ប្រទេសមីយ៉ាន់ម៉ា ៖ បណ្ដាសាក្សីនិយាយថា ប៉ូលិសមីយ៉ាន់ម៉ាកាលពីថ្ងៃទី២មីនា បានប្រើគ្រាប់បែកធ្វើឲ្យហឹងត្រចៀក ដើម្បីបំបែកពួកបាតុករដែលប្រមូលផ្ដុំគ្នាជាថ្មី នៅទីក្រុងរ៉ង់ហ្គូនជាទីក្រុងធំបំផុតរបស់ប្រទេស ដើម្បីតវ៉ាប្រឆាំងរដ្ឋប្រហារយោធាកាលពីថ្ងៃទី១កុម្ភៈ។
ភាគច្រើនពាក់មួកកាស់ការពារនិងមានខែល ពួកបាតុករបានប្រមូលផ្ដុំគ្នាត្រង់បារ៉ាស់នានា នៅតាមចំណុចជាច្រើននៃក្រុងរ៉ង់ហ្គូន ដើម្បីស្រែកប្រឆាំងរបបយោធា ដែលបណ្ដេញចេញពីអំណាច និងឃុំឃាំងមេដឹកនាំប្រទេសលោកស្រីអ៊ូងសាន់ស៊ូជី។
តាមសារព័ត៌មានក្នុងស្រុកថា ពួកបាតុករក៏ប្រមូលផ្ដុំគ្នាដែរ ក្នុងតំបន់ដទៃៗទៀតរបស់ប្រទេស។ ពុំមានអ្នករបួសណាម្នាក់ត្រូវបានរាយការណ៍ឡើយសម្រាប់ពេលនេះ ក្នុងថ្ងៃថ្មីនៃបាតុកម្ម ខណៈមនុស្សយ៉ាងតិច២១នាក់បានត្រូវបាត់បង់ជីវិត តាំងពីចាប់ផ្ដើមចលនាតវ៉ាមក។
រដ្ឋមន្ត្រីការបរទេសបណ្ដាប្រទេសអាស៊ាន ត្រូវពិភាក្សាគ្នា នាថ្ងៃទី២មីនាជាមួយកងទ័ពមីយ៉ាន់ម៉ា ក្នុងក្ដីសង្ឃឹមបញ្ឈប់ការបង្ក្រាបបង្ហូរឈាម ២ថ្ងៃក្រោយកងកម្លាំងសន្តិសុខផ្តាច់ជីវិតបាតុករយ៉ាងតិច១៨នាក់។
តាមទូរទស្សន៍ កាលពីយប់ថ្ងៃទី១មីនា ប្រមុខការទូតសិង្ហបុរីថ្លែងថា បណ្ដាសមភាគីអាស៊ាននិងរូបលោកផ្ទាល់ បង្ហាញពីជំហរនៃការពិភាក្សាគ្នាតាមវីដេអូខេនហ្វេរេន ជាមួយតំណាងមួយរូបរបស់យោធាមីយ៉ាន់ម៉ា។
រដ្ឋមន្ត្រីរូបនោះលោកVIVIAN BALAKRISHNAN និយាយទៀតថា អាស៊ាននឹងលើកទឹកចិត្ត ដល់ការចរចា រវាងរបបយោធា និងលោកស្រីអ៊ួងសាន់ស៊ូជី។ ដំណើរការនោះរបស់បណ្ដាប្រទេសក្នុងតំបន់ បណ្ដាលឲ្យមានការិះគន់នានា ដោយអ្នករិះគន់មួយចំនួននិយាយថា នោះជាវិធីធ្វើឲ្យស្របច្បាប់ដល់របបយោធា៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ