ខេត្តស្វាយរៀង៖ មានករណីម្ចាស់គណនី Wechat និងគណនីហ្វេសប៊ុកគ្រុបមួយបានបង្ហោះព័ត៌មានមិនពិតថា នៅក្រុងបាវិត មានមនុស្ស ២ ឬ ៣នាក់ ឆ្លងជំងឺកូវីដ១៩ហើយធ្វើឲ្យមានការភ្ញាក់ផ្អើល និងប្រតិកម្មពីលោកអភិបាលខេត្តស្វាយរៀង ចាត់កម្លាំងចុះស្រាវជ្រាវភ្លាមៗ នៅព្រឹកថ្ងៃព្រហស្បតិ៍ ទី២៥ ខែកុម្ភៈ ឆ្នាំ២០២១។
សមត្ថកិច្ច បានឲ្យដឹងថា ជនបង្ហោះព័ត៌មានក្លែងក្លាយនោះ ឈ្មោះ លី ចាន់នី ភេទប្រុសអាយុ ៣១ឆ្នាំ ជាបុគ្គលិករោងចក្រ ស៊ី វ៉ាយ ថប់ ខេមបូឌា ឯ.ក មានទីលំនៅភូមិដើមពោធិ ឃុំកណ្តៀងរាយ ស្រុកស្វាយទាប ខេត្តស្វាយរៀង។
អាជ្ញាធរចម្រុះខេត្តស្វាយរៀង សហការជាមួយតំបន់សេដ្ឋកិច្ចពិសេសហ្គីហ្កា នៅរោងចក្រ ស៊ី.វ៉ាយ.ថប់ (ខេមបូឌា) ឯ.ក ចុះស្រាវជ្រាវ និងបាននាំម្ចាស់គណនី Wechat និងគណនីហ្វេកប៊ុកគ្រុប ដែលផ្សាយព័ត៌មានមិនពិតនោះ។ ជនដែលជាម្ចាស់គណណី Wechat នោះ បានធ្វើកិច្ចសន្យា និងសារភាព សុំទោសមហាជនជាសាធារណៈហើយ។
អាជ្ញាធរខេត្តស្វាយរៀង បានបញ្ជាក់ថា នៅក្នុងភូមិសាស្រ្តក្រុងបាវិត មិនមានការឆ្លងជំងឺកូវីដ១៩ ទេ គឺមានសភាពស្ងប់ស្ងាត់ធម្មតា មិនដូចដែលបុគ្គលខាងលើ បានលើកឡើងនោះទេ។ ដូចច្នេះហើយ រដ្ឋបាលខេត្តស្វាយរៀង សូមបដិសេធ ចំពោះព័ត៌មានក្លែងក្លាយ ដែលជាការផ្សព្វផ្សាយបំពុលសង្គមតែប៉ុណ្ណោះ៕ ដោយ៖ វ៉ាន់ ប៊ុនធឿន
ចែករំលែកព័តមាននេះ