ខេត្តព្រះសីហនុ ៖ យុវជនទំនើងមួយក្រុមបានវាយកម្មករដឹកទឹកកក ព្រមទាំងបានគំរាមបា.ញ់សម្លា.ប់ ប្រសិនបើនរណាម្នាក់ហ៊ានចេញមុខជួយ គ្រាន់តែរឿងស៊ីផ្លេម៉ូតូ ត្រូវបានកម្លាំងសមត្ថកិច្ចការិយាល័យកណ្តាលព្រហ្មទ័ណ្ឌ នៃស្នងការដ្ឋាននគរបាលខេត្តព្រះសីហនុ
ខេត្តព្រះសីហនុ ៖ យុវជនទំនើងមួយក្រុមបានវាយកម្មករដឹកទឹកកក ព្រមទាំងបានគំរាមបាញ់សម្លាប់ ប្រសិនបើនរណាម្នាក់ហ៊ានចេញមុខជួយ គ្រាន់តែរឿងស៊ីផ្លេម៉ូតូ ត្រូវបានកម្លាំងសមត្ថកិច្ចការិយាល័យកណ្តាលព្រហ្មទ័ណ្ឌ នៃស្នងការដ្ឋាននគរបាលខេត្តព្រះសីហនុ ឃាត់ខ្លួនបានកាលពីវេលាម៉ោង ១ និង៣០នាទីរសៀល ថ្ងៃទី០២ កក្កដា ២០១៥ នៅភូមិ៣ សង្កាត់៤ ក្រុង-ខេត្តព្រះសីហនុ ។
លោកវរសេនីយ៍ឯកកុល ផាលី ស្នងការរងទទួលបន្ទុកព្រហ្មទ័ណ្ឌ នៃស្នងការដ្ឋាននគរបាលខេត្តព្រះសីហនុ បានឱ្យដឹងថា នៅវេលាម៉ោង១ និង៣០នាទីរសៀល ថ្ងៃទី០២ កក្កដា ២០១៥ កម្លាំងជំនាញការិយាល័យកណ្តាលនគរបាលព្រហ្មទ័ណ្ឌបានទទួលបទបញ្ជាពីលោកឧត្តមសេនីយ៍ស្នងការនគរបាលខេត្ត ធ្វើការស្រាវជ្រាវបង្ក្រាបជនដៃដល់បានម្នាក់ក្នុងចំណោមបក្ខពួក២នាក់ ។
យុវជនទំនើងដែលត្រូវឃាត់ខ្លួនមានឈ្មោះជឿន សីហា ភេទប្រុស អាយុ២៣ឆ្នាំ មុខរបរកម្មករ មានទីលំនៅភូមិ៣ សង្កាត់៤ ក្រុង-ខេត្តព្រះសីហនុ ពីបទហិង្សាដោយចេតនា កាលពីថ្ងៃទី២៧ មិថុនា ២០១៥ វេលាម៉ោង១០ និង៣០នាទីយប់ នៅមុខសណ្ឋាគារ CCS ក្នុងភូមិ៣ សង្កាត់៤ ក្រុង-ខេត្តព្រះសីហនុ ។ រីឯជនសង្ស័យ១នាក់ទៀតត្រូវបានកម្លាំងជំនាញកំពុងធ្វើការស្រាវជ្រាវ និងតាមរកចាប់ខ្លួន ។
ក្រោយពេលឃាត់ខ្លួនជនសង្ស័យបានសារភាពថា ខ្លួនបានប្រើអំពើហិង្សាវាយទៅលើជនរងគ្រោះពិតប្រាកដមែន ហើយបានស្រែកគំរាមថា អាណាជួយអញនឹងបាញ់ តែគ្មានកាំភ្លើងទេ ។ ការប្រើអំពើហិង្សានេះដោយសារពេលនោះជនសង្ស័យមានគ្នា២នាក់ ជិះម៉ូតូស្កុបពី ត្រូវជនរងគ្រោះស៊ីផ្លេខ្លាំងៗ ខឹងពេកក៏ជិះតាមវាយតែម្តង ។
សមត្ថកិច្ចបានឱ្យដឹងទៀតថា ជនរងគ្រោះក្នុងអំពើហិង្សានេះមានឈ្មោះសូត្រ ផល្លា ភេទប្រុស អាយុ១៦ឆ្នាំ មុខរបរកម្មករដឹកទឹកកក មានទីលំនៅ ភូមិ៣ សង្កាត់៤ ក្រុង-ខេត្តព្រះសីហនុ ។
ជនសង្ស័យខាងលើកម្លាំងជំនាញ កំពុងបន្តនិតិវិធី ដើម្បីបញ្ជូនទៅសាលាដំបូងខេត្ត ៕
ចែករំលែកព័តមាននេះ