រាជធានីភ្នំពេញ ៖ កូនប្រុសពៅរបស់កំពូលតារាចម្រៀងលោក ព្រាប សុវត្ថិ គឺលោកសុវត្ថិ សិរីវុឌ្ឍ បានប្រកាសចែកផ្លូវជាមួយផលិតកម្មរស្មីហង្សមាសហើយ បន្ទាប់ពីបានជ្រកកោន និងសាងកេរ្តិ៍ឈ្មោះក្នុងអាជីពជាតារាចម្រៀងនៅក្នុងផលិតកម្មដ៏ធំមួយនេះអស់រយៈពេលជាង២ឆ្នាំមកនេះ។
ការចាកចេញពីផលិតកម្មរស្មីហង្សមាស ពីលោកសុវត្ថិ សិរីវុឌ្ឍ បានធ្វើឡើងក្រោយពីឪពុករបស់លោកគឺលោក ព្រាប សុវត្ថិ ដែលបានចែកផ្លូវគ្នាជាមួយផលិតកម្មដែលធ្លាប់ជ្រកកោនអស់ជាច្រើនឆ្នាំខាងលើនេះដូចគ្នា ដោយសម្រេចមកជ្រកទ្រនំថ្មី ។
តារាចម្រៀងលោកសុវត្ថិ សិរីវុឌ្ឍ បានបញ្ជាក់ពីការចាកចេញរបស់លោកតាមតាមរយៈវីដេអូឃ្លីបខ្លីដែលលោកបានបង្ហោះចូលក្នុងគណនេយ្យអ៊ីនស្ត្រាក្រាមរបស់លោកកាលពីពេលថ្មីៗនេះ ដែលការប្រកាសនេះ បានធ្វើឲ្យទស្សនិកជនគាំទ្រមានការភ្ញាក់ផ្អើលយ៉ាងខ្លាំង។
លោកសុវត្ថិ សិរីវុឌ្ឍ បានអះអាងថា «ខ្ញុំបានឈប់ពីរស្មីហង្សមាសហើយ ហើយខ្ញុំក៏មានបទចម្រៀងថ្មីៗត្រៀមចេញនៅលើ Youtube និងនៅក្នុង Chanel របស់ខ្ញុំផ្ទាល់ដែលមានឈ្មោះថា សុវត្ថិ សិរីវុឌ្ឍ។ ដូច្នេះសូមអ៊ំប្រុស អ៊ំស្រី និងពុកម៉ែ បងប្អូនចូលទស្សនាឲ្យបានច្រើន ដើម្បីគាំទ្របទចម្រៀងដែលជាស្នាដៃនិពន្ធដោយខ្ញុំបាទផ្ទាល់»។
ជាការកត់សម្គាល់ បើតាមការអះអាងពីលោកសុវត្ថិ សិរីវុឌ្ឍ ខាងលើនេះបញ្ជាក់ថា ការចាកចេញរបស់លោកពីផលិតកម្មរស្មីហង្សមាសដូចជាឪពុករបស់លោក តាមការសន្និដ្ឋានពីមជ្ឈដ្ឋានខាងក្រៅនោះ គឺមិនទាន់ក្លាយជារឿងពិតនោះឡើយ។ ជាងនេះទៅទៀត ការសម្រេចចិត្តចាកចេញពីផលិតកម្មរស្មីហង្សមាស ហើយមកបង្កើតជា Chanel Youtube ពីសុវត្ថិ សិរីវុឌ្ឍ ទំនងជាលោកចង់វិវឌ្ឍន៍ខ្លួនធ្វើជាតារាចម្រៀងឯករាជ្យ មិនចំណុះផលិតកម្មណាមួយ ដូចទៅនឹងតារាចម្រៀងផ្សេងៗទៀតដែលកំពុងតែធ្វើដូចគ្នា។
ទោះជាយ៉ាងណា ក្នុងពេលដែលកូនប្រុសពៅរបស់លោក ព្រាប សុវត្ថិ បានប្រកាសដើរចេញពីផលិតកម្មរស្មីហង្សមាស នាពេលនេះ គេក៏នៅមិនទាន់អាចដឹងបាននៅឡើយទេថា កូនប្រុសរបស់លោកពីរនាក់ទៀតដែលកំពុងផ្ញើខ្លួននៅក្នុងផលិតកម្មខាងលើនេះដែរ អាចនឹងសម្រេចចិត្តចាកចេញដូចគ្នាឬយ៉ាងណានោះឡើយ? ប៉ុន្តែអ្វីដែលគេកំពុងតែដាក់ការតាមដាននោះថា តើកូនប្រុសទាំង៣របស់លោក ព្រាប សុវត្ថិ អាចនឹងចាកចេញពីផលិតកម្មរស្មីហង្សមាសទាំងអស់ដូចជារូបលោកដែរឬយ៉ាងណា? ក្នុងពេលមួយរយៈចុងក្រោយនេះផលិតកម្មកូនពៅគេនេះ កំពុងដាក់យុទ្ធសាស្ត្រទាញយកតារាចម្រៀងថ្មីៗបន្ថែម ដើម្បីបំបែកទីផ្សារបទចម្រៀង។
យ៉ាងណា ពាក់ព័ន្ធបញ្ហាខាងលើនេះ កោះសន្តិភាព នៅមិនទាន់អាចស្វែងរកការបកស្រាយបំភ្លឺពីកំពូលតារាចម្រៀងលោក ព្រាប សុវត្ថិ និងលោក សុវត្ថិ សិរីវុឌ្ឍ ឡើយ គិតត្រឹមថ្ងៃទី៨ ខែកុម្ភៈ ឆ្នាំ២០២១នេះ។
គួរបញ្ជាក់ថា កូនប្រុសទាំង៣នាក់របស់លោកព្រាប សុវត្ថិ គឺលោកសុវត្ថិ មុនីវណ្ណ, លោកសុវត្ថិ មុន្នីនាគ និងលោកសុវត្ថិ សេរីវុឌ្ឍ បានធ្វើឱ្យទស្សនិកជនចាប់អារម្មណ៍យ៉ាងខ្លាំង ដោយសារតែរូបរាងរបស់ពួកគេស្រស់សង្ហារ ជាពិសេសក្លាយជាតារាចម្រៀងសម្រាប់យុវវ័យសម័យថ្មី ។
ពួកគេ ទើបតែត្រូវផលិតកម្មរស្មីហង្សមាស ប្រកាសជាតារាចម្រៀងប្រចាំផលិតកម្មកាលពីដើមខែមករា ឆ្នាំ២០១៨ ប៉ុណ្ណោះ កេរ្តិ៍ឈ្មោះពួកគេទាំងបីបានរីកលូតលាស់យ៉ាងលឿនតាមការចេញបទចម្រៀងថ្មីៗ ជាមួយនឹងការក្បាច់រាំប្លែកៗ និងស្ទាយតុបតែងខ្លួនយ៉ាងទាក់ទាញដូចទៅនឹងតារាចម្រៀង KPOP របស់ប្រទេសកូរ៉េ ៕
ចែករំលែកព័តមាននេះ