ភ្នំពេញ៖ បណ្តឹងចំនួន ៩៥ របស់គណបក្សសម្ព័ន្ធដើម្បីប្រជាធិបតេយ្យ ដែលប្តឹងតវ៉ានឹងសេចក្តីសម្រេចរបស់ គ.ជ.ប ដោយសុំលុបឈ្មោះប្រជាពលរដ្ឋ ចេញពីបញ្ជីបោះឆ្នោតដំបូង ត្រូវបានដោះស្រាយរួចរាល់ជាស្ថាពរ នៅថ្ងៃទី២៥ ខែធ្នូនេះ ដោយក្រុមប្រឹក្សាធម្មនុញ្ញ បានតម្កល់សេចក្តីសម្រេចរបស់ គ.ជ.ប ទុកជាបានការពេញទាំងមូល។ នេះបើតាមសេចក្តីប្រកាសរបស់គ.ជ.ប។
គ.ជ.ប បានបញ្ជាក់ថា ការសម្រេចរបស់ក្រុមប្រឹក្សាធម្មនុញ្ញនេះ នាំឲ្យគ.ជ.ប មានពេលវេលាគ្រប់គ្រាន់ ដើម្បីរៀបចំផ្តល់សុពលភាពលើបញ្ជីបោះឆ្នោត ឆ្នាំ២០២០ និងផ្សព្វផ្សាយជាផ្លូវការ។ បញ្ជីបោះឆ្នោតផ្លូវការ នឹងត្រូវផ្សព្វផ្សាយ នៅថ្ងៃទី៣១ ខែធ្នូ ឆ្នាំ២០២០ វេលាម៉ោង ១០ព្រឹក ហើយ គ.ជ.ប នឹងអញ្ជើញភាគីពាក់ព័ន្ធ ចូលរួមជាសាក្សី នៃការផ្សព្វផ្សាយបញ្ជីបោះឆ្នោតផ្លូវការនេះ។
កាលពីថ្ងៃទី២៧ ខែវិច្ឆិកា ឆ្នាំ២០២០ គ.ជ.ប បានផ្សព្វផ្សាយពីបញ្ជីបោះឆ្នោតដំបូង ឆ្នាំ២០២០ ដែលមានចំនួនអ្នកមានឈ្មោះក្នុងបញ្ជីបោះឆ្នោត ចំនួន ៨ ៨៣១ ៩៨៨ នាក់។ កាលពីឆ្នាំ២០១៩ អ្នកមានឈ្មោះក្នុងបញ្ជីបោះឆ្នោត មានចំនួន ៨ ៦២៩ ៣៥៧នាក់៕
ចែករំលែកព័តមាននេះ