា កម្ពុជាពឹងលើវិស័យកាត់ដេរ តែនៅពេលវិស័យកាត់ដេររងឥទ្ធិពលពីសហគមន៍ដោយ ដកផ្នែកខ្លះនៃ EBA ក៏នៅតែធ្វើសេដ្ឋកិច្ចកម្ពុជាអាចដំណើរការហើយវិស័យកាត់ដេរនៅ តែអាចដំណើរការដោយសារតែកម្ពុជាបានធ្វើពិពិធកម្មទីផ្សារ ដោយមិនផ្ដោតតែលើទីផ្សារ សហគមន៍អឺរ៉ុបមួយនោះទេ ។
លោក ធួន ស៊ីណា ប្រធានសមាគមទីភ្នាក់ងារទេសចរណ៍អាស៊ីប៉ាស៊ីហ្វិកកម្ពុជា បានលើកឡើងថា នៅពេលវិស័យទេសចរណ៍បានរងផលប៉ះពាល់ពីវិបត្តិកូវីដ ១៩ អ្នក ប្រកបរបរក្នុងវិស័យនេះ ក៏ប៉ះពាល់ហើយអ្នកមានលុយក៏នាំគ្នាទៅបើកក្រុមហ៊ុនអចលន ទ្រព្យ និងជាពិសេសពុះដីឡូត៍លក់ ។ ការនាំគ្នាទៅធ្វើតែវិស័យនេះមួយវាមិនល្អនោះទេ ពួកគេគួរសំឡឹងមើលទៅវិស័យណាដែលមានចីរភាពយូរអង្វែង ដូចជាវិស័យកសិកម្ម ព្រោះនៅលើពិភពលោកប្រទេសណាក៏ត្រូវហូប ត្រូវបំពេញក្រពះដែរ ដូច្នេះការធ្វើកសិកម្ម ស្របតាមស្ដង់ដារត្រឹមត្រូវនឹងធ្វើឱ្យវិស័យកសិកម្មកម្ពុជា មានសន្ទុះមួយកម្រិតទៀត ។
លោកបន្តថា អ្វីដែលរដ្ឋាភិបាលត្រូវធ្វើដែរនោះ គឺត្រូវកសាងហេដ្ឋារចនាសម្ព័ន្ធក្នុង វិស័យកសិកម្មបន្ថែម ដូចជាសង់ប្រព័ន្ធធារាសាស្ត្របន្ថែមដើម្បីមានទឹកគ្រប់គ្រាន់សម្រាប់ ស្រោចស្រោប សាងសង់ផ្លូវសម្រាប់ដឹកជញ្ជូនកសិផល និងជាពិសេសត្រូវរកទីផ្សារ សម្រាប់ផលិតផលកសិកម្មកម្ពុជា និងត្រូវធានាតម្លៃដល់កសិផលរបស់កសិករផងដែរ ៕
ចែករំលែកព័តមាននេះ