តើវេទិកាជាតិអេកូទេសចរណ៍លើកទី២អាចជួយស្តារវិស័យទេសចរណ៍នៅសៀមរាបឬទេ?
ខេត្តសៀមរាប ៖ ក្រសួងទេសចរណ៍បានសម្រេចថ្ងៃ នៃការរៀបចំវេទិកាជាតិ អេកូទេសចរណ៍លើកទី២ នៅក្នុងខេត្តសៀមរាប ដែលនឹងប្រព្រឹត្តទៅនៅថ្ងៃទី ២៧-២៨ ខែ មករា…
ខេត្តសៀមរាប ៖ ក្រសួងទេសចរណ៍បានសម្រេចថ្ងៃ នៃការរៀបចំវេទិកាជាតិ អេកូទេសចរណ៍លើកទី២ នៅក្នុងខេត្តសៀមរាប ដែលនឹងប្រព្រឹត្តទៅនៅថ្ងៃទី ២៧-២៨ ខែ មករា ឆ្នាំ ២០២១ ដោយវេទិកានេះ កន្លងមកត្រូវបានផ្អាកភ្លាមៗ បន្ទាប់ពីប្រទេសកម្ពុជា មានព្រឹត្តិការណ៍សហគមន៍ ៣វិច្ឆិកា និង ២៨វិច្ឆិកា ជាហេតុធ្វើឱ្យការរៀបចំត្រូវបានលើកពេលជាបន្តបន្ទាប់។
សូមជម្រាបជូនផងដែរថា វេទិកាជាតិ អេកូទេសចរណ៍លើកទី២ រាជរដ្ឋាភិបាលបានសម្រេចប្រារព្ធនៅថ្ងៃទី ១៧-១៨ ខែ វិច្ឆកា ឆ្នាំ ២០២០ នៅក្នុងខេត្តសៀមរាប និងបានប្រគល់ភារកិច្ចជូន ឯកឧត្តម ថោង ខុន រដ្ឋមន្ត្រី ក្រសួងទេសចរណ៍ ជាតំណាងដ៏ខ្ពង់ខ្ពស់ សម្តេចតេជោនាយករដ្ឋមន្ត្រី ក្នុងពិធីបើកវេទិកា និងត្រូវបានលើកពេលភ្លាមៗ បន្ទាប់ពីព្រឹត្តិការណ៍សហគមន៍។
វេទិកាជាតិលើកទី២ គឺស្តីអំពី “ការអភិវឌ្ឍសហគមន៍ទេសចរណ៍ និងអេកូទេសចរណ៍” ដែលនឹងពិភាក្សានិងអនុម័តនាពិធីបិទវេទិកា។ កិច្ចពិភាក្សាបច្ចេកទេស នឹងផ្តោតលើប្រធានបទ ចំនួន ៣ សំខាន់ៗគឺ ៖
ទី១ ៖ ការវិវត្តន៍និងអនាគត នៃវិស័យអេកូទេសចរណ៍ និងសហគមន៍ ក្នុងបរិបទជំងឺកូវីដ១៩
ទី២ ៖ ភាពជាដៃគូបំពេញគ្នារវាងការអភិវឌ្ឍ និងការអភិរក្ស ក្នុងការជំរុញការអភិវឌ្ឍសហគមន៍ទេសចរណ៍ និងអេកូទេសចរណ៍
ទី៣ ៖ ការគាំទ្រក្របខណ្ឌគោលនយោបាយអន្តរវិស័យ និងយន្តការជម្រុញការអភិវឌ្ឍសហគមន៍។
គួរបញ្ជាក់ផងដែរថា អង្គវេទិកា រំពឹងថានឹងអាចដាក់ចេញនូវសេចក្តីថ្លែងការណ៍លើកទី ២ ស្តីពី “ការអភិវឌ្ឍសហគមន៍ទេសចរណ៍ និងអេកូទេសចរណ៍” ដើម្បីរួមគ្នាជំរុញការអភិវឌ្ឍសហគមន៍ទេសចរណ៍ និងអេកូទេសចរណ៍ឱ្យកាន់តែខ្លាំងក្លាបន្ថែមទៀត រួមចំណែកធ្វើឱ្យកម្ពុជាក្លាយជាគោលដៅទេសចរណ៍ដ៏សំបូរបែប ភាពទាក់ទាញខ្ពស់ និងប្រកបដោយគុណភាព។
ទន្ទឹមនឹងនេះ អង្គវេទិកាក៏មានរៀបចំជាពិព័រណ៍ខ្នាតតូច ស្តីពីសហគមន៍ទេសចរណ៍ និងអេកូទេសចរណ៍ ដើម្បីបង្ហាញពីផលិតផល និងសមិទ្ធផលសំខាន់ៗពាក់ព័ន្ធ នឹងការងារអភិវឌ្ឍន៍ផលិតផលទេសចរណ៍ និងអេកូទេសចរណ៍ទូទាំងប្រទេស៕
ចែករំលែកព័តមាននេះ