ខេត្តត្បូងឃ្មុំ ៖ យុទ្ធនាការក្តៅចុះបង្ក្រាបគ្រឿងញៀន ត្រូវបានគេមើលឃើញថាកំពុងត្រូវបានសមត្ថកិច្ចយកចិត្តទុកដាក់ចុះបង្ក្រាបបន្តបន្ទាប់នៅត្រើយខាងកើតទន្លេមេគង្គ ។ ជាក់ស្តែងនៅរសៀលថ្ងៃទី២៣ កក្កដា ២០១៥ ត្រង់ចំណុចភូមិជប់ទី២ ឃុំជប់ ស្រុកត្បូងឃ្មុំ ក្រោមបញ្ជារបស់លោកស្នងការនគរបាលខេត្ត ជនសង្ស័យចំនួន៥នាក់ត្រូវបានចាប់ខ្លួន ដោយដកហូតបានថ្នាំញៀនក្រាមពណ៌សចំនួន២កញ្ចប់ធំ និងប្រដាប់វេចខ្ចប់មួយចំនួន ។
លោកវរសេនីយ៍ត្រី ឡុង សារិន អធិការរងនគរបាលស្រុកត្បូងឃ្មុំបានឲ្យដឹងថា ជនសង្ស័យដែលត្រូវបានចាប់ខ្លួននោះមាន ១-ឈ្មោះ ពេញ តុលា ភេទប្រុស អាយុ២០ឆ្នាំ នៅភូមិស្លាបក្តោង ឃុំជប់ ស្រុកត្បូងឃ្មុំ, ២-ឈ្មោះ ហាក់ ម៉េងឈីវ ភេទប្រុស អាយុ១៧ឆ្នាំ នៅភូមិពោន ឃុំមង់រៀវ ស្រុកត្បូងឃ្មុំ, ៣-ឈ្មោះ ញិល វិរៈ ភេទប្រុស អាយុ១៧ឆ្នាំ នៅភូមិជប់ទី២ ឃុំជប់ ស្រុកត្បូងឃ្មុំ, ៤-ឈ្មោះ ភាព ពន្លក ភេទប្រុស អាយុ២៤ឆ្នាំ នៅភូមិទី៤ ឃុំជប់ ស្រុកត្បូងឃ្មុំ និង៥-ឈ្មោះ តាំង ធារ៉ា ភេទប្រុស អាយុ១៧ឆ្នាំ នៅភូមិលេខ៦ ឃុំជប់ ស្រុកត្បូងឃ្មុំ ។
លោកវរសេនីយ៍ត្រី ឡុង សារិន បន្តថា ដោយមានសេចក្តីរាយការណ៍ពីមូលដ្ឋានមកថា នៅផ្ទះរបស់ឈ្មោះ ឆាយ ស្រីពេជ្រ ភេទស្រី អាយុ៤៦ឆ្នាំ នៅភូមិជប់ទី២ ឃុំជប់ ស្រុកត្បូងឃ្មុំ មានឈ្មោះ តុលា កំពុងតែស្ថិតនៅទីនោះដោយកំពុងតែចែកចាយថ្នាំញៀនឲ្យទៅមនុស្សមួយក្រុមមានគ្នា២ទៅ៣នាក់ ។ ក្រោយពីបានទទួលបានព័ត៌មានបែបនេះភ្លាម លោកអធិការនគរបាលស្រុកបានសុំគោលការណ៍ពីលោកស្នងការនគរបាលខេត្ត និងមានការអនុញ្ញាតពីលោកព្រះរាជអាជ្ញាអមសាលាដំបូងខេត្តផងនោះ កម្លាំងសមត្ថកិច្ចជាច្រើនបានចុះទៅឡោមព័ទ្ធផ្ទះនោះ ព្រមទាំងបានឃាត់ជនសង្ស័យចំនួន៥នាក់ ព្រមទាំងបានរឹបអូសថ្នាំញៀនចំនួន២កញ្ចប់ធំ ។
លោកវរសេនីយ៍ត្រីបញ្ជាក់ថា រហូតមកដល់ព្រឹកថ្ងៃទី២៤ កក្កដានេះ ជនទាំង៥នាក់ត្រូវបានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់វិធានការតាមច្បាប់ និងតាមស្រាវជ្រាវចាប់បក្ខពួកមួយចំនួនទៀត ។ លោកថា តាមរយៈការចុះធ្វើរដ្ឋបាលត្រួតពិនិត្យអាវុធជាតិផ្ទុះតាមដងផ្លូវ ដែលត្រូវបានធ្វើឡើងដូចភ្លៀងរលឹមនោះចាប់បានជនចែកចាយគ្រឿងញៀន ចោរប្លន់ ចោរលួច អ្នកប្រើប្រាស់អាវុធខុសច្បាប់ជាដើមផងដែរ ៕
ចែករំលែកព័តមាននេះ