ក្រោយ៣១ឆ្នាំ រត់គេចខ្លួនគ្រប់កន្លែង ទីបំផុតមេម៉ាហ្វ៊ីយ៉ាអីុតាលីដ៏សាហាវ Pasquale Scotti ត្រូវប៉ូលិសប្រេស៊ីលចាប់បានកាលពីចុងខែឧសភា២០១៥ ។ ប្រការគួរឱ្យចាប់អារម្មណ៍គឺ ក្នុងបណ្តាខែឆ្នាំគេចខ្លួននោះ Pasquale Scotti ទទទួលបានផលល្អជានិច្ចក្នុងការវះកាត់ប្តូរទម្រង់មុខ អត់អ្នកណាចំណាំគេបានឡើយ ។
ភស្តុតាងស្នាមខ្ចៅដៃ
ការចាប់ខ្លួនអាជីវករ Franceisco de Castro Visconti ដែលមានឈ្មោះដើមពិតប្រាកដថា Pasquale Scotti បង្កឱ្យមានការភ្ញាក់ផ្អើលពេញទីប្រជុំជន Recife ក្នុងប្រទេសប្រេស៊ីល ។ គ្មានអ្នកណាស្មានដល់ទាល់តែសោះថា បុរសដ៏ស្លូតបូត ឧស្សាហ៍ព្យាយាម និងស្រឡាញ់ប្រពន្ធកូនម្នាក់នេះ តាមពិតជាមេម៉ាហ្វ៊ីយ៉ាដ៏កាចសាហាវ ត្រូវប៉ូលិសអីុតាលី និងប៉ូលិសអាំងទែរប៉ូលតាមរកចាប់ខ្លួន៣១ឆ្នាំមកហើយឡើយ ។ រហូតមកទល់សព្វថ្ងៃ មហាជននៅតែនិយាយរំលឹកទិដ្ឋភាពរថយន្តប៉ូលិសមួយជួរវែងបើកយ៉ាងលឿនក្នុងក្រុង Recife ស្រាប់តែបត់ក្បាលកាត់ទទឹងពីមុខរថយន្តមួយគ្រឿង ហើយប៉ូលិសលោតព្រោងព្រាតចេញពីរថយន្ត រត់ចូលដាក់ខ្នោះដៃ Francisco de castro Visconti ដែលកំពុងដឹកប្រពន្ធ និងកូនពីរនាក់ (ម្នាក់អាយុ១០ឆ្នាំ ម្នាក់ទៀតអាយុ១៥ឆ្នាំ) ទៅសាលា ។
នាយប៉ូលិសប្រេស៊ីលម្នាក់ប្រាប់ថា ការដឹង Francisco de Castro Visconti ជាមេម៉ាហ្វ៊ីយ៉ាអីុតាលីឈ្មោះ Pasquale Scotti គឺដឹងដោយចៃដន្យបំផុត ។ កាលណោះប៉ូលិសប្រេស៊ីលកំពុងសហការ ជាមួយកម្លាំងប្រឆាំងម៉ាហ្វ៊ីយ៉ាអីុតាលី ស៊ើបអង្កេតសកម្មភាពលាងលុយរបស់ជនជាតិអីុតាលីមួយក្រុមដែលកំពុងរស់នៅប្រទេសប្រេស៊ីល ។ ក្រុមហ៊ុនពីររបស់ Francisco de Castro Visconti ជាប់សង្ស័យពាក់ព័ន្ធសកម្មភាពលាងលុយរបស់អង្គការមួយចំនួនមានប្រភពនៅអីុតាលី ។ ពេលកំពុងស៊ើបអង្កេតជាសម្ងាត់នោះ ប៉ូលិសរកឃើញស្នាមខ្ចៅដៃអេឡិចត្រូនិករបស់ Franceisco de Castro Visconti ដូចគ្នាបេះបិទស្នាមខ្ចៅដៃមេម៉ាហ្វ៊ីយ៉ាអីុតាលី Pasquale Scotti ។
មិនបង្អង់យូរ រឿងក្តីរបស់ Parquale Scotti ត្រូវបានសើរើឡើងវិញ ហើយប៉ូលិសចាប់ផ្តើមតាមរកស្លាកស្នាម និងប្រមូលឯកសារភស្តុតាងនានារហូតដល់អាចកំណត់បានច្បាស់ថា Franceisco de Castro Visconti និង Pasquale Scotti ជាមនុស្សតែម្នាក់ ។ ភ្លាមនោះ ផែនការចាប់ខ្លួន Pasquale Scotti ត្រូវបានលើកឡើង ដោយមានការសហការពីប៉ូលិសសម្ងាត់អីុតាលី និងប្រេស៊ីល។ ប៉ូលិសសម្រេចចិត្តចាប់ជននេះតាមផ្លូវដែលគេកំពុងធ្វើដំណើរ មិនហ៊ានព័ទ្ធផ្ទះចាប់ឡើយ ខ្លាចគេរត់គេចខ្លួនរួចទៀត ព្រោះមានល្បិចច្រើនណាស់ ។ ក្រោយចាប់ខ្លួនបាន និងសួរចម្លើយយា៉ងប្រុងប្រយ័ត្ន Pasquale Scotti ដឹងខ្លួនដល់ពេលអស់លក្ខណ៍មែនទែន បានយល់ព្រមឆ្លើយគ្រប់យា៉ងទាំងអស់ពីការប្រើល្បិចរត់គេចខ្លួនក្នុងរយៈពេល៣១ឆ្នាំកន្លងមក ។ សព្វថ្ងៃមេម៉ាហ្វ៊ីយ៉ា ដ៏កាចសាហាវរូបនេះត្រូវឃុំខ្លួនបណ្តោះអាសន្ននៅពន្ធនាគារមួយដែលមានការយាមកាមតឹងរឹុងបំផុតក្នុងប្រទេសប្រេស៊ីល រង់ចាំថ្ងៃបញ្ជូនខ្លួនត្រឡប់មកអីុតាលីវិញ ។
ដំណើររត់គេចខ្លួន
ឆ្នាំនេះ Pasquale Scotti អាយុ៥៧ឆ្នាំ ។ ជននេះទៅសម្ងំរស់នៅទីប្រជុំជន Refeife ប្រទេសប្រេស៊ីល កាលពីពាក់កណ្តាលទសវត្ស៨០នៃសតវត្សមុន បន្ទាប់ពីដឹកនាំការប្រយុទ្ធមួយបណ្តាលឱ្យស្លាប់មនុស្ស២៦នាក់ ហើយលួចរត់ចេញពីមន្ទីរពេទ្យទីដែលគេកំពុងព្យាបាលរបួស ព្រោះត្រូវគ្រាប់ច្រើនកន្លែង ។ ដំបូងគេស៊ីឈ្នួលគេធ្វើការងារជើងដៃ, បន្ទាប់មកបង្កើតអាហារដ្ឋានមួយដោយខ្លួនឯង លក់អាហារអីុតាលី ។ ក្រោយមកទៀតឈានទៅបង្កើតក្រុមហ៊ុនបានពីរជាក្រុមហ៊ុនជំនាញខាងនាំអាហារចូលពីបរទេស ។
ប៉ូលិសម្នាក់នៅទីប្រជុំជន Receife ប្រាប់កាសែត The Guadian របស់អង់គ្លេសថា Pasquale Scotti ចូលសញ្ជាតិប្រេស៊ីលឆ្នាំ១៩៨៦ តមក៩ឆ្នាំក្រោយរៀបការជាមួយនារីប្រេស៊ីលម្នាក់ ។ ក្នុងបណ្តាខែឆ្នាំរស់នៅ Receife ជននេះមិនដែលធ្វើអ្វីខុសច្បាប់ឡើយ សូម្បីចតរថយន្តក៏មិនដែលចតច្រងេងច្រងាង ធ្វើឱ្យខូចសណ្តាប់ធ្នាប់ចរាចរណ៍ដែរ ។ គេតែងបង់ពន្ធជូនរដ្ឋ ចូលរួមបោះឆ្នោត និងជានិច្ចកាលរីករាយរាក់ទាក់ជាមួយមនុស្សជុំវិញ ទោះមានក៏ដោយក្រក៏ដោយ ធ្វើឱ្យ អ្នកណាៗក៏ចូលចិត្តគេ ។ ជននេះទទួលស្គាល់ថាក្នុងរយៈពេល២០ឆ្នាំ រួមរស់ជាមួយគ្នា ប្រពន្ធរបស់គេអត់ដឹងពីប្រវត្តិខ្មៅងងឹតរបស់ប្តីសូម្បីបន្តិច ។ អ្វីដែលគេឧស្សាហ៍និយាយប្រាប់អ្នកផង គឺរូបគេកាលពីតូចជាក្មេងកំព្រា រសាត់អណ្តែតគ្រប់ទីកន្លែងរកការងារធ្វើចិញ្ចឹមជីវិត ប៉ុន្តែដោយសារសំណាងល្អនៅមាន ខ្លះៗ គួបផ្សំនឹងការខិតខំតស៊ូរបស់ខ្លួនផងទើបខ្លួនសល់ទុនមួយចំនួនអាចបង្កើតមុខរបរនៅ Receife បានរហូតដល់សព្វថ្ងៃ ។
គ្មានអ្នកណាស្មានដល់សោះថា បុរសដែលពូកែធ្វើឱ្យគេអាណិត និងសរសើរម្នាក់នេះ តាមពិតជាមេដឹកនាំក្រុមម៉ាហ្វ៊ីយ៉ា Camorra ដ៏កាចសាហាវនៅក្រុង Naples ប្រទេសអីុតាលី ពីឆ្នាំ១៩៧០ដល់ឆ្នាំ១៩៨០ ។ កាលអាយុ២០ឆ្នាំ ប្រឈមមុខទោសលាក់ទុកអាវុធខុសច្បាប់ ទោសចាប់ជម្រិតទារប្រាក់ និងទោសសម្លាប់មនុស្ស ហើយត្រូវឃុំខ្លួនក្នុងពន្ធនាគារ Cutolo នៅកោះ Asinara ។ ខែមករាឆ្នាំ២០០៥ មេម៉ាហ្វ៊ីយ៉ារូបនេះ ត្រូវកាត់ទោសកំបាំងមុខដាក់ពន្ធនាគារអស់មួយជីវិតពីបទដឹកនាំក្រុមម៉ាហ្វ៊ីយ៉ា Camorra របស់ខ្លួនវាយប្រហារលើក្រុមមា៉ហ្វ៊ីយា៉ផ្សេងៗ ដូចយ៉ាងក្រុម NCO ក្រុម Nuova Famiglia ជាដើមបណ្តាលឱ្យបាត់បង់ជីវិតមនុស្ស២៦នាក់ ៕
ចែករំលែកព័តមាននេះ