ខេត្តកំពង់ឆ្នាំង៖ យុវជនម្នាក់ បាន​បាត់​បង់​ជីវិត​ កៀបជាប់ក្រោមកង់រថយន្តធុនធ្ងន់ យ៉ាង​អាណោច​​អាធ័ម ក្នុងហេតុការណ៍គ្រោះថ្នាក់ចរាចរណ៍មួយ បានកើតឡើង នៅវេលាម៉ោង ១២​ និង ៣០​ នាទី យប់ថ្ងៃទី២៦ ខែធ្នូ ឆ្នាំ២០២០ នៅចំណុច​ផ្លូវបែកជាប្រាំ មុខសាលាខេត្ត​កំពង់ឆ្នាំង ក្នុងភូមិទី១ សង្កាត់ខ្សាម ក្រុងកំពង់ឆ្នាំង។

សមត្ថកិច្ចនគរបាលចរាចរណ៍ក្រុងកំពង់ឆ្នាំង បានដឹងថា យុវជនរងគ្រោះ មានឈ្មោះ ទូច ម៉េងលី អាយុ ២៣ឆ្នាំ មានទីលំនៅ ក្នុង​ខេត្តកំពង់ចាម។ មុនពេលកើតហេតុ យុវជនខាងលើ បានជិះម៉ូតូម៉ាកនិច ពណ៌បាញ់ឌុក ពាក់ស្លាកលេខ កំពង់ឆ្នាំង 1H. 9379 ក្នុងដំណើរពី​ទិស​ខាងជើងទៅត្បូង លុះមកដល់ចំណុចកើតហេតុ ក៏បានបុក​ជាមួយរថយន្តធុន​សណ្តោងកន្ទុយ ១គ្រឿង ម៉ាកហ៊ីណូ ពាក់ស្លាកលេខ ព្រះសីហនុ 3A-0037 និងកន្ទុយសណ្តោងពាក់ស្លាក​លេខភ្នំពេញ 4A-8689 ក្នុងដំណើរទិសខាង​លិចទៅកើត បណ្ដាលឱ្យជនរងគ្រោះ ខ្ទាតទៅ​ជាប់ក្រោមកង់រថយន្ត បណ្តាល​ឱ្យ​បាត់​បង់​ជីវិត​នៅ​នឹងកន្លែង។

ប្រភពដដែលបានបន្តថា​ ក្រោយពេលកើតហេតុ អ្នកបើកបររថយន្ត បានរត់គេច​ខ្លួនបាត់ ហើយ​សមត្ថកិច្ចនគរបាល បានយកវត្ថុតាងទៅរក្សាទុក នៅអធិការដ្ឋាន​នគរបាលក្រុងដើម្បីរង់ចាំការ​ដោះស្រាយ តាមនីតិវិធី។ ចំណែកសពជនរងគ្រោះ បានដឹកទៅទុកនៅវត្តខ្សាម ដើម្បីរង់ចាំក្រុម​គ្រួសារ ដឹកយកទៅធ្វើបុណ្យ​តាមប្រពៃណី៕  ដោយ៖ ពៅ សុខហ៊ាន