រាជធានីភ្នំពេញ ៖ ព្រឹកនេះ (ថ្ងៃទី២៥ វិច្ឆិកា ២០១០) សម្តេចអគ្គមហាពញាចក្រីហេងសំរិន ប្រធានរដ្ឋសភា លោកងួន ញ៉ិល អនុប្រធានទី១រដ្ឋសភា លោកសាយ ឈុំ អនុប្រធានទី២រដ្ឋសភា លោកទេព ងន អនុប្រធានទី២ព្រឹទ្ធសភា សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី និងលោកជំទាវបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានអញ្ជើញដឹកនាំស្ថាប័ន-ក្រុមមន្ត្រីប្រារព្ធពិធីគោរពវិញ្ញាណក្ខន្ធ និងថ្លែងមរណទុក្ខក្រៀមក្រំចំពោះអ្នកស្លាប់ និងរងរបួសក្នុងអន្លង់មហាសោកនាដកម្មនៅលើស្ពានពេជ្រនៃទីក្រុងកោះពេជ្រ ។
ក្រៅពីនេះគេសង្កេតឃើញលោកឧបនាយករដ្ឋមន្ត្រីទៀ បាញ់ រដ្ឋមន្ត្រីក្រសួងការពារជាតិ លោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស លោកទេសរដ្ឋមន្ត្រី ស្ថាប័នរាជរដ្ឋាភិបាល ស្ថាប័នរដ្ឋសភា ស្ថាប័នព្រឹទ្ធសភា ស្ថាប័នកាកបាទក្រហម ស្ថាប័នគណបក្សប្រជាជនកម្ពុជា ស្ថាប័នរាជធានីភ្នំពេញ ស្ថាប័នខណ្ឌទាំង៧ និងស្ថាប័នផ្សេងៗជាច្រើនទៀត មន្ត្រីរាជការ ប្រជាពលរដ្ឋ ចូលរួមអុជធូបកាន់ទុក្ខដល់អ្នកស្លាប់ និងអ្នករងរបួសដោយក្តីអាណិតអាសូរ ក្រៀមក្រំក្រៃលែង ។ ចំណែកទៅតាមអង្គភាពស្ថាប័នរដ្ឋក៏ត្រូវបានបង្ហូតទង់ជាតិពាក់កណ្តាលផងដែរ ដើម្បីជាការកាន់ទុក្ខ និងគោរពវិញ្ញាណក្ខន្ធ ។
នៅក្នុងឱកាសអុជធូបថ្លែងសុន្ទរកថាដែលពោរពេញទៅដោយក្តីវិយោគសម្តេចអគ្គមហាសេនាបតីតេជោហ៊ុន សែន និងលោកជំទាវបណ្ឌិតប៊ុន រ៉ានី ហ៊ុន សែន បានហូរទឹកភ្នែកជ្រែកថ្ពាល់ដោយមិនដឹងខ្លួនពោរពេញទៅដោយភាពសង្វេគជ្រែកដួងចិត្ត ដ្បិតអីភាពក្តុកក្តួលរន្ធត់នៅតែដក់ជាប់អារម្មណ៍ជានិច្ច ។
សូមរំលឹកថា យ៉ាងហោចណាស់មនុស្សជាង៤០០នាក់បានស្លាប់បាត់បង់ជីវិតយ៉ាងអាណោចអាធ័ម និងតក់ស្លុតបំផុត ហើយជាង៧០០នាក់ទៀតបានរងរបួស ត្រូវបានបញ្ជូនទៅសង្គ្រោះនៅតាមបណ្តាមន្ទីរពេទ្យនានាក្នុងក្រុងភ្នំពេញ ខណៈកើតមានកោលាហលជ្រួលច្របល់ដ៏ធំមួយនៅឯមណ្ឌលកំសាន្តទីក្រុងកោះពេជ្រ កាលពីរាត្រីម៉ោងជាង៩ថ្ងៃទី២២ វិច្ឆិកា ២០១០ ជាថ្ងៃចុងក្រោយនៃការប្រារព្ធព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ។
ចែករំលែកព័តមាននេះ