ខេត្តកំពង់ស្ពឺ ៖ បន្ទាប់ពីមានករណីអារ.កផ្តាច់ជីវិតស្ត្រីចាំចំការស្វាយម្នាក់ ហើយសមត្ថកិច្ចបានប្រឹងប្រែងដុតដៃដុតជើងធ្វើការស្រាវជ្រាវរហូតឈានដល់ការឃាត់ខ្លួនបុរសជាប្តី ដើម្បីយកមកសាកសួរ។ នៅទីបំផុតជនសង្ស័យក៏បានឆ្លើយសារភាពថា «ខ្លួនពិតជាបាន ចាប់ប្រពន្ធអារ.កដោយដៃខ្លួនឯងផ្ទាល់មែន ព្រោះតែខឹងប្រពន្ធជំពាក់លុយធនាគារច្រើនស្ថាប័នដោយមិនឱ្យខ្លួនដឹង»។
បើតាមប្រភពពីសមត្ថកិច្ចបានឲ្យដឹងថា កាលពីវេលាម៉ោង៩ព្រឹក ថ្ងៃទី៣ ខែកុម្ភៈ ឆ្នាំ២០២១ សមត្ថកិច្ចបានចុះស្រាវជ្រាវលើករណីឃា.ត.កម្មមួយករណី ដែលបានកើតឡើងកាលពីវេលាម៉ោង៨និង៤០នាទីព្រឹក ថ្ងៃទី១ ខែកុម្ភ: ឆ្នាំ២០២១ នៅចម្ការស្វាយរបស់ឈ្មោះ ផាន់ នី ភេទស្រី អាយុ៥៣ឆ្នាំ ស្ថិតនៅភូមិព្រៃទទឹង ឃុំក្រាំងដីវ៉ាយ ស្រុកភ្នំស្រួច។ ដែលសាកសពជនរងគ្រោះឈ្មោះ ជីម ផា ភេទស្រី អាយុ៥៥ឆ្នាំ ជាអ្នកចាំចម្ការស្វាយ នៅភូមិ-ឃុំកើតហេតុ។
សមត្ថកិច្ចបានបន្តឱ្យដឹងទៀតថា ក្រោយការស្រាវជ្រាវ នៅវេលាម៉ោង២រសៀលថ្ងៃខែដដែល បានហៅឈ្មោះ ប៊ុត ផាន ភេទប្រុស អាយុ៧០ឆ្នាំ (ត្រូវជាប្តីជនរងគ្រោះ) មកសាកសួរ។
ក្រោយការសាកសួរឈ្មោះ ប៊ុត ផាន បានឆ្លើយសារភាពថា ខ្លួនពិតជាបានធ្វើសកម្មភាពអារ.ក និងកាប់ជាច្រើនកាំបិតទៅលើប្រពន្ធរបស់ខ្លួន បណ្តាលឲ្យបាត់បង់ជីវិតពិតប្រាកដមែន។ ហើយចំពោះមូលហេតុ គឺដោយសារតែខឹងនឹងប្រពន្ធរបស់ខ្លួនជំពាក់លុយធនាគារច្រើនស្ថាប័នពេក។
លុះនៅរសៀលថ្ងៃទី5 ខែកុម្ភៈនេះ សមត្ថកិច្ចក៏បានកសាងសំណុំរឿង រួចបញ្ជូនជនសង្ស័យខាងលើទៅស្នងការដ្ឋាន ដើម្បីចាត់ការតាមនីតិវិធី និងបញ្ជូនបន្តទៅកាន់អយ្យការអមសាលាដំបូងខេត្តបន្តនីតិវិធីផងដែរ។
សូមរំលឹកថា កាលពីវេលាម៉ោង៩និង៣០នាទី ថ្ងៃទី២ ខែមករា ឆ្នាំ២០២១ កម្លាំងជំនាញខេត្ត-មូលដ្ឋានកងរាជអាវុធហត្ថស្រុកភ្នំស្រួច បានសហការជាមួយកម្លាំងជំនាញកោសល្យវិច្ច័យ មន្ទីរសុខាភិបាលខេត្ត បានចុះត្រួតពិនិត្យសាកសពជនរងគ្រោះឈ្មោ ជឹម ផា ភេទស្រី អាយុ៥៥ឆ្នាំ មានទីលំនៅភូមិព្រៃទទឹង ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ មុខរបរចាំចំការ ជាមួយប្តីឈ្មោះ ប៊ុត ផាន អាយុ៦៨ឆ្នាំ ចំណែកម្ចាស់ចំការឈ្មោះ ឡេង ចាន់ថានី ភេទស្រី រស់នៅភ្នំពេញ ។ ហេតុការណ៍នេះបានកើតឡើងនៅចំណុចអូចោត ស្ថិតនៅភូមិដូង ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ ។
សូមរំលឹកទៀតថា មុនកើតហេតុ នៅម៉ោង៣និង៣០នាទីរសៀលថ្ងៃទី១ ខែមករា បុរសជាប្តីបានចេញពីចំការទៅធ្វើទ្វាររបងផ្ទះឱ្យកូននៅភូមិព្រៃទទឹង លុះវេលាម៉ោង៥និង៣០នាទីល្ងាចក៏វិលមកចំការវិញ តែមិនឃើញប្រពន្ធនៅផ្ទះ ក៏ត្រឡប់មករកនៅផ្ទះបងប្អូនក្នុងភូមិនៅតែមិនឃើញ និងទូរស័ព្ទចូលតែគ្មានអ្នកទទួល រួចក៏ត្រឡប់មកកន្លែងចាំចំការវិញ ក៏ស្រាប់តែឃើញសាកសពប្រពន្ធដេកខាងជើងរោងចាំចំការចម្ងាយ២០ម៉ែត្រតែម្តង។
គួររំលឹកទៀតថា ៖ តើនរណាទៅដៃដល់អ្វីម្ល៉េះ? ផ្តាច់ជីវិតស្ត្រីម្នាក់ក្នុងថ្លុកឈាមនៅចំការស្វាយ៕
ចែករំលែកព័តមាននេះ