បន្ទាយមានជ័យ៖ អាជ្ញាធរក្រុងសិរីសោភ័ណ បានចុះណែនាំផ្ទាល់ដល់ក្លឹបកំសាន្ត ឌីស្កូថែក បៀហ្កាឌិន ខារ៉អូរខេ អោយផ្អាកអាជីវកម្មបណ្តោះអាសន្ន អំឡុងពេលនេះ ដើម្បីចូលរួមបង្ការ ទប់ស្កាត់កូវីដ១៩។ សកម្មភាពណែនាំនេះ បានធ្វើឡើង នៅថ្ងៃទី២៤ ខែកុម្ភៈ ឆ្នាំ២០២១ ដឹកនាំដោយលោក ហ៊ឹល រ៉ាយ៉ា អភិបាលក្រុងសិរីសោភ័ណ លោកវរៈសេនីយ៍ឯក ស៊ី ឌី អធិការនគរបាលក្រុង លោកវរៈសេនីយ៍ត្រី យ៉ាន សុវណ្ណ មេបញ្ជាការកងរាជអាវុធហត្ថក្រុង រួមនឹងមន្ត្រីកងកម្លាំងជាច្រើន។
លោក ហ៊ឹល រ៉ាយ៉ា បានប្រាប់ថា ជាសារណែនាំពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន និងដាក់វិធានការពីអភិបាលខេត្តបន្ទាយមានជ័យ ហើយលោក បានដឺកនាំមន្ត្រី និងកងកម្លាំង ចុះផ្សព្វផ្សាយណែនាំដល់ទីតាំងផ្ទាល់ក្លឹបកំសាន្ត ឌីស្កូថែក បៀហ្កាឌិន ខារ៉ាអូខេ អោយផ្អាកអាជីវកម្ម ហើយត្រូវចូលបង្ការទប់ស្កាត់កូវីដ១៩ មិនអោយកើតមានក្នុងសហគមន៍។
លោកបានបញ្ជាក់ថា ការចុះផ្សព្វផ្សាយ និងណែនាំនេះ ដើម្បីពង្រឹងការអនុវត្តតាមការណែនាំរបស់ក្រសួងសុខាភិបាល ព្រមទាំងជាការត្រួតពិនិត្យអោយបានម៉ឺងម៉ាត់ជាប់ជាប្រចាំរបស់រដ្ឋបាលក្រុង ជូនដល់ម្ចាស់អាជីវកម្មក្លឹបកំសាន្ត នៅពេលស្ថានភាពកូវីដ១៩ មានការរីករាលដាលឆ្លងក្នុងសហគមន៍ បានផ្ទុះឡើង កាលពីថ្ងៃទី២០កុម្ភៈ៕ ដោយ៖ ប៊ុន ធឿន
ចែករំលែកព័តមាននេះ