រាជធានីភ្នំពេញ ៖ យោងតាមនាយកដ្ឋានព័ត៌មានវិទ្យាបានឱ្យដឹងថា ដោយសារភាពសម្បូរបែបនៃបច្ចេកវិទ្យា និងសេវាអុីនធឺណេត បានជម្រុញការប្រើប្រាស់ពាសពេញប្រទេស មិនថាទីប្រជុំជន ឬជនបទ។ លើសពីនេះ យើងក៏សង្កេតឃើញថា កុមារតូចៗ និងយុវវ័យ កំពុងតែប្រើប្រាស់ប្រាស់ឧបករណ៍បច្ចេកវិទ្យា (ទូរស័ព្ទ កុំព្យូទ័រ ថេប្លេត។ល។) និងសេវាអុីនធឺណេត យ៉ាងទូលំទូលាយផងដែរ។
![](https://kohsantepheapdaily.com.kh/wp-content/images/2021/02/165620199807525079493715c4510bc5-1024x865.jpg)
ដើម្បីជាទស្សនាទានជូនដល់ពុកម៉ែបងប្អូន ក្នុងការបង្កើនសុវត្ថិភាពជូនកូនៗ ជាទីស្រឡាញ់ ពីហានិភ័យនានាលើបណ្តាញអ៊ីនធឺណេត ក្រុមការងារសូមលើកយកវិធីសាស្ត្រចំនួន៦ ដើម្បីគាំពារកូនៗ ដូចមានរៀបរាប់ ជូនខាងក្រោម ៖
![](https://kohsantepheapdaily.com.kh/wp-content/images/2021/02/c1462ddaa08a9e2c2460163c5c30d55d.jpg)
១- បញ្ជ្រាបចំណេះដឹងស្តីពីហានិភ័យបច្ចេកវិទ្យានានាដល់កូនៗ តាមរយៈការណែនាំ ឬដំឡើងកម្មវិធីហ្គេមល្បងប្រាជ្ញា ឬកម្មវិធីផ្តល់ចំណេះដឹងលើកជាឧទាហរណ៍អំពីមេរោគកុំព្យូទ័រ ការយាយីលើបណ្តាញអ៊ីធឺណេត និងសុជីវធម៌ក្នុងការប្រើប្រាស់ប្រព័ន្ធបច្ចេកវិទ្យាអ៊ីនធឺណេត ឬបណ្តាញសង្គមជាដើម។
![](https://kohsantepheapdaily.com.kh/wp-content/images/2021/02/b725a9fc107066cd6050e51de2d42e89-1024x666.jpg)
២- គាំពារព័ត៌មានអត្តសញ្ញាណកូនៗ (ឧទាហរណ៍ ៖ ឈ្មោះ ថ្ងៃខែឆ្នាំកំណើត អាសយដ្ឋានស្នាក់នៅ ទីតាំង ឬលេខទូរស័ព្ទ។ល។) ពីការចែករំលែក ឬបង្ហោះលើបណ្តាញអ៊ីនធឺណេត ពិសេសក្នុងបណ្តាញទំនាក់ទំនងសង្គមជាដើម។
៣- ដំឡើងកម្មវិធីកម្ចាត់មេរោគ កម្មវិធីសុវត្ថិភាព និងធ្វើបច្ចុប្បន្នភាពឧបករណ៍បច្ចេកវិទ្យា ដែលកូនៗកំពុងប្រើប្រាស់ ដើម្បីការពារពីការចម្លងមេរោគ ឬជ្រៀតចូលពីសំណាក់ឧក្រិដ្ឋជនបច្ចេកវិទ្យា។
![](https://kohsantepheapdaily.com.kh/wp-content/images/2021/02/2bc8e2f40db7f121b581c2abbdb5e337-1024x768.png)
៤- ណែនាំកូនៗ ឲ្យប្រើប្រាស់លេខសម្ងាត់ពិបាកទាយ ដើម្បីការពារគណនីកម្មវិធីអ៊ីនធឺណេតរបស់ពួកគេ។
៥- ធ្វើការត្រួតពិនិត្យសកម្មភាពលើបណ្តាញអុីនធឺណេតរបស់កូនៗ ជាប្រចាំ (ឧទាហរណ៍៖ សកម្មភាពលើបណ្តាញទំនាក់ទំនងសង្គម សកម្មភាពក្នុងកុំព្យូទ័រ ឬទូរស័ព្ទ ជាដើម)។
![](https://kohsantepheapdaily.com.kh/wp-content/images/2021/02/827336bdf7e5e1f14d70b08e762eae1c-1024x768.jpg)
៦- ធ្វើការលើកទឹកចិត្ត និងផ្តល់ការប្រឹក្សាដល់កូនៗ នៅពេលដែលពួកគាត់ជួបបញ្ហាផ្សេងៗ លើបណ្តាញអ៊ីនធឺណេត៕ ដោយ ៖ ស្រី គំនិត
ចែករំលែកព័តមាននេះ