វង្ស ណ​យ ចាប់ផ្ដើម​នឹក​សង្វៀន​វិញ​ហើយ​! – Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

វង្ស ណ​យ ចាប់ផ្ដើម​នឹក​សង្វៀន​វិញ​ហើយ​!

2 ខែ មុន
  • Phnom Penh

រាជធានី​ភ្នំពេញ ៖ ខុស​ពី​ជំហរ​ពី​ពេល​មុន​ដែល​ប្រកាស​ថា ឈប់​ឡើង​រេញ តែ​កីឡាករ វង្ស ណ​យ នៅ​ក្នុង​ពេល​នេះ បែរជា​ប្រកាស​ថា​មាន​អារម្មណ៍​នឹក​សង្វៀន​វិញ​ហើយ ។…

រាជធានី​ភ្នំពេញ ៖ ខុស​ពី​ជំហរ​ពី​ពេល​មុន​ដែល​ប្រកាស​ថា ឈប់​ឡើង​រេញ តែ​កីឡាករ វង្ស ណ​យ នៅ​ក្នុង​ពេល​នេះ បែរជា​ប្រកាស​ថា​មាន​អារម្មណ៍​នឹក​សង្វៀន​វិញ​ហើយ ។ លោក​បាន​ទាំង​បង្ហាញ​តម្រុយ​ចង់​ឡើង​ប្រកួត​ជាមួយ​កីឡាករ​បរទេស ក្រោយ​ពេល​ព្រំដែន​ខ្មែរ​-​ថៃ អនុញ្ញាត​ឱ្យ​មានការ​ឆ្លងកាត់​គ្នា​នោះ​ផង​ដែរ​។

គ្មាន​អ្នក​ណា​មិនដឹង​នោះ​ទេ​ថា កីឡាករ វង្ស ណ​យ បាន​ប្រកាស​ឈប់​ប្រកួត ដោយសារ​តែ​អន់​ចិត្ត​រឿង​ពេល​ប្រកួត​ចាញ់​ត្រូវ​អ្នកគាំទ្រ​រិះគន់ ស្រប​ពេល​ដែល​លោក​ក៏​ប្រកាស​ថា​ប្រដាល់​យូរ​ហើយ​នៅ​តែ​មាន​ជីវភាព​មិន​ធូរធារ​។ លោក​បាន​ងាក​ទៅ​លក់​ងៀត​គោ ងៀត​ក្របី ដោយ​មុខរបរ​ថ្មី​នេះ ដ្បិតថា​មើលទៅ​បែប​សាមញ្ញ តែ​លុយ​ចូល​កប់ ។ ប៉ុន្តែ​ក្រោយ​ពេល​លាឈប់​ពី​ការ​ប្រដាល់​ស្រាប់តែ​ក្នុង​ពេល​នេះ លោក​បង្ហាញ​ជំហរ​ចង់​ឡើង​ប្រដាល់​ជា​ថ្មី​។ កីឡាករ វង្ស ណ​យ និយាយ​ថា សម្រាប់​ការ​ប្រដាល់​លោក​ចាប់ផ្ដើម​មាន​អារម្មណ៍​ថា​នឹក ដោយ​ការ​នឹករលឹក​នេះ គឺ​សំដៅលើ​ការ​ប្រដាល់​ជា​លក្ខណៈ​អន្តរជាតិ​។

Picture

ការ​លើក​ឡើង​នេះ ត្រូវ​គេ​ឃើញ​លើក​ឡើងជា​រឿយ​ៗ នៅ​ក្នុង​វី​ដេ​អូ Live របស់​លោក ដោយ​លោក​ប្រកាស​ថា បន់​ឱ្យ​តែ​សង្វៀន​ប្រដាល់​គ្រប់​សង្វៀន​មានការ​ប្រដាល់​អន្តរជាតិ​វិញ​ទេ ដោយ​សារ​តែ​លោក​យល់​ថា ខាន​មើល​កីឡាករ​ខ្មែរ​ឡើង​ប្រកួត​ជាមួយ​កីឡាករ​បរទេស​យូរ​មក​ហើយ ។ ការ​លើក​ឡើង​របស់​លោក មិន​បាន​បញ្ជាក់​ថា គ្រាន់តែ​ដើម្បី​ចូលរួម​ទស្សនា ឬ​ចង់​ឡើង​រេញ​ខុស​ពី​ជំហរ​មុន​នោះ​ទេ ប៉ុន្តែ​យោង​តាម​តម្រុយ គឺ​លោក​ពិតជា​ចង់​បង្ហាញ​កម្លាំង និង​សាច់ដុំ ក្នុង​ការ​ប្រដាល់​ពិតមែន​ហើយ ។

លោក​និយាយ​ថា លោក​មិន​ទាន់​ចង់​និយាយ​ថា នឹង​ទទួល​ប្រកួត ឬ​យ៉ាងណា​នោះ​ទេ​ប៉ុន្តែ​សម្រាប់​​លោក​គឺ​ពិតជា​មិន​ឈប់​ជា​រៀង​រហូត​នោះ​ទេ ដោយ​លោក​ស្នើ​ឱ្យ​ចាំ​អ៊ុត​មើល​ក្នុង​ថ្ងៃ​ណា​មួយ និង​រង់ចាំ​ឱ្យ​ស្ថានភាព​ប្រដាល់​មាន​ភាព​ប្រសើរ​សិន​។ លោក​បន្ត​ពាក់ព័ន្ធ​នឹង​មុខរបរ​រាល់ថ្ងៃ​ថា មុខរបរ​រាល់ថ្ងៃ​កាក់កប​មិន​អន់​ទេ ដោយ​ក្នុង​ថ្ងៃ​ខ្លះ ងៀត​ក្របី​របស់​លោក​ត្រូវ​ដឹក​ខ្លួនឯង​នោះ​ផង ដើម្បី​ទទួល​បាន​ថវិកា​ថ្លៃ​ដឹក​គ្រាន់​ហូប​កាហ្វេ និង​ដើម្បី​កុំឱ្យ​អផ្សុក ។

Picture

ម្យ៉ាង​មក​ពី​លោក​យល់​ថា ស្ថានភាព​ប្រដាល់​មិនសូវ​ល្អ​ប្រសើរ ព្រោះតែ​លោក​គ្មាន​គូ​ប្រទេស​ប្រកួត​ផង និង​យល់​ថា​ស្ថានភាព​នៅ​ក្នុង​ពេល​នេះ គឺ​មាន​តែ​មុខរបរ​តាម​អន​ឡាញ ហើយ​លក់​របស់​ហូប ទើប​អាច​ចិញ្ចឹម​ឆ្នាំង​បាន​ផង ទើប​លោក​ថា លក់​ងៀត​ក្របី​ល្អ​ជាង ព្រោះ​លុយ​ចូល​រាល់ថ្ងៃ ។ ប៉ុន្តែ​គឺ​ទោះជា​មុខរបរ​កាក់កប​កម្រិត​ណា ក៏​លោក​នៅ​តែ​មិន​ចោលការ​ប្រដាល់​នោះ​ដែរ ។

លោក​ថា រាល់​ថ្ងៃនេះ លោក និង​ភរិយា បាន​ជួល​ផ្ទះ​មួយ​កន្លែង​នៅ​ម្ដុំ​ចម្ការ​ដូង ដោយ​ធ្វើ​ងៀត​ក្របី​ផង និង​ឡាយ​ដោយ​យ​ផ្ទាល់​មិន​ដែល​លោះ​ថ្ងៃ​ផង​។ លោក​បញ្ជាក់​ជា​ថ្មី​ថា​«​សម្រាប់​បងប្អូន​ដែល​ចង់​ឃើញ​ខ្ញុំ​ប្រដាល់ ចាំ​មើល​សិន ចាំ​រក​ឱកាសល្អ​សិន ហើយ​បងប្អូន​គង់តែ​ដឹង​ទេ ថា​តើ​យ៉ាងម៉េច​សម្រាប់​ការ​ប្រដាល់ ចាំ​ស្ដាប់​មេ​ស៊ីសង​សិន តែ​ឥឡូវ​សុំ​លក់​ងៀត​ក្របី​សិន ព្រោះ​រាល់ថ្ងៃ​កូ​វី​ដ​ក៏​មិន​អាច​ឱ្យ​អ្នក​ប្រដាល់​មាន​គូ​បរទេស​ឡើង​ប្រកួត​បាន​ដែរ​»​។

លោក​បន្ត​ទៀត​ថា រាល់ថ្ងៃ​បាន​មុខរបរ​ងៀត​ក្របី​ចិញ្ចឹម​ឆ្នាំង​មួយ លោក​អត់​ភ័យ​ដូច​មុន​ទៀត​ទេ ហើយ​លោក​ក៏​មិន​ខ្មាស​អ្នក​ណា​ដែរ នៅ​ពេល​អ្នកខ្លះ​និយាយ​ថា​លោក​គឺជា​កីឡាករ​ល្បីឈ្មោះ តែ​បែរជា​លក់​ងៀត​ក្របី​តាម​ហ្វេ​ស​ប៊ុ​ក និង​ដឹក​ឱ្យ​ភ្ញៀវ​ដោយ​ផ្ទាល់ បើ​ទោះជា​មុខរបរ​នេះ មិន​ចំណេញ​​ច្រើន​ក្ដី ។ លោក​លក់​ត្រឹមតែ​មួយ​គីឡូ​៦៥.០០០​រៀល​ប៉ុណ្ណោះ ខណៈ​ដែល​លោក​ប្រកាស​ថា ងៀត​ក្របី​វង្ស​ណ​យ​រាល់ថ្ងៃ គឺ​ហាល​មិន​ទាន់ ដឹក​មិន​ទាន់ និង​ទទួល​បាន​ចំណូល​ច្រើន ស្រប​ពេល​ដែល​កូ​វី​ដ​-១៩​លែង​សូវ​អំណោយផល​ដូច​មុន​សម្រាប់​រក​ប្រាក់ ។

Picture

ជាមួយនឹង​ការ​បង្ហាញ​តម្រុយ​ថា ក្រោយ​ចប់​កូ​វី​ដ​-១៩​អ្នកគាំទ្រ​នឹង​ដឹង​ថា លោក​នៅ​ប្រកួត ឬ​ឈប់​ដូច​សន្យា បាន​ធ្វើ​ឱ្យ​គេ​មើលឃើញ​ភ្លាម​ថា លោក​ទំនងជា​មិន​ឈប់​ដូច​អ្វី​ដែល​បាន​តាំងចិត្ត​មួយ​ប្រាវ​មុន​នោះ​ទេ គឺ​នឹង​នៅ​តែ​ទទួល​ប្រកួត ដោយសារ​តែ​លោក​ប្រកាស​បែប​នេះ​រាប់​ភ្លេច​មក​ហើយ ប៉ុន្តែ​ចុង​ក្រោយ នៅ​ពេល​មាន​គូ​ល្អ​ប្រកួត ហើយ​បាន​តម្លៃ​ខ្ពស់ គឺ​ទទួល​មិន​ដែល​ប្រកែក​។

គួរ​រំលឹក​ផង​ដែរ​ថា វង្ស ណ​យ ធ្លាប់​បាន​ថ្លែង​ប្រាប់​បណ្ដាញសារព័ត៌មាន​ក្នុងស្រុក​ថា លោក​ពិត
ជាលា​ឈប់​ពី​អាជីព​អ្នក​ប្រដាល់​ប្រាកដ​មែន ដោយ​លោក​លើក​ហេតុផល​ថា ដោយសារ​បញ្ហា​ការ​គាំទ្រ​នា​ពេល​ចុង​ក្រោយ​នៅ​មាន​កម្រិត និង​ទី​២ គឺ​ដោយសារ​តែ​ជ្រក់ជ្រិញ​នឹង​ការ​ជេរ​ប្រមាថ ដែល​ធ្វើ​ឲ្យ​លោក​បាក់ទឹកចិត្ត ដែល​មិន​អាច​ប្រកប​អាជីព​មួយ​នេះ​បាន​បន្ដ​ទៀត ។

អ្នកលេង​គុន​ខ្មែរ​វ័យ​៣៣​ឆ្នាំ​រូប​នេះ​បាន​ពន្យល់​ថា ការ​សម្រេចចិត្ត​របស់​លោក​គឺជា​រឿង​ច្បាស់​លាស់ ដោយសារ​តែ​លោក​គិត​ថា ការ​គាំទ្រ​គុន​ខ្មែរ​នៅ​មាន​កម្រិត គាំទ្រ​តែ​មាត់ អត់​គាំទ្រ​បែប​ជួយ​ទី​១ ហើយ​ទី​២ ពេល​លោក​វ៉ៃ​ឈ្នះ​អត់​បាន​អី​មក​វិញ​ទេ​បាន​តែ​តម្លៃ តែ​ដល់​ពេល​វ៉ៃ​ចាញ់ គឺ​រង​នូវ​ការ​ជេរ​ប្រមាថ ដែល​លោក​យល់​ថា តើ​មាន​ហេតុផល​អ្វី​ដែល​លោក​ត្រូវ​តស៊ូ​ទៀត​។

លោក​និយាយ​ថា បើ​លោក​តស៊ូ​ទៅ​មុខ ក៏​មិន​បាន​ល្អ​ជាង​ហ្នឹង​នោះ​ដែរ ទើប​លោក​យល់​ថា ដល់​ពេល​ហើយ​ដែល​ត្រូវ​ចាកចេញ ។ កីឡាករ​មាន​ប្រវត្ដិ​ឡើង​សង្វៀន​រាប់រយ​ដង​នេះ​បាន​បង្ហើប​ថា ទោះ​លាឈប់​ពី​អាជីព​កីឡាករ​មែន តែ​ខ្លួន​ក៏​មិន​ទាន់​សម្រេចចិត្ត​ថា ត្រូវ​ឈប់​ពាក់ព័ន្ធ​នឹង​វិស័យ​មួយ​នេះ​ឬ​យ៉ាងណា ពោល​គឺ​លោក​នឹង​ធ្វើការ​ពិចារណា ប្រសិនបើ​មានការ​ផ្ដល់​ឱកាស​ឲ្យ​លោក​ធ្វើ​ជាម​ន្ដ្រី​បច្ចេកទេស​ក្នុង​សហព័ន្ធ​កីឡាប្រដាល់​គុន​ខ្មែរ ។ ដោយឡែក​ពាក់ព័ន្ធ​នឹង​អនាគត​កូន​ៗ​លើ​វិ​ថី​ប្រដាល់​គុន​ខ្មែរ​វិញ លោក​បាន​សង្កត់ធ្ងន់​ថា អាស្រ័យ​ទៅ​លើ​ភាព​ជាក់ស្ដែង ។

យោង​តាម​ប្រវត្តិ កីឡាករ​ពូកែ​វាយ​កែង​នេះ បាន​ចូល​ប្រឡូក​អាជីព​ប្រដាល់​គុន​ខ្មែរ​ដំបូង​នៅ​​​ឆ្នាំ​២០០៣ បន្ទាប់​មក​លោក​បាន​សាង​កេរ្ដិ៍ឈ្មោះ​ល្បីល្បាញ​កាន់តែ​ខ្លាំង​ឡើង​ៗ រហូត​ត្រូវ​បាន​ផ្គូផ្គង​ឲ្យ​ជួប​កីឡាករ​បរទេស​ជា​បន្ដបន្ទាប់ ក្រោយ​ត្រូវ​បាន​ចាត់ទុកជា​កីឡាករ​កម្រិត A នៅ​កម្ពុជា ។

ដៃគូ​ក្នុងស្រុក​ដែល​អ្នកគាំទ្រ​ចង​ចាំ​មិន​ភ្លេច​ពេល​ប៉ះ វង្ស ណ​យ មាន​ដូច​ជា កែវ រំ​ចង់​, ឡុ​ង សុ​ភី និង​អតីត​កីឡាករ ឡៅ ស៊ី​ណាត ជាដើម ។ បច្ចុប្បន្ន​មុន​ប្រកាស​ឈប់​ឡើង​សង្វៀន លោក​ក៏​មាន​របរ​លក់​ម្ហូប​តាម Online ដើម្បី​ទ្រទ្រង់​ជីវភាព​ផង​ដែរ​។ យ៉ាងណា​ក៏​ដោយ ការ​ប្រកាស​លាឈប់​របស់​លោក​មិន​ត្រូវ​បាន​អ្នកគាំទ្រ​ទុកចិត្ត​នោះ ទេ​ខណៈ​ដែល​លោក​មិន​មាន​លំនឹង​ការងារ​ណា​មួយ​ច្បាស់លាស់​ជំនួស​ឱ្យ​ការ​ប្រដាល់​នា​ពេល​នេះ ។

ម្នាក់​ៗ​យល់​ថា វា​គឺជា​រឿង​សាំ​ហើយ ដោយសារ​តែ​លោក​ប្រកាស​បាន​តែ​ប្រកាស ប៉ុន្តែ​នៅ​ពេល​មហាជន​មានការ​ចាប់អារម្មណ៍ ហើយ​មានការ​ស្នើ​ឱ្យ​លោក​ឡើង​ប្រកួត ក៏​ឃើញ​មុខ​ឡើង​រេញ​ដដែល​ជា​ដដែល ដែល​ពិបាក​ជឿ​ថា​តើ​ការ​ប្រកាស​លើក​នេះ អាច​ទុកចិត្ត​បាន ឬ យ៉ាងណា ហើយ​​ទីបំផុត​ការ​ប្រកាស​ជា​ថ្មី បញ្ជាក់​ថា​លោក​អត់​អាច​ធ្វើ​ដូច​ការ​និយាយ​មួយ​ពេល​នោះ​ឡើយ ដ្បិតតែ​មិន​ទាន់​ពិសោធន៍​ដឹង​ថា តើ​លោក​ទទួល​ប្រកួត​ឡើង​វិញ ក្រោយ​ចប់​កូ​វី​ដ ឬ លក់​ងៀត​ក្របី ឈប់​នឹកនា​សង្វៀន​ប្រដាល់​មែនទែន ៕