រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យបានដាក់កម្លាំងរឹតបន្តឹងនៅភូមិចំនួន២គឺត្រពាំងអញ្ចាញ និងភូមិជង្រុក ស្ថិតនៅក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ក្រោយពីមានការសង្ស័យអំពីជំងឺកូវីដ១៩ ប៉ុន្តែពុំបានបិទទាំងស្រុងមិនឲ្យមានការចេញចូលទៅកាន់ភូមិទាំង២នេះទេ គឺបិទនៅត្រង់កន្លែងដែលមានការសង្ស័យនិងត្រូវយកសំណាកប៉ុណ្ណោះ…
រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យបានដាក់កម្លាំងរឹតបន្តឹងនៅភូមិចំនួន២គឺត្រពាំងអញ្ចាញ និងភូមិជង្រុក ស្ថិតនៅក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ក្រោយពីមានការសង្ស័យអំពីជំងឺកូវីដ១៩ ប៉ុន្តែពុំបានបិទទាំងស្រុងមិនឲ្យមានការចេញចូលទៅកាន់ភូមិទាំង២នេះទេ គឺបិទនៅត្រង់កន្លែងដែលមានការសង្ស័យនិងត្រូវយកសំណាកប៉ុណ្ណោះ ហើយទន្ទឹមនឹងនេះអាជ្ញាធរបានបង្កើនការណែនាំឲ្យបងប្អូនប្រជាពលរដ្ឋប្រុងប្រយ័ត្នខ្ពស់និងអនុវត្តនូវគោលការរបស់ក្រសួងសុខាភិបាលដាក់ចេញ។
មន្ត្រីសាលាខណ្ឌពោធិ៍សែនជ័យបានប្រាប់ថា ករណីសង្ស័យនៅភូមិទាំង២ខាងលើគឺពាក់ព័ន្ធទៅនិងព្រឹត្តិការណ៍សហគមន៍២០ កុម្ភៈក្នុងនោះអាជ្ញាធរបានរឹតបន្តឹងនៅភូមិត្រពាំងអញ្ចាញ សង្កាត់ត្រពាំងក្សាំងមុន ដោយសារតែកាលពីថ្ងៃទី២០ ខែកុម្ភៈ ឆ្នាំ២០២១ កន្លងមកនេះមានពិធី មង្គលការមួយនៅទីនេះ ហើយក្នុងចំណោមភ្ញៀវដែលបានចូលរួមនៅក្នុងពិធីនេះគឺមានអ្នកផ្ទុកជម្ងឺCOVID-19 ។ បន្ទាប់មកនៅថ្ងៃបន្ទាប់អាជ្ញាធរបានចាប់ផ្ដើមរឹតបន្តឹងហើយក្រុមការងារពាក់ព័ន្ធបានចុះធ្វើការយកសំណាកម្ចាស់ដើមការទាំងគ្រួសារខាងប្រុសនិងខាងស្រីចំនួន១៥នាក់ ព្រមទាំងបានឲ្យពួកគាត់ធ្វើចត្តាឡីស័កនៅផ្ទះរយៈពេល១៤ថ្ងៃ ហើយមង្គលការមានបងប្អូនប្រជាពលរដ្ឋចូលរួមដូច្នេះហើយទើបគិតថាវាមានហានិភ័យ។
តាមប្រភពដដែលបានបន្តទៀតថា រហូតមកដល់ទី២៥ ខែកុម្ភៈ នេះតំបន់នោះនៅតែត្រូវបានរឹតបន្តឹងដដែល ហើយអាជ្ញាធរបានរកឃើញតំបន់សង្ស័យថ្មីមួយទៀតគឺនៅប្លុកផ្ទះជួលនៅក្នុងភូមិជង្រុក សង្កាត់ត្រពាំងក្រសាំងខណ្ឌពោធ័សែនជ័យ ។ ដោយសង្ស័យទៅលើមនុស្ស២នាក់ក្នុងនោះម្នាក់អាយុ២១ឆ្នាំ និងម្នាក់ទៀតអាយុ២៧ឆ្នាំ ដែលមានការពាក់ព័ន្ធជាមួយព្រឹត្តិការណ៍សហគមន៍២០កុម្ភៈនៅកោះពេជ្រ ។ បន្ទាប់មកអាជ្ញាធរខណ្ឌដឹកនាំដោយលោកអភិបាលខណ្ឌហែម ដារិទ្ធិ សហការណ៍ជាមួយមន្ទីរសុខាភិបាលរាជធានីភ្នំពេញបានចុះទៅកាន់ទីនោះ រួចបានបញ្ជូនអ្នកទាំង២ទៅកាន់មណ្ឌលចត្តាឡីស័ក។
តាមប្រភពដដែលបានបន្តទៀតថា ក្រៅពីមនុស្ស២នាក់ខាងលើ វេលារសៀលថ្ងៃដដែលក្រុមការងារបានចុះយកសំណាកមនុស្សដែលស្ថិតនៅជុំវិញនោះសរុបចំនួន ៦០នាក់ចំនួន០៥ផ្ទះ ហើយក្នុងចំណោមនេះមាន១១នាក់បានប៉ះពាល់ដោយផ្ទាល់ជាមួយអ្នកទាំង២នាក់ខាងលើ ហើយចំពោះទីតាំងសង្ស័យខាងលើត្រូវបានបិទទាំងស្រុងមិនឲ្យមានការចេញចូលឡើយ ។
ទន្ទឹមនិងនេះក៏សូមបញ្ជាក់ផងដែរថា ចំពោះភូមិទាំង២ខាងលើគឺភូមិត្រពាំងអងញ្ចាញដែលកាលពីមុនហៅថាសហគមន៍ត្រពាំងអញ្ចាញនោះនិងភូមិជង្រុក មិនត្រូវបានបិទមិនឲ្យចេញចូលទាំងនោះទេ គឺបិទតែទីតាំងដែលមានការសង្ស័យតែប៉ុណ្ណោះ ចំណែកច្រកចូលភូមិបើកឲ្យដំណើរការជាធម្មតា ប៉ុន្តែអ្នកឆ្លងកាត់ត្រូវតែពាក់ម៉ាស់ បាញ់អាល់កុលលាងដៃនិយាយរួមអនុវត្តឲ្យបានខ្ជាប់ខ្ជួននូវគោលការណ៍របស់ក្រសួងសុខាភិបាលទើបអាចចេញចូលបាន៕
ចែករំលែកព័តមាននេះ