ខេត្តកំពង់ស្ពឺ ៖ ដោយមិនអស់ចិត្តនិងចង់បានទំនប់យកមកប្រើប្រាស់អាស្រ័យផលវិញ នោះ ប្រជាពលរដ្ឋជាច្រើននាក់បានធ្វើដំណើរទៅកាន់ឃុំស្មំក្រពើ ស្រុកគងពិសី ខេត្តកំពង់ស្ពឺ ដើម្បីអោយអាជ្ញាធរមូលដ្ឋានជួយបញ្ជាក់អោយបានច្បាស់ អំពីភាពចម្រូងចម្រាសដែលថា ដីនៅចំណុចលើផ្លូវលេខ៤១ ចន្លោះគីឡូម៉ែត្រលេខ២៦-២៧ មិនមែនជាដីទំនប់នោះទេ ។
ប៉ុន្តែឥឡូវនេះច្បាស់ការណ៍ហើយ គឺ លោក ឃឹម ងួន មេឃុំស្មំក្រពើ បានធ្វើលិខិតផ្លូវការណ៍ជម្រាបមកលោកអភិបាលស្រុកគងពិសីថា «ទីតាំងខាងលើ ពិតជាមានទំនប់ តាំងពីរបបប៉ុលពតពិតប្រាកដមែន»។
លោក ឃឹម ងួន មេឃុំស្មំក្រពើ កាលពីថ្ងៃទី២៤ ខែកុម្ភៈ ឆ្នាំ២០២១ ថ្មីៗនេះ បានថ្លែងថា កន្លងមក ប្រជាពលរដ្ឋភូមិអណ្តូងច្រុះ បានអាស្រ័យផលលើទំនប់នេះ ជាយូរយារមកហើយពោលគឺតាំងពីជំនាន់ ប៉ុលពត មកម្ល៉េះ តែដោយពុំមានស្តារទំនប់បានរាក់ដូចជាដីស្រែ ។
លោកមេឃុំសង្កត់ធ្ងន់ថា «ទីតាំងខាងលើ ពិតជាមានទំនប់ តាំងពីរបបប៉ុលពត ពិតប្រាកដមែន»។ ដោយឡែក ប្រជាពលរដ្ឋ វិញ អះអាងថា ពេលនេះ ដីទំនប់កំពុងត្រូវបានឈ្មួញមានលុយ មានអំណាច រំលោភយក ដោយរៀបឥដ្ឋ និង ធ្វើរបងថ្មព័ទ្ធ ធ្វើជាកម្មសិទ្ធិតែម្តង ។
ប្រជាពលរដ្ឋ បានសំណូមពរយ៉ាងទទូចដល់អាជ្ញាធរពាក់ព័ន្ធក្នុងស្រុកគងពិសី ខេត្តកំពង់ស្ពឺ ជាពិសេស សម្តេចតេជោនាយករដ្ឋមន្ត្រីនៃកម្ពុជាសូមមេត្តាជួយអន្តរាគមន៍បញ្ហានេះផង ដើម្បីអោយប្រជាពលរដ្ឋ មានទំនប់ និង មានទឹក ដើម្បីអាស្រ័យផល ធ្វើស្រែចំការចិញ្ចឹមជីវិត ។
ចែករំលែកព័តមាននេះ