រាជធានីភ្នំពេញ៖ បរិមាណនៃការនាំចេញអង្ករនៅឆ្នាំ២០២០សរុបមានចំនួន ៦៩០.៨២៩ តោនមានកំណើនប្រមាណ ១១,៤០% ខណៈការនាំចេញទៅទីផ្សារចិនមានប្រមាណជាង៤១%នៃការនាំចេញសរុប។
យោងតាមឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់បានបង្ហាញថា បរិមាណនៃការនាំចេញអង្ករសរុបក្នុងឆ្នាំ ២០២០ មានចំនួន ៦៩០.៨២៩ តោន កើនឡើងប្រមាណ១១,៤០% ប្រៀបធៀបរយៈពេលដូចគ្នាឆ្នាំ២០១៩ហើយតម្លៃនៃការនាំចេញអង្ករសរុបក្នុងឆ្នាំ២០២០មានទឹកប្រាក់ប្រមាណ ៥៣៨ លានដុល្លារអាមេរិក។
បើតាមឯកឧត្តមរដ្ឋមន្ត្រីក្រសួងកសិកម្ម តម្រូវការនិងការនាំចេញអង្កររបស់កម្ពុជាក្នុងឆ្នាំ ២០២០ កន្លងមកនេះមានចំនួន ៦០ ប្រទេសក្នុងនោះ ប្រទេសចិន ចំនួន ២៨៩. ៤៣៩ តោន ស្មើនឹង ៤១,៩០ ភាគរយ សហភាពអ៊ឺរ៉ុប (២៤ប្រទេស) ចំនួន ២០៣. ៧៩១ តោន ស្មើនឹង ២៩,៥០ ភាគរយ បណ្តាប្រទេសអាស៊ន(៦ប្រទេស) ចំនួន ៨៦.៨៩៩ តោន ស្មើនឹង ១២,៥៨ ភាគរយ នៃការនាំចេញអង្ករសរុប និងគោលដៅផ្សេងទៀតមាន ២៩ ប្រទេស ចំនួន ១១០.៧០០ តោន ស្មើនឹង ១៦,០២ភាគរយ នៃការនាំចេញអង្ករសរុប ក្រុមហ៊ុននាំចេញមាន ចំនួន ៧៦ ក្រុមហ៊ុន កំណើននៃការនាំចេញអង្កររបស់កម្ពុជានៅឆ្នាំ២០២០ សម្រាប់អ្នកជំនាញនៅក្នុងវិស័យស្រូវអង្ករ យល់ឃើញថាវាជាកំណើនមួយល្អ ប៉ុន្តែសម្រាប់កម្ពុជាគឺចង់បានច្រើនជាងនេះ។
លោកឧកញ៉ា ចាន់ សុខឃាំង អនុប្រធានសហព័ន្ធស្រូវអង្ករកម្ពុជា ឱ្យដឹងនៅថ្ងៃទី ១ មករាឆ្នាំ ២០២១ នេះ ថាកំណើននៃការនាំចេញអង្ករក្នុងឆ្នាំ ២០២០ នេះ វាជាការពេញចិត្តមួយ តែបើតាមផែនការរបស់យើងគឺយើងចង់ធ្វើឱ្យបានច្រើនជាងនេះ។ បើតាមតម្រូវការយើងអាចធ្វើបានច្រើនជាង អាចឈានចូលដល់ ៧៥ ម៉ឺនតោនអង្ករ ប៉ុន្តែដោយសារតែនៅក្នុងខែ ១១ និងខែ ១២ កន្លងទៅនេះវាបានជួបឧបសគ្គ ខ្វះទូកុងតេន័រសម្រាប់នាំទំនិញចេញ ។ បើយើងមានទូកុងតេន័រនាំចេញទំនិញគ្រប់គ្រាន់ ខ្ញុំគិតថានៅឆ្នាំ ២០២០ យើងអាចនាំចេញអង្ករដល់៧៥ ម៉ឺនតោន ។
ការនាំចេញអង្កររបស់កម្ពុជា នៅប៉ុន្មានឆ្នាំកន្លងមកនេះ ប្រទេសចិនជាទីផ្សារធំមួយ ក្នុងចំណោមទីផ្សារផ្សេងទៀត ហើយប្រសិនបើកម្ពុជាធ្វើឱ្យបាត់បង់ វានឹងធ្វើឱ្យប៉ះពាល់ដល់ការនាំចេញអង្កររបស់ខ្លួន។
លោកឧកញ៉ាបន្តថា « វាត្រូវតែជួបឧបសគ្គ ដោយសារតែនៅពេលសព្វថ្ងៃ មិត្តចិនគាត់បានទទួលទិញអង្ករពីកម្ពុជាយើង មានចំនួនមួយធំហើយច្រើន ។ ជាទូទៅនៅពេលកន្លងមកចិនទទួលទិញអង្ករកម្ពុជាយើង ធ្លាប់ឃើញយ៉ាងហោចមាន៣៥ទៅ៤០ភាគរយ នៃបរិមាណសរុបដែលយើងធ្វើបាន(នាំចេញ) ។ ដូច្នេះបើសិនមានការបាត់បង់នូវទីផ្សារណាមួយ ដែលមានទំហំដូចចិនវានឹងធ្វើឱ្យប៉ះពាល់ដល់ការនាំចេញអង្កររបស់កម្ពុជា»។
អនុប្រធានសហព័ន្ធរូបនេះលើកឡើងថា «អង្ករកម្ពុជាបាននាំចូលទៅទីផ្សារចិនទើបមានអាយុកាល ៥ ឆ្នាំ ដើម្បីជួយបំពេញតម្រូវការរបស់ប្រជាជនចិន ដូច្នេះខ្ញុំគិតថាបរិមាណនិងតម្រូវការនៃការប្រើប្រាស់ ក៏ដូចជាការពេញចិត្តមកលើអង្ករកម្ពុជានេះ នឹងមានការកើនឡើងបន្តទៀតសម្រាប់ទីផ្សារចិន»។
លោកឧកញ៉ា ចាន់សុខឃាំង សង្កត់ធ្ងន់ថា ៖ « ការនាំចេញអង្ករនៅឆ្នាំ ២០២១ យើងមានការរំពឹងទុកខ្ពស់ ថានឹងមានកំណើននៅត្រីមាសទី១ឆ្នាំ ២០២១ នេះ ដោយសារយើងមើលឃើញថា នៅប្រទេសជិតខាងដូចជា ថៃនិងវៀតណាម គាត់មានផលប៉ះពាល់មួយចំនួនពាក់ព័ន្ធនឹងការប្រមូលផលស្រូវអង្កររបស់ពួកគាត់ ។ ដូច្នេះវាផ្តល់នូវជំហរល្អ មួយសម្រាប់កម្ពុជាក្នុងការផ្គត់ផ្គង់តម្រូវការ នៅក្នុងទីផ្សារអន្តរជាតិ»។
ពាក់ព័ន្ធផលិតកម្មដំណាំស្រូវរបស់កម្ពុជាក្នុងឆ្នាំ ២០២០ កន្លងមកនេះបើ យោងតាមឯកឧត្តម វេងសាខុន គូសបញ្ជាក់ថា ផលិតផលសរុប និងស្ថានភាពស្បៀង គឺកម្ពុជាមានផ្ទៃដីដាំដុះ ចំនួន ៣. ៤០៤. ១៣១ ហិកតា ផ្ទៃដីប្រមូលផល ចំនួន ៣ ២៦៨ ៩៦៨ ហិកតា ទិន្នផលមធ្យម ចំនួន ៣,៣៤៥ តោនក្នុងមួយហិកតា បរិមាណផលសរុប ចំនួន ១០. ៩៣៥. ៦១៨ តោន អតិរេកស្បៀងសរុប (គិតជាស្រូវ) ចំនួន ៥. ៩២២. ១៣៨ តោន អតិរេកស្បៀងសរុប (គិតជាអង្ករ) ចំនួន ៣. ៧៩០. ១៦៨ តោន តម្លៃផលិតផលសរុបស្រូវនិងអង្ករ ចំនួនជាង ៣. ៨២៣លានដុល្លារអាមេរិក៕
ចែករំលែកព័តមាននេះ