ខេត្តមណ្ឌលគិរី ៖ អ្នកសារព័ត៌មាននៅក្នុងប្រទេសកម្ពុជាចំនួនជាង ៣០នាក់ មកពី២០ ស្ថាប័ននឹងចូលរួមដំណើរទស្សនកិច្ចសារព័ត៌មាន ដែលត្រូវបានរៀបចំឡើងរួមគ្នាដោយក្រសួងបរិស្ថាន និងអង្គការ WWF ទៅកាន់ដែនជម្រកសត្វព្រៃស្រែពក នៃតំបន់ព្រៃទេសភាពខ្ពង់រាបភាគខាងកើត ក្នុងខេត្តមណ្ឌលគិរី ។
លោក សេង ទៀក នាយកអង្គការ WWF បានឲ្យដឹងថា «ដំណើរទស្សនកិច្ចនេះនឹងផ្តល់ឱកាសដល់អ្នកសារព័ត៌មាន ក្នុងការទទួលបាននូវព័ត៌មាន និងចំណេះដឹងថ្មីដែលអាចពង្រីកចក្ខុវិស័យផ្នែកព័ត៌មានសាធារណៈសម្រាប់ការចូលរួមចំណែកផ្សព្វផ្សាយអំពីសារៈសំខាន់ និងតម្លៃដ៏វិសេសវិសាលគ្មានពីរនៃតំបន់ព្រៃទេសភាពនេះដល់ប្រជាជនកម្ពុជា» ។
លោកបានបន្តទៀតថា ៖ «តាមរយៈដំណើរទស្សនកិច្ចនេះភាពជាដៃគូល្អរវាងអង្គការ WWF និងក្រសួងបរិស្ថានត្រូវបានពង្រឹងឱ្យកាន់តែប្រសើរឡើង បន្ថែមទៀតក្នុងការបន្តកិច្ចសហប្រតិបត្តិការយ៉ាងជិតស្និទ្ធក្នុងបុព្វហេតុគ្រប់គ្រងស្តារ និងការពារឱ្យបាននូវធនធានធម្មជាតិ និងសត្វព្រៃជាច្រើនប្រភេទ ដែលមានតម្លៃសម្រាប់ការអភិរក្សជាសកល ក៏ដូចជា ក្នុងការបន្តការអភិវឌ្ឍជីវភាពរស់នៅរបស់ប្រជាជនសហគមន៍មូលដ្ឋាននៅក្នុងដែនជម្រកសត្វព្រៃស្រែពក និងដែនជម្រកសត្វព្រៃភ្នំព្រេចនេះ» ។
លោកបន្ថែមថា ដែនជម្រកសត្វព្រៃស្រែពក និងដែនជម្រកសត្វព្រៃភ្នំព្រេច ជាទីជម្រករបស់សត្វដែលកំពុងទទួលរងការគំរាមកំហែងជាសកលជាច្រើនប្រភេទរាប់បញ្ចូលទាំងប្រភេទរងគ្រោះថ្នាក់ជិតផុតពូជ រួមមានដូចជា សត្វទន្សោង (Bos javanicus) សត្វដំរីអាស៊ី(Elephas maximus) សត្វក្រពើភ្នំ (Crocodylus siamensis) ដែលមានចំនួនសេសសល់ចុងក្រោយនៅក្នុងប្រទេស សត្វខ្លារខិន (Panthera pardus delacouri) ដែលជាចំនួននៅសេសសល់ចុងក្រោយសម្រាប់តំបន់ឥណ្ឌូចិន និងពពួកសត្វស្លាបដូចជាសត្វត្រយ៉ង សត្វត្មាត និងសត្វក្ងោកបៃតង ព្រមទាំងសត្វព្រៃសំខាន់ៗផ្សេងទៀតរាប់បញ្ចូលទាំងសត្វរមាំង សត្វខ្ទីង សត្វឈ្លូស សត្វប្រើស និងពពួកពានរផងដែរ ។ មិនតែប៉ុណ្ណោះដែនជម្រកសត្វព្រៃទាំងពីរនេះមានតួនាទីយ៉ាងសំខាន់ក្នុងការផ្គត់ផ្គង់នូវប្រភពធនធានកសិកម្ម និងអនុផលព្រៃឈើ ដល់ប្រជាជនសហគមន៍មូលដ្ឋានចំនួនប្រមាណជាង៣០,០០០ នាក់ ដែលកំពុងរស់នៅជុំវិញ និងក្បែរតំបន់អភិរក្សទាំងពីរនេះ ។
ដោយមានការគាំទ្រថវិកាពីសំណាក់ទីភ្នាក់ងារជំនួយអាមេរិក USAID សហភាពអឺរ៉ុប(EU) រដ្ឋាភិបាលប្រទេសអាល្លឺម៉ង់(BMZ) រដ្ឋាភិបាលប្រទេសប៊ែលហ្សិក (DGD) កម្មវិធីបរិស្ថានរបស់អង្គការសហប្រជាជាតិ UN Environment GEF រដ្ឋាភិបាលប្រទេសស៊ុយអែដ (Sida) IKEA Welthungerhilfe (WHH) Humanscale និងបណ្តាញអង្គការWWF (WWF-Belgium, WWF-Germany, WWF-Sweden, WWF-Switzerland, WWF-US) ការគ្រប់គ្រងតំបន់ការពារធម្មជាតិនៃដែនជម្រកសត្វព្រៃស្រែពក (ផ្ទៃដីសរុប ៣៧២៩.៧ គីឡូម៉ែត្រការ៉េ) និងដែនជម្រកសត្វព្រៃភ្នំព្រេច (ផ្ទៃដីសរុប ២២២៥ គីឡូម៉ែត្រការ៉េ) ផ្តោតលើការងារតាមដាន និងស្រាវជ្រាវជីវៈចម្រុះ ការកសាងសមត្ថភាពជំនាញសម្រាប់ការអនុវត្តច្បាប់ ការប្រយុទ្ធប្រឆាំងនឹងការបរបាញ់ ការជួញដូរសត្វព្រៃនិងព្រៃឈើខុសច្បាប់ ការទប់ស្កាត់ការកាប់ទន្ទ្រានដីព្រៃខុសច្បាប់ ការអភិវឌ្ឍរបរចិញ្ចឹមជីវិតរបស់សហគមន៍មូលដ្ឋាន និងការអនុវត្តកម្មវិធីផ្សេងៗទៀត ដើម្បីលើកទឹកចិត្ត និងកៀរគរការចូលរួមរបស់ប្រជាជនមូលដ្ឋានក្នុងការអភិរក្សធនធានធម្មជាតិ និងអភិវឌ្ឍន៍ជីវភាពប្រកបដោយនិរន្តរភាព។
មន្ត្រីជាន់ខ្ពស់ក្រសួងបរិស្ថានបានឲ្យដឹងថា ដំណើរទស្សនកិច្ចនេះ នឹងប្រព្រឹត្តទៅចាប់ពីថ្ងៃទី១៥ ដល់ថ្ងៃទី១៩ ខែមករា ឆ្នាំ២០២១ និងដោយមានការអញ្ជើញចូលរួមពីថ្នាក់ដឹកនាំនិងមន្ត្រីនៃក្រសួង និងមន្ទីរបរិស្ថាន លោក សេង ទៀក នាយកអង្គការ WWF ព្រមទាំងបុគ្គលិកសំខាន់ៗនៃអង្គការ WWF សរុបទាំងអស់ចំនួនប្រមាណជាង ៥០រូប ។ ទស្សនកិច្ចសារព័ត៌មាននេះត្រូវបានរៀបចំឡើងដើម្បីផ្តល់ឱកាសដល់អ្នកសារព័ត៌មាននៅកម្ពុជា និងអ្នកចូលរួមទាំងអស់ក្នុងការស្វែងយល់អំពីសារៈសំខាន់ និងសក្តានុពលរបស់ដែនជម្រកសត្វព្រៃស្រែពក ដែលជាបេះដូងនៃតំបន់ព្រៃទេសភាពខ្ពង់រាបភាគខាងកើតសម្រាប់ការអភិរក្សធនធានធម្មជាតិ និងជីវៈចម្រុះដ៏សម្បូរបែប និងសម្រាប់ការស្តារឡើងវិញនូវប្រភេទសត្វព្រៃសំខាន់ដែលមានតម្លៃជាសកល ដើម្បីរួមចំណែកដល់ការអភិវឌ្ឍជីវភាពសហគមន៍មូលដ្ឋាន និងសេដ្ឋកិច្ចជាតិ ។
មន្ត្រីដដែលថា«ទស្សនកិច្ចនេះធ្វើឡើងស្របតាមគោលការណ៍របស់ក្រសួងបរិស្ថានដើម្បីលើកទឹកចិត្តដល់ប្រព័ន្ធផ្សព្វផ្សាយនិងសារព័ត៌មាននៅកម្ពុជា ក្នុងការបន្តនិងបង្កើនការផ្សព្វផ្សាយរបស់ខ្លួនស្តីពីប្រធានបទបរិស្ថាន ធនធានធម្មជាតិ និងជីវៈចម្រុះ ឲ្យបានកាន់តែទូលំទូលាយបន្ថែមទៀត ដើម្បីផ្តល់នូវព័ត៌មាន និងចំណេះដឹងឲ្យបានដល់ប្រជាជនគ្រប់ស្រទាប់ទាំងអស់នៅក្នុងសង្គមកម្ពុជា និងចូលរួមការពារនិងអភិរក្សធនធានធម្មជាតិ ព្រៃឈើសត្វព្រៃដែលកម្ពុជាមានឱ្យបានគង់វង្សសម្រាប់មនុស្សរាប់ជំនាន់ទៅមុខទៀត»។ប្រភពបន្ថែមថា៖ «ព័ត៌មាន និងចំណេះដឹងទាំងនេះនឹងចូលរួមចំណែកបណ្តុះការស្រឡាញ់បរិស្ថាន ធនធានធម្មជាតិ និងជីវៈចម្រុះ ក្នុងចំណោមសាធារណជនកាន់តែច្រើនឡើងៗ និងបំផុសស្មារតីរបស់ប្រជាជនក្នុងការចូលរួមថែរក្សា និងការពារធនធានធម្មជាតិដ៏មានតម្លៃខ្ពស់សម្រាប់ជាតិកម្ពុជា ក៏ដូចជាសម្រាប់សកលលោកទាំងមូលដែរ»។
អស់រយៈកាលជាងពីរទសវត្សរ៍មកហើយ អង្គការ WWF បាន និងកំពុងអនុវត្តការងារយ៉ាងជិតស្និទ្ធជាមួយរាជរដ្ឋាភិបាលកម្ពុជាក្នុង វិស័យគ្រប់គ្រង និងការពារធនធានធម្មជាតិ។ ក្នុងកិច្ចសហប្រតិបត្តិការយ៉ាងជិតស្និទ្ធជាមួក្រសួងបរិស្ថាន និងបណ្តាដៃគូផ្សេងៗទៀត អង្គការ WWF កំពុងគាំទ្រដល់ការគ្រប់គ្រង និងថែរក្សាធនធានជីវៈចម្រុះដ៏សម្បូរបែបនៅក្នុងដែនជម្រកសត្វព្រៃស្រែពក និង ដែនជម្រកសត្វព្រៃភ្នំព្រេច លើផ្ទៃដី សរុបប្រមាណ ៦,០០០ (ប្រាំមួយពាន់) គីឡូម៉ែត្រការ៉េ ស្ថិតនៅក្នុងខេត្តមណ្ឌលគិរី ។ទស្សនកិច្ចនេះធ្វើឡើងស្របតាមគោលការណ៍របស់ក្រសួងបរិស្ថានដើម្បីលើកទឹកចិត្តដល់ប្រព័ន្ធផ្សព្វផ្សាយនិងសារព័ត៌មាននៅកម្ពុជា ក្នុងការបន្តនិងបង្កើនការផ្សព្វផ្សាយរបស់ខ្លួនស្តីពីប្រធានបទបរិស្ថាន ធនធានធម្មជាតិ និងជីវៈចម្រុះ ឲ្យបានកាន់តែទូលំទូលាយបន្ថែមទៀត ដើម្បីផ្តល់នូវព័ត៌មាន និចំណេះដឹងឲ្យបានដល់ប្រជាជនគ្រប់ស្រទាប់ទាំងអស់នៅក្នុងសង្គមកម្ពុជា ៕
ចែករំលែកព័តមាននេះ