រាជធានីភ្នំពេញ ៖ ក្រសួងធនធានទឹក និងឧតុនិយមបានឲ្យដឹងថា ចាប់ពីថ្ងៃទី២៣ ដល់២៩ ខែធ្នូ កម្ពុជានឹងមានរងឥទ្ធិពលខ្យល់មូសុងឦសាន ធ្វើឲ្យតំបន់មួយចំនួនចុះត្រជាក់ ហើយមានភ្លៀង ។
យោងតាមសេចក្តីជូនដំណឹងរបស់ក្រសួងធនធានទឹក នៅថ្ងៃទី២២ ធ្នូ ឆ្នាំ២០២០ ស្តីពីស្ថានភាពធាតុអាកាសចាប់ពីថ្ងៃទី២៣ – ២៩ ខែធ្នូ ឆ្នាំ២០២០បានឲ្យដឹងថា នៅថ្ងៃទី២៣-២៤ ខែធ្នូ ភាគខាងជើងនៃប្រទេសកម្ពុជាទទួលឥទ្ធិពលពីក្នុងសម្ពាធខ្ពស់ និងភាគខាងត្បូងនៃប្រទេសកម្ពុជា ទទួលឥទ្ធិពលពីសម្ពាធទាបសកម្មក្រវាញ លើកទី២៣ ។ ក្រសួងបន្តថា នៅថ្ងៃទី២៥-២៩ ខែធ្នូ ប្រទេសកម្ពុជានឹងទទួលឥទ្ធិពលពីខ្យល់មូសុងឦសានមធ្យម ។
ស្ថានភាពបែបនេះធ្វើឲ្យ ៖ បណ្តាខេត្តនៅតំបន់វាលទំនាបកណ្ដាលមានសីតុណ្ហភាពអប្បបរមាមានពី ២១-២៤ °C និងសីតុណ្ហភាពអតិបរមា មានពី ២៩-៣២ °C ។ នៅថ្ងៃ២៣-២៥ ខែធ្នូ នឹងអាចមានភ្លៀងក្នុងកម្រិតខ្សោយទៅបង្គួរ ។ សីតុណ្ហភាពអប្បបរមា មានពី ១៩-២២°C និងសីតុណ្ហភាពអតិបរមា មានពី ២៥-២៨ °C ។ ចំណែកបណ្តាខេត្ត ដាប់ជួរភ្នំដងរែក និងខ្ពង់រាបឦសាន មានសីតុណ្ហភាពអប្បបរមា មានពី ១៩-២២ °Cនិងសីតុណ្ហភាពអតិបរមា មានពី ២៩-៣២ °C។ នៅថ្ងៃទី ២៣-២៥ ខែធ្នូ មានភ្លៀងក្នុងកម្រិតខ្សោយទៅមធ្យម ។ សីតុណ្ហភាពអប្បបរមា មានពី ១៧ -២០ °C និងសីតុណ្ហភាពអតិបរមា មានពី ២៤-២៧ °C ។
ដោយឡែកតំបន់មាត់សមុទ្រមានសីតុណ្ហភាពអប្បបរមា មានពី ២២-២៥ °C និងសីតុណ្ហភាពអតិបរមា មានពី ២៨-៣១ °C ។ នៅថ្ងៃទី ២៣-២៤ ខែធ្នូ នឹងអាចមានភ្លៀងក្នុងកម្រិតពីខ្សោយទៅបង្គួរ និងនៅលើផ្ទៃសមុទ្រអាច នឹងមានខ្យល់បក់បោកខ្លាំងនិងរលកសមុទ្រខ្ពស់ៗ ។ សីតុណ្ហភាពអប្បបរមា មានពី ២០-២៣ °C និងសីតុណ្ហភាពអតិបរមា មានពី ២៥-២៨C ។
ជាមួយគ្នានោះដែរ សូមសាធារណៈជនជ្រាបជាព័ត៌មាន ចំពោះប្រជាពលរដ្ឋ អ្នកដំណើរ និងអ្នកនេសាទ សូមយកចិត្តទុកដាក់បង្ការ និងប្រុងប្រយ័ត្នចំពោះខ្យល់បក់បោក និងរលកសមុទ្រខ្ពស់ ចាប់ពីថ្ងៃទី២៣-២៤ ខែធ្នូ ៕
ចែករំលែកព័តមាននេះ