កាលពីពេល ថ្មីៗកន្លងមក អាជ្ញាធរចិនបានបង្ហាញតួលេខរបស់សមាជិកគណបក្សកុំមុយនីស្តកើនឡើងខ្ពស់នៅក្នុងឆ្នាំ២០១៤ ដោយមានចំនួនសរុបជិត៨៨លាននាក់ និងចាប់ពីពេលនេះតទៅ នឹងសង្កត់ធ្ងន់លើការគ្រប់គ្រងគុណភាព ដើម្បីបង្កើនអំណាច និងភាពរឹងមាំ ត្រៀមប្រារព្ធខួបកំណើតបក្សឆ្នាំទី៩៥ ។
តាមសេចក្តីថ្លែងការណ៍របស់បក្សកុំមុយនីស្តចិនកាលពីថ្ងៃទី២៩ មិថុនា ២០១៥ បញ្ជាក់ថា ក្នុងឆ្នាំកន្លងមក គណបក្សបានទទួលសមាជិកថ្មីជា២,៥០៧លាននាក់ ដោយបណ្តាសមាជិកថ្មីនោះ រួមមានបុគ្គលិកមានអាយុទាបជាង៣៥ឆ្នាំ ប្រហែល១,៧លាននាក់ និងជិត៣៩% នៃសមាជិកថ្មី ឆ្លងកាត់ការសិក្សាថ្នាក់ឧត្តមសិក្សា។
ទីភ្នាក់ងារព័ត៌មានស៊ីនហួ របស់ចិនផ្សាយថា គណៈកម្មាធិការគណបក្សកុំមុយនីស្តចិនបានរិះគន់វិធីសាស្ត្រគ្រប់គ្រងពីកំណើនរបស់សមាជិកគណបក្សដើម្បីបង្កើន និងអភិវឌ្ឍគុណភាពដែលមានប្រហែល៧% នៃចំនួនប្រជាជនសរុបនៅទូទាំងប្រទេស១៣៧០លាននាក់ ។
របាយការណ៍បញ្ជាក់ថា គណបក្សកុំមុយនីស្តចិនបានកាន់អំណាចដឹកនាំប្រទេសតាំងពីឆ្នាំ១៩២១ និងទើបប្រារព្ធពិធីគម្រប់ខួបឆ្នាំ៩៤ កាលពីថ្ងៃទី១ កក្កដា ២០១៥ ដោយបង្ហាញពីតួលេខចំនួនសមាជិកនៅក្នុងបក្សទុកជាកម្លាំងចលករ និងភាពរឹងមាំដែលពីមួយថ្ងៃទៅមួយថ្ងៃកាន់តែមានកំណើនខ្ពស់ ។ ការចូលជាសមាជិកក្នុងគណបក្សកុំមុយនីស្តចិន ចាត់ទុកថាជាបំណងប្រាថ្នាមួយរបស់ពលរដ្ឋចិនដែលអាចនាំមកនូវផលប្រយោជន៍ និងសែស្រឡាយលើការទាក់ទងផ្នែកជំនាញ និង ផ្សេងៗទៀត រួមទាំងមានកិត្តិយស និងមុខមាត់នៅក្នុងសង្គមដោយសារតែមានសម្ព័ន្ធភាពជាមួយថ្នាក់ដឹកនាំប្រទេស ។
ចាប់តាំងពីលោកស៊ីជិនពីង ចូលកាន់អំណាចនៅក្នុងគណបក្សកុំមុយនីស្តមក មានបម្រែបម្រួលសង្គមពិសេសគឺការលុបបំបាត់អំពើពុករលួយដោយមេដឹកនាំចិនរូបនេះ បានព្រមានថាវាជាឧបសគ្គបំផ្លិចបំផ្លាញអំណាច និងការដឹកនាំប្រទេស ៕
ចែករំលែកព័តមាននេះ