រាជធានីភ្នំពេញ ៖ អ្វីជាការផ្លុំខ្យល់រកមេរោគក្រពះ (H. Pylori)? ជាវិធីសាស្ត្រមួយដែលអាចអោយយើងធ្វើរោគវិនិច្ឆ័យបានថា អ្នកជំងឺមានមេរោគក្រពះឬទេ? ដោយមិនចាំបាច់តំរូវអោយអ្នកជំងឺធ្វើការឆ្លុះក្រពះនោះទេ។ នេះជាការលើកឡើងរបស់លោកវេជ្ជបណ្ឌិត គី វុត្ថា ឯកទេស ថ្លើម ក្រពះ ពោះវៀននៃមន្ទីរពេទ្យកាល់ម៉ែត ។
លោកវេជ្ជបណ្ឌិតគី វុត្ថា បានឲ្យដឹងទៀតថា ៖ តើការផ្លុំខ្យល់រកមេរោគក្រពះត្រូវធ្វើឡើងដោយរបៀបណា? ការធ្វើតេស្តនេះ គឺតំរូវអោយអ្នកជំងឺផឹកថ្នាំមួយគ្រាប់ដែលមានសារធាតុអ៊ុយរ៉េ និងកាបូន ដែលសារធាតុកាបូននេះអាចអោយគេកំណត់ចំណាំបាន។
បើ H. Pylori មាននៅក្នុងក្រពះវានឹងបំលែងសារធាតុអ៊ុយរ៉េ ឲ្យទៅជាកាបូនឌីអ៊ុកស៊ីត។ កាបូនឌីអ៊ុកស៊ីត នឹងត្រូវស្រូបចូលទៅក្នុងឈាម ហើយត្រូវបញ្ចេញទៅវិញនៅក្នុងសួត(ដង្ហើមចេញ)។ ខ្យល់ដង្ហើមចេញត្រូវបានរក្សាទុកក្នុងថង់មួយ ដើម្បីធ្វើការពិនិត្យរកកាបូនឌីអ៊ុកស៊ីត។ បើកាបូនដែលមាននៅក្នុងគ្រាប់ថ្នាំត្រូវបានវិភាគរកឃើញដោយម៉ាស៊ីនក្នុងខ្យល់ដង្ហើមរបស់អ្នកជំងឺ នេះបញ្ជាក់បានថា អ្នកជំងឺមានមេរោគ។
ផ្ទុយទៅវិញ បើមិនមានកាបូនដែលនៅក្នុងគ្រាប់ថ្នាំត្រូវបានរកឃើញនោះទេ បញ្ជាក់ថា អ្នកជំងឺមិនមានមេរោគក្រពះនោះទេ។
ដើម្បីធ្វើតេស្តនៃការផ្លុំខ្យល់រកមេរោគក្រពះ តើអ្នកជំងឺត្រូវត្រៀមអ្វីខ្លះ?
ការធ្វើតេស្តគឺតម្រូវអោយអ្នកជំងឺ ៖
- តមអាហារយៈពេល ៤-៦ម៉ោង
- បញ្ឈប់នូវការប្រើប្រាស់ថ្នាំផ្សះរយៈពេលយ៉ាងតិច១ខែ
- បញ្ឈប់នូវការប្រើប្រាស់ថ្នាំក្រពះរយៈពេលយ៉ាងតិច ២ សប្តាហ៍ ។
តើតេស្តនៃការផ្លុំខ្យល់រកមេរោគក្រពះអាចមានផលវិបាកដែរឬទេ?
មិនមានទេ ជាទូទៅការធ្វើតេស្តនៃការផ្លុំខ្យល់រកមេរោគក្រពះអាចធ្វើទៅបានដោយពីរបៀប ៖
- ដោយការប្រើប្រាស់នូវកាបូន១៤ (ដែលមានសារធាតុវិទ្យុសកម្ម)
- ដោយការប្រើប្រាស់នូវកាបូន១៣ (មិនមានសារធាតុវិទ្យុសកម្ម) ការធ្វើតេស្តដោយការប្រើប្រាស់នូវកាបូន១៤ ត្រូវបានគេរកឃើញមុនដំបូង និងត្រូវដាក់អោយប្រើប្រាស់ដោយប្រុងប្រយ័ត្ន ព្រោះតេស្តនេះ មានបង្កប់នូវសារធាតុវិទ្យុសកម្មដែលអាចអោយប៉ះពាល់ដល់សុខភាព។
ការសិក្សាជាបន្តបានបង្ហាញអោយឃើញថា វិទ្យុសកម្មដែលមាននៅក្នុងការធ្វើតេស្តដោយកាបូន១៤ គឺមានចំនួនតិច (គឺវាមានការប៉ះពាល់តិចតួចបំផុត) ដែលត្រូវបានគេចាត់ទុកថាមានសុវត្ថិភាព និងអាចទទួលយកបាន។
ចំណែកឯការធ្វើតេស្តដោយការប្រើប្រាស់នូវកាបូន១៣ត្រូវបានរកឃើញថា មិនមានសារធាតុវិទ្យុសកម្មដែលអាចប៉ះពាល់ដល់សុខភាពនោះទេ។
ក្រុមគ្រូពេទ្យជំនាញឯកទេសក្រពះ ពោះវៀននៃមន្ទីពេទ្យកាល់ម៉ែត បានជ្រើសរើសយកម៉ាស៊ីនតេស្តដែលប្រើប្រាស់នូវកាបូន១៣ ដែលមានលក្ខណៈទំនើបចុងក្រោយនៃបច្ចេកវិទ្យា ប្រកបដោយគុណភាព និងសុវត្ថិភាព ធានាបាននូវការពារសុខភាព១០០%។
លោកវេជ្ជបណ្ឌិត គី វុត្ថា ឯកទេស ថ្លើម ក្រពះ ពោះវៀននៃមន្ទីរពេទ្យកាល់ម៉ែតបានបញ្ជាក់ថា ៖ បើលោក លោកស្រីមានមន្ទិលលើបញ្ហារោគក្រពះ ហើយមានបំណងស្វែងរកការធ្វើរោគវិនិច្ឆ័យតាមរយៈការធ្វើតេស្តរកមេរោគក្រពះដោយការផ្លុំខ្យល់ដែលជាបច្ចេកវិទ្យាវេជ្ជសាស្ត្រទំនើប សូមលោក លោកស្រីអញ្ជើញមកមន្ទីរពេទ្យកាល់ម៉ែតជួបពិគ្រោះជាមួយក្រុមវេជ្ជបណ្ឌិតឯកទេស៕
ចែករំលែកព័តមាននេះ