ក្រុមហ៊ុនជប៉ុន SPREAD Co. បានប្រកាសថា ខ្លួននឹងបើករោងចក្រផលិតបន្លែសាលាដខ្នាតធំរបស់ពិភពលោក ដំណើរការដោយស្វ័យប្រវត្តិតាំងពីដាក់គ្រាប់ពូជ និងរហូតការកាត់លក់លើទីផ្សារ ហើយវាមានលទ្ធភាពបណ្តុះបាន៣០.០០០ដើមក្នុង១ថ្ងៃ ។
រោងចក្របន្លែនេះលាតសន្ធឹងលើផ្ទៃដីប្រមាណជា៤.៤០០ម៉ែត្រការ៉េ ដែលគម្រោងនេះនឹងចាយលុយចំនួន១៦,៧លានដុល្លារ ។ ចំណែកការសាងសង់រោងចក្រនឹងដំណើរការនៅឆ្នាំ២០១៦ ហើយក្រុមហ៊ុន SPREAD Co. នឹងចាប់ផ្តើមប្រតិបតិ្តការពាណិជ្ជកម្មនៅឆ្នាំ២០១៧ ដោយក្រុមហ៊ុនសង្ឃឹមនឹងអាចរកចំណូលពីការលក់ប្រចាំឆ្នាំប្រមាណជា៨,៤លានដុល្លារ។ ការដាំនេះមានលក្ខណៈពិសេស ពោលគឺវាមិនចាំបាច់ដាំលើដីទេ តែត្រូវជំនួសនូវវិទ្យាសាស្ត្របៃតងមិនប៉ះពាល់ដល់បរិស្ថាន ។
ក្រុមហ៊ុន SPREAD Co. បង្កើតឡើងក្នុងឆ្នាំ២០០៦ និងបានដំណើរការរោងចក្របន្លែ ធំៗជាងគេរបស់ពិភពលោកដោយប្រើប្រាស់ពន្លឺសិប្បនិមិត្តដូចជានៅក្នុងទីក្រុង Kameoka ខេត្តក្យូតូ ។ បច្ចុប្បន្នសាលាដទាំង៤ប្រភេទផលិតក្នុងចំនួនសរុប២១.០០០ដើមក្នុង១ថ្ងៃ និងបាននាំចេញទៅកាន់ហាងលក់បនជាច្រើននៅក្រៅប្រទេស ។
ក្រុមហ៊ុនមានគម្រោងផែនការធំរបស់ខ្លួន ពោលគឺបង្កើនការផលិតឱ្យបានច្រើនជាងមុនអាចផលិតបន្លែសាលាដចំនួន៥០០.០០០ដើមក្នុង១ថ្ងៃ នារយៈពេល៥ឆ្នាំខាងមុខទៀត ដើម្បីពង្រីកទីផ្សារទាំងក្នុងស្រុក និងក្រៅស្រុក ៕
ចែករំលែកព័តមាននេះ