ខេត្តកំពត ៖ បើតាមសេចក្តីរាយការណ៍បានឱ្យដឹងថា បុរសម្នាក់ត្រូវបានជនមិនស្គាល់អត្តសញ្ញាណដឹកមកទម្លាក់ចោលក្នុងវត្តគីរីបុប្ផារំពើន បង្កឱ្យមានការភ្ញាក់ផ្អើលកាលពីព្រឹកព្រលឹមថ្ងៃទី១៤ ខែកុម្ភៈ ឆ្នាំ២០២១ ស្ថិតក្នុងឃុំស្ដេចគង់ខាងលិច ស្រុកបន្ទាយមាស ខេត្តកំពត…
ខេត្តកំពត ៖ បើតាមសេចក្តីរាយការណ៍បានឱ្យដឹងថា បុរសម្នាក់ត្រូវបានជនមិនស្គាល់អត្តសញ្ញាណដឹកមកទម្លាក់ចោលក្នុងវត្តគីរីបុប្ផារំពើន បង្កឱ្យមានការភ្ញាក់ផ្អើលកាលពីព្រឹកព្រលឹមថ្ងៃទី១៤ ខែកុម្ភៈ ឆ្នាំ២០២១ ស្ថិតក្នុងឃុំស្ដេចគង់ខាងលិច ស្រុកបន្ទាយមាស ខេត្តកំពត ។
សេចក្តីរាយការណ៍បន្តថា មុនពេលផ្អើលឆោឡោ គឺមានព្រះសង្ឃក្នុងវត្តបាននិមន្តចេញមកស្រោចទឹកផ្កា ក៏ស្រាប់តែប្រទះឃើញសពជនរងគ្រោះតែម្ដង។ ក្នុងពេលនោះផងដែរ នគរបាលខេត្តកំពត និងនគរបាលស្រុកបន្ទាយមាស រួមទាំងកម្លាំងកងរាជអាវុធហត្ថស្រុក បានចុះមកពិនិត្យមើលសពជនរងគ្រោះដែលត្រូវជនមិនស្គាល់មុខដឹកមកទម្លាក់ចោលនៅសាលាកុដិថ្មមួយ ក្នុងវត្តគីរីបុប្ភារំពើននេះផងដែរ។
ទោះបីជាបែបណា ជនរងគ្រោះខាងលើត្រូវបានគេស្គាល់ថា មានឈ្មោះផែ សំណាង អាយុ៣២ឆ្នាំ មានប្រពន្ធឈ្មោះ នាក់ រ៉ន អាយុ៣១ឆ្នាំ និងមានកូនប្រុសស្រីចំនួន២នាក់នៅភូមិចង្កៀង ឃុំទទុង ស្រុកដងទង ខេត្តកំពត ។ ប៉ុន្តែជនរងគ្រោះខាងលើធ្លាប់បានមកធ្វើការឱ្យក្រុមហ៊ុនរោងចក្រស៊ីម៉ង់មួយកន្លែង ចំណែកឯប្រពន្ធជនរងគ្រោះវិញក៏បានធ្វើការនៅក្រុមហ៊ុនរោងចក្រស៊ីម៉ង់ត៍ក្នុងខេត្តកំពតផងដែរ គ្រាន់តែក្រុមហ៊ុនផ្សេងពីគ្នា។
បើយោងតាមការអះអាងពីឪពុកជនរងគ្រោះបាននិយាយថា ទាំង២នាក់ប្ដីប្រពន្ធនេះ បានកើតជម្លោះគ្នាជាច្រើនដងមកហើយ ពួកគេទាំង២នាក់មិនបានរស់នៅជុំគ្នាទេ គឺជួលផ្ទះស្នាក់នៅភូមិព្រៃតាព្រឹត ឃុំស្ដេចគង់ខាងលិច ស្រុកបន្ទាយមាស លុះពេលដឹងថា ប្ដីបានបាត់បង់ជីវិត ទើបនាងជាប្រពន្ធមកដល់កន្លែងសពប្ដីដែរ ប៉ុន្តែប្រពន្ធមិនបានសំរក់ទឹកភ្នែកស្ដាយស្រណោះប្ដីនោះឡើយ។
បើតាមស្ត្រីម្នាក់ដែលអះអាងថាត្រូវជាបងថ្លៃជនរងគ្រោះបានប្រាប់ឱ្យដឹងថា កាលពីវេលាម៉ោង១យប់រំលងអធ្រាត្រឈានចូលដល់ថ្ងៃទី១៤ ខែកុម្ភៈ មានមនុស្សម្នាក់បានទូរស័ព្ទប្រាប់ថា សំណាង បាត់បង់ជីវិតហើយ មកយកសពផង គេទុកនៅក្នុងវត្ត ។ ចាប់តាំងពីបានឮដំណឹងនោះមក ម្នាក់ៗគ្មានអ្នកណាបានដេកនោះទេ លុះដល់ព្រឹកឡើងទើបនាំគ្នាមកវត្តរំពើន ក៏ឃើញសពដូចគេប្រាប់មែន ហើយទូរស័ព្ទដែលគេប្រាប់ដំណឹងនោះ ត្រូវបានបិតរហូតតែម្តង ។
លោកវរសេនីយ៍ទោ ឈឹម ឈាង ប្រធានការិយាល័យកម្រិតធ្ងន់ខេត្តកំពត បានចុះមកដល់កន្លែងដើម្បីពិនិត្យសពជនរងគ្រោះ ប៉ុន្តែលោកមិនទាន់សន្និដ្ឋានករណីខាងលើនេះបែបណានោះទេ។
ចំណែកលោកវរសេនីយ៍ សុខ សាកាន ប្រធានការិយាល័យបច្ចេកទេស និងវិទ្យាសាស្ត្រខេត្តកំពត បាននិយាយប្រាប់ឱ្យដឹងថា តាមការធ្វើកោសល្យវិច្ច័យទៅលើសាកសពជនរងគ្រោះនោះ គឺពិនិត្យឃើញថា ជនរងគ្រោះមានស្នាមពកក្បាល៣កន្លែងផ្សេងៗគ្នា ហើយមានខ្សែអង្រឹងចងជាប់នៅនឹង.កផងដែរ។
លោកវរសេនីយ៍ទោ សុខ សាកាន ប្រាប់បន្តថា ការយកខ្សែអង្រឹងមកចងភ្ជាប់នឹង.កនេះ គ្រាន់តែជាឈុតឆាតមួយទេ ព្រោះមនុស្សជាទូទៅត្រូវបានគេនិយាយថា ជារឿង.ឃា.ត.ក.ម្ម.។ ទោះជាមានករណីបែបនេះក្ដី នគរបាលបានហៅស្ត្រីជាប្រពន្ធជនរងគ្រោះទៅសួរនាំលំអិតបន្តទៀត និងមនុស្សផ្សេងទៀតដែលជាប់ពាក់ព័ន្ធ ។
បច្ចុប្បន្ននេះ នគរបាលកំពុងតែស្រាវជ្រាវបន្តហើយ ចំណែកសពជនរងគ្រោះត្រូវក្រុមសាច់ញាតិមានគំរោងដឹកយកទៅធ្វើបុណ្យតាមប្រពៃណីនៅឯស្រុកកំណើតក្នុងភូមិត្រពាំងត្រែង ឃុំខ្វាវ ស្រុកសំរោង ខេត្តតាកែវ។
ចែករំលែកព័តមាននេះ