រាជធានីភ្នំពេញ ៖ ក្រសួងកសិកម្មរុក្ខាប្រមាញ់ និងនេសាទ កាលពីថ្ងៃទី ១២ខែមករា បានចេញ សេចក្តីប្រកាសកំណត់តំបន់ជំងឺផ្តាសាយបក្សីនៅក្នុងភូមិព្រែកតាច្រែង ឃុំព្រែកនរិន្ទ ស្រុកឯក ភ្នំ ខេត្តបាត់ដំបង ហើយអ្នកជំនាញខាងសត្វមានភាពជឿជាក់លើក្រសួងកសិកម្ម រុក្ខាប្រមាញ់ និងនេសាទ ក្នុងការទប់ស្កាត់ជំងឺផ្តាសាយបក្សីនៅតំបន់ខាងលើមិនឱ្យរីករាលដាលឆ្លងទៅ តំបន់ផ្សេងបាន។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានឱ្យដឹង កាលពីថ្ងៃទី ១៣ខែ មករា ឆ្នាំ ២០២១នេះថា ពេលនេះខ្ញុំកំពុងធ្វើអនាម័យ ឬធ្វើជីវៈសុវត្ថិភាពជូនប្រជាកសិករមួយ ចំនួនដែលគាត់មិនសូវមានបច្ចេកទេសក៏ដូចជាមិនសូវមានថ្នាំការពារនៅក្នុងខេត្តកណ្តាល ។ លោកបន្តថា ជំងឺផ្តាសាយបក្សីនេះ យើងជឿជាក់ថា ក្រសួងកសិកម្ម រុក្ខាប្រមាញ់ និងនេសាទ អាចទប់ស្កាត់បាន ។ វាមិនធ្ងន់ធ្ងរទេ សូម្បីតែជំងឺប៉េស្តជ្រូកអាហ្វ្រិក ក្រសួងនៅតែអាចទប់ ស្កាត់បាន ។ អ៊ីចឹងខ្ញុំជឿជាក់ថា វាមិនមានជាបញ្ហាអ្វីនោះទេ ។
ទន្ទឹមនឹងជំងឺផ្តាសាយបក្សីបានផ្ទុះឡើងនៅក្នុងតំបន់មួយនៃខេត្តបាត់ដំបង សព្វថ្ងៃនេះ គេសង្កេតឃើញថា តម្លៃក៏ដូចជាទីផ្សារមាន់ហាក់មានភាពប្រសើរឡើងជាងពេលមុនៗច្រើន ។ លោក ស្រ៊ុន ពៅ មានប្រសាសន៍ថា សព្វថ្ងៃនេះ ខ្ញុំជឿជាក់ថា បងប្អូនយើងកំពុងតែចិញ្ចឹម មាន់ ហើយប្រជាពលរដ្ឋក្នុងស្រុកកំពុងនាំគ្នាហូបសាច់មាន់ឡើងវិញ ។ សាច់មាន់សព្វថ្ងៃនេះ កំពុងមានទីផ្សារប្រសើរជាងពេលមុនច្រើន ។
តួយ៉ាងកាលពីមុនមាន់សាច់មួយគីឡូក្រាម តម្លៃជាង ៣.០០០រៀល តែមកដល់ឥឡូវឡើងដល់ជាង ៥.០០០រៀល លើសពីនេះបើមាន់ ៣សាសន៍វិញឡើងដល់ពី ៩.០០០ ទៅ ១០.០០០រៀលក្នុងមួយគីឡូក្រាម ។ ដូចនេះខ្ញុំជឿ ជាក់ថា ការផ្ទុះឡើងជំងឺផ្កាសាយបក្សីនៅក្នុងកសិដ្ឋានដែលមានមាន់ជាង ១០០០ក្បាលនេះ វាមិនមានជាលក្ខណៈទ្រង់ទ្រាយធំទេ ក៏ប៉ុន្តែការទប់ស្កាត់របស់ក្រសួង អគ្គនាយកដ្ឋានក៏ដូច ជាសមាគមកំពុងតែសហការយ៉ាងរឹងមាំក្នុងការទប់ស្កាត់នូវជំងឺផ្តាសាយបក្សីនេះ ។
ប្រធានសមាគមអ្នកចិញ្ចឹមសត្វកម្ពុជា រូមនេះសំណូមពរទៅដល់ប្រជាកសិករដែល ចិញ្ចឹមមាន់ចូលរួមធ្វើអនាម័យកន្លែងចិញ្ចឹម (ទ្រុង) ដើម្បីទប់ស្កាត់ជំងឺផ្តាសាយបក្សី ហើយ បើកាលណាអ្នកចិញ្ចឹមមាន់ខ្វះថ្នាំ សូមទាក់ទងទៅខាងសមាគមមានថ្នាំ ហើយសមាគមនឹង ចុះទៅជួយធ្វើអនាម័យទ្រុងឱ្យថែមទៀត ។
យោងតាមសេចក្តីប្រកាសរបស់ក្រសួងកសិកម្ម រុក្ខាប្រមាញ់ និងនេសាទ បានកំណត់ តំបន់ជំងឺផ្តាសាយបក្សីចំនួន ១កន្លែង នៅក្នុងភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្ត បាត់ដំបង ។
សេចក្តីប្រកាសបញ្ជាក់ថា អគ្គនាយកដ្ឋានសុខភាពសត្វ និងផលិតកម្មសត្វ ត្រូវ ចាត់វិធានការបសុព្យាបាលនៅតំបន់ផ្ទុះ ជំងឺផ្តាសាយបក្សីដែលមានចែងក្នុងប្រកា ១ នៃសេច ក្តីប្រកាសនេះ និងអនុលោមតាមមាត្រា ១៤ នៃច្បាប់ស្តីពីសុខភាពសត្វ និងផលិតកម្មសត្វ៖
១ បំផ្លាញចោលចំពោះបក្សីគ្រប់ប្រភេទក្នុងតំបន់ផ្ទុះ ជំងឺទៅតាមវិធានបច្ចេកទេសបសុពេទ្យ, ២ ផ្អាកជាបណ្តោះអាសន្នលើការទិញ ការលក់ និងការដឹកជញ្ជូនបក្សីគ្រប់ប្រភេទចូល ចេញ ឬ ឆ្លងកាត់ក្នុងរង្វង់កាំប្រវែង ៣ គីឡូម៉ែត្រ ពីចំណុចផ្ចិតនៃតំបន់ជំងឺ និងដាក់តំបន់នេះជាតំបន់ ត្រួតពិនិត្យតាមដាន, ៣ សិក្សាស្រាវជ្រាវប្រភេទជំងឺផ្តាសាយបក្សីក្នុងរយៈពេល ៣០ថ្ងៃ និង ត្រួតពិនិត្យឃ្លាំមើលចលនាបក្សីជាប្រចាំក្នុងរង្វង់ដែលមានកាំប្រវែង ១០គីឡូម៉ែត្រពីចំណុច ផ្ចិតនៃតំបន់ផ្ទុះជំងឺ ។
បើតាមសចក្តីប្រកាសដដែលសង្កត់ធ្ងន់ថា ការចិញ្ចឹម ទិញ លក់ និងដឹកជញ្ជូនបក្សីគ្រប់ ប្រភេទនៅក្នុងតំបន់ផ្ទុះជំងឺផ្តាសាយបក្សីដូចមានចែក្នុងប្រកា ១ ខាងលើត្រូវផ្អាកជាបណ្តោះ អាសន្ន ។ ការអនុញ្ញាតចិញ្ចឹម ទិញ លក់ និងដឹកជញ្ជូនបក្សីឡើងវិញ និងការរំសាយតំបន់ជំងឺ ផ្តាសាយបក្សីត្រូវកំណត់ដោយប្រកាសថ្មី ។ ជនណាប្រព្រឹត្តល្មើសនឹងត្រូវផ្តន្ទាទោសតាមច្បាប់ស្តីពីសុខភាពសត្វ និងផលិតកម្មសត្វ ៕
ចែករំលែកព័តមាននេះ