រាជធានីភ្នំពេញ៖ កំណើនសេដ្ឋកិច្ចកម្ពុជាក្នុងឆ្នាំ ២០២១ ត្រូវបានស្ថាប័នហិរញ្ញវត្ថុធំៗ នៅក្នុងស្រុកនិងអន្តរជាតិបានធ្វើការព្យាករថានឹងងើបឡើងវិញក្នុងរង្វង់ ៤ភាគរយ ទៅ ៦,៨ភាគរយ តែការព្យាករនេះពឹងផ្អែកជាចម្បងទៅលើប្រសិទ្ធភាពនៃថ្នាំបង្ការជំងឺកូវីដ១៩ និងការងើបឡើងវិញនៃកំណើនក្នុងប្រទេស ជាដៃគូសេដ្ឋកិច្ចកម្ពុជារួមនិងការពង្រឹងមូលដ្ឋានសេដ្ឋកិច្ចក្នុងស្រុក។
យោងតាមធនាគារជាតិនៃកម្ពុជានៅថ្ងៃទី ៣១ ធ្នូ នេះ បានបង្ហាញរបាយការណ៍ស្តីពី ៖ « វឌ្ឍនភាពម៉ាក្រូសេដ្ឋកិច្ចនិងវិស័យធនាគារ ឆ្នាំ ២០២០ និងទស្សនៈវិស័យឆ្នាំ២០២១» ថា ក្នុងបរិការណ៍ដែលថ្នាំបង្ការមានប្រសិទ្ធភាពអាចទប់ស្កាត់ការរីករាលដាលនៃជំងឺកូវីដ១៩ បានក្នុងឆមាសទីឆ្នាំ ២០២១ នោះសេដ្ឋកិច្ចកម្ពុជារំពឹងថាអាចងើបឡើងវិញក្នុងរង្វង់ ៤ ភាគរយ ហើយអត្រាអតិផរណា រំពឹងថាមានកម្រិតក្រោម ៣ ភាគរយ ដែលជាកម្រិតទាបអាចគ្រប់គ្រងបាន ជាមួយនិងស្ថិរភាពអត្រាប្តូរប្រាក់ និងការរក្សាបានកម្រិតខ្ពស់នៃទុនបម្រុងអន្តរជាតិ ។
ចំណែកស្ថាប័នហិរញ្ញវត្ថុអន្តរជាតិនានា បានព្យាករថាអត្រាកំណើនសេដ្ឋកិច្ចកម្ពុជាអាចសម្រេចបាន ពី ៤ភាគរយ ទៅ ៦,៨ ភាគរយ ។ តែទោះយ៉ាងណាការព្យាករទាំងនេះ អាស្រ័យជាចម្បងលើប្រសិទ្ធភាពនៃថ្នាំបង្ការ ល្បឿននៃការងើបឡើងវិញនៃកំណើនក្នុងប្រទេស ជាដៃគូសេដ្ឋកិច្ចជាមួយកម្ពុជា និងការពង្រឹងមូលដ្ឋានសេដ្ឋកិច្ចក្នុងស្រុក។
ប្រភពដដែលឱ្យដឹងទៀតថាស្ថិតក្នុងបរិការណ៍ខាងលើនេះ ការបន្តពង្រឹងសកម្មភាពសេដ្ឋកិច្ច ក្នុងស្រុកថែមទៀតនឹងជួយទ្រទ្រង់និងកាត់បន្ថយការប៉ះពាល់ លើកំណើនសេដ្ឋកិច្ចកម្ពុជា ដោយសារការធ្លាក់ចុះវិស័យខាងក្រៅ។ដូច្នេះការបន្តអនុវត្តគោលនយោបាយ របស់រាជរដ្ឋាភិបាលក្នុងការលើកស្ទួយការអភិវឌ្ឍ សហគ្រាសធុនតូច និងមធ្យម ការជំរុញនវានុវត្តន៍ និងការប្រើប្រាស់បច្ចេកវិទ្យាថ្មីៗ លើគ្រប់វិស័យមានសារសំខាន់ណាស់ ក្នុងការពង្រឹងមូលដ្ឋានកំណើនសកម្មភាពក្នុងស្រុក។
ជាមួយគ្នានេះ វិស័យកសិកម្ម និងបន្តជាវិស័យដ៏សំខាន់និងមានសក្តានុពលខ្ពស់ ដែលអាចជួយស្រូបឥទ្ធិពលមួយផ្នែកនៃវិបត្តិដូចជាភាពអត់ការងារធ្វើ ឬជួយគាំទ្រជីវភាពប្រជាជនក្រីក្រ ។ ម្យ៉ាងទៀត ការពន្លឿនការធ្វើពិពិធកម្ម មូលដ្ឋានសេដ្ឋកិច្ច និងការអនុវត្តយុទ្ធសាស្ត្រអភិវឌ្ឍន៍វិស័យឧស្សាហកម្ម និងជួយឱ្យសេដ្ឋកិច្ចកម្ពុជាងើបឡើងកាន់តែឆាប់រហ័ស ពីវិបត្តិនាបច្ចុប្បន្ននេះ ។ លើសពីនេះ ការចាប់ផ្តើមទទួលបានចំណូលពីការផលិតប្រេង នៅកម្ពុជានឹងផ្តល់ប្រភពថវិកាជាតិមួយទៀត សម្រាប់ការអភិវឌ្ឍវិស័យអាទិភាពនានានៅពេលខាងមុខ។
សំខាន់ដូចគ្នានេះវិស័យធនាគារ និងហិរញ្ញវត្ថុនឹងបន្តដើរតួនាទីគន្លឹះមួយ ក្នុងការគាំទ្រសកម្មភាពសេដ្ឋកិច្ច ព្រមទាំងរួមចំណែករក្សាលំនឹងម៉ាក្រូសេដ្ឋកិច្ចនិងហិរញ្ញវត្ថុ ។ លើសពីនេះការរំពឹងពីការងើបឡើង នៃកំណើនសេដ្ឋកិច្ចនឹងអាចបន្ថយសម្ពាធមកលើវិស័យធនាគារ ជាពិសេសលទ្ធភាពបង្កើនឥណទាននិងទទួលបានប្រាក់បញ្ញើខ្ពស់ជាងឆ្នាំ២០២០ ។ តែទោះជាយ៉ាងណាការថយចុះចំណូល និងសន្សំនៅឆ្នាំ ២០២០ នឹងអាចបង្កើនបំណុលរបស់ប្រជាជន ដែលបញ្ហានេះអាចបង្កជាហានិភ័យចម្បងមួយ ដូចដែលប្រទេសកំពុងអភិវឌ្ឍន៍នានាបាននឹងកំពុងប្រឈមក្នុងដំណាក់កាលក្រោយវិបត្តិកូវីដ១៩ដូច្នេះដែរ ។
ឆ្លើយតបនឹងបញ្ហានេះ ធនាគារជាតិនៃកម្ពុជានឹងបន្តពង្រឹងការត្រួតពិនិត្យប្រព័ន្ធធនាគារនិងបានត្រៀមដាក់ចេញវិធានការប្រុងប្រយ័ត្ននិងការគាំទ្រចាំបាច់នានា ដើម្បីរក្សាចីរភាព ភាពធន់ និងទំនុកចិត្តមកលើប្រព័ន្ធធនាគារកម្ពុជា៕
ចែករំលែកព័តមាននេះ