ខេត្តបាត់ដំបង ៖ ប្រជាពលរដ្ឋនៅស្រុកមោងប្ញស្សីមួយចំនួន ដែលប្រឈមនឹងការខ្វះខាតទឹកប្រើប្រាស់អស់ជិត១សប្ដាហ៍កន្លងទៅ ពេលនេះពួកគាត់ទទួលបានទឹកប្រើប្រាស់វិញជាបណ្ដើរៗហើយ ក្រោយពីអាជ្ញាធរស្រុក ស្នើសុំអន្តរាគមន៍ពីថ្នាក់លើ បើកទឹកពីអាងទឹកព្រែកជីក ដែលស្ថិតនៅប៉ែកខាងលើ។ នេះបើតាមតាមមន្ត្រីសាលាស្រុកមោងប្ញស្សី…
ខេត្តបាត់ដំបង ៖ ប្រជាពលរដ្ឋនៅស្រុកមោងប្ញស្សីមួយចំនួន ដែលប្រឈមនឹងការខ្វះខាតទឹកប្រើប្រាស់អស់ជិត១សប្ដាហ៍កន្លងទៅ ពេលនេះពួកគាត់ទទួលបានទឹកប្រើប្រាស់វិញជាបណ្ដើរៗហើយ ក្រោយពីអាជ្ញាធរស្រុក ស្នើសុំអន្តរាគមន៍ពីថ្នាក់លើ បើកទឹកពីអាងទឹកព្រែកជីក ដែលស្ថិតនៅប៉ែកខាងលើ។ នេះបើតាមតាមមន្ត្រីសាលាស្រុកមោងប្ញស្សី បញ្ជាក់ប្រាប់កោះសន្តិភាព នៅព្រឹកថ្ងៃទី២២ កុម្ភៈ ។
អភិបាលរងស្រុកមោងប្ញស្សី លោក បឿន សុវណ្ណ បានប្រាប់ថា ពលរដ្ខរស់នៅស្រុកមោងប្ញស្សីមួយចំនួនធំបានប្រឈមនឹងបញ្ហាខ្វះទឹកប្រើប្រាស់យ៉ាងខ្លាំង កាលពីជិត១សប្ដាហ៍កន្លងទៅនេះ ដោយសារតែប្រភពទឹកនៅតាមដងស្ទឹងរីងស្ងួត ។ ប៉ុន្តែនៅព្រឹកថ្ងៃទី២២ កុម្ភៈ នេះ ដោយសារមានការអន្តរាគមន៍ពីថ្នាក់លើ ក្រោយពីអាជ្ញាធរស្រុកបានស្នើសុំ ទើបលោកអភិបាលខេត្ត រួមទាំងមន្ទីរជំនាញផង បានអនុញាតឲ្យលោកអភិបាលស្រុកមោងប្ញស្សី ដឹកនាំកម្លាំងចុះទៅបើកទឹកពី «អាងព្រែកជីក» បង្ហូរចុះតាមដងស្ទឹងមោង ដើម្បីជួយសង្គ្រោះពលរដ្ឋដែលខ្វះទឹកប្រើប្រាស់ ។
បើតាមប្រភពពីប្រជាពលរដ្ឋបានឲ្យដឹងថា ការរង់ចាំប្រើប្រាស់ប្រព័ន្ធទឹកស្អាត មិនអាចតម្រូវការប្រើប្រាសរបស់ពលរដ្ឋរាប់រយគ្រួសារបានទេ។ ដូច្នេះ ពលរដ្ខចាំបាច់ត្រូវប្រើប្រាស់ទឹកនៅតាមដងស្ទឹង តែដោយសារភាពរាំងស្ងួតនារដូវប្រាំង បានធ្វើឲ្យទឹកស្ទឹងរីងស្ងួតអស់ទាំងស្រុងតែម្ដង។ ប្រជាពលរដ្ឋបាននិយាយថា កាលពីប៉ុន្មានថ្ងៃមុននេះ កុំថាឡើយទឹកសម្រាប់ស្រោចស្រពដំណាំ សូម្បីតែទឹកសម្រាប់មនុស្សប្រើប្រាស់ក៏គ្មានដែរ រីឯប្រព័ន្ធទឹកស្អាតនៅទីប្រជុំជនក៏មិនគ្រប់តម្រូវការដែរ។ ប៉ុន្តែនៅព្រឹកថ្ងៃទី២២ កុម្ភៈ នេះពលរដ្ឋបានទទូលទឹកប្រើប្រាស់វិញជាបណ្ដើរៗហើយ ក្រោយពីអជ្ញាធរស្រុក បើកពី«អាងព្រែកជីក» បង្ហូរធ្លាក់មកតាមដងស្ទឹងមោងប្ញស្សី។
លោក បឿន សុវណ្ណ អភិបាលរងស្រុកមោងប្ញស្សី បានបញ្ជាក់ថា បញ្ហាប្រឈមខ្លាំងជិត១សប្ដាហ៍កន្លងទៅនេះ គឺទឹកសម្រាប់មនុស្សប្រើប្រាស់ រីឯទឹកសម្រាប់ស្រោចស្របដំណាំហាក់មិនធ្ងន់ធ្ងរទេ ព្រោះដំណាំអាចពន្យាពេលបាន តែសម្រាប់មនុស្ស គឺ ត្រូវការទឹកជាចាំបាច់តែម្ដង ។ ប៉ុន្តែយ៉ាងណា ពេលនេះ ពលរដ្ឋអាចមានទឹកប្រើប្រាស់វិញហើយ បន្ទាប់ពីអាជ្ញាធរស្រុក ខេត្ត អនុញ្ញាតឲ្យបើកបង្ហូរទឹកពី«អាងព្រែកជីក» ដែលស្ថិតនៅប៉ែកខាងលើ នៃស្រុករុក្ខគិរី ៕
ចែករំលែកព័តមាននេះ