ខេត្តកំពង់ចាម ៖ អ្នកជិះម៉ូតូម្នាក់បានស្លាប់ និងម្នាក់ទៀតបានរងរបួសនៅក្នុងហេតុការណ៍គ្រោះថ្នាក់ចរាចរណ៍ដោយរថយន្តមួយគ្រឿង បានមកបុកពីក្រោយពេញទំហឹង។ ហេតុការណ៍នេះបានកើតឡើងនៅវេលាម៉ោង៥ល្ងាច ថ្ងៃទី១៨ ខែធ្នូ ឆ្នាំ២០២០ នៅលើផ្លូវជាតិលេខ៦…
ខេត្តកំពង់ចាម ៖ អ្នកជិះម៉ូតូម្នាក់បានស្លាប់ និងម្នាក់ទៀតបានរងរបួសនៅក្នុងហេតុការណ៍គ្រោះថ្នាក់ចរាចរណ៍ដោយរថយន្តមួយគ្រឿង បានមកបុកពីក្រោយពេញទំហឹង។ ហេតុការណ៍នេះបានកើតឡើងនៅវេលាម៉ោង៥ល្ងាច ថ្ងៃទី១៨ ខែធ្នូ ឆ្នាំ២០២០ នៅលើផ្លូវជាតិលេខ៦ ចន្លោះគីឡូម៉ែត្រលេខ៧៣-៧៤ (ផ្លូវបំបែកស្គន់ សៀមរាប)ភូមិតាសែន ឃុំសូទិព្វ ស្រុកជើងព្រៃ ហើយអ្នកបើកបររថយន្តបានរត់គេចខ្លួនបាត់ចោលរថយន្តក្រោយពីបានបង្កហេតុ។
នគរបាលចរាចរណ៍ស្រុកជើងព្រៃប្រាប់ឲ្យដឹងថា មុនពេលកើតហេតុម៉ូតូជិះគ្នាចំនួន២នាក់ ដោយបានបើកបរក្នុងទិសដៅពីភ្នំពេញមកកំពង់ចាម ស្របពេលមកដល់ត្រង់ទីតាំងផ្លូវបំបែក ក៏ស្រាប់តែមានរថយន្តម៉ាកគា(KIA TITAN)ពណ៌ខៀវ ពាក់ស្លាកលេខ កំពង់ស្ពឺ 2A-1912 អ្នកបើកបរមិនស្គាល់អត្តសញ្ញាណ(គេចខ្លួនបាត់)បើកពីទិសខាងលិចទៅកើត មកដល់ចំណុចខាងលើបានបុកម៉ូតូម៉ាក (Beat) ពណ៌សគ្មានស្លាកលេខពីក្រោយ បើកបរដោយឈ្មោះ ឃុន ស្រីម៉ី ភេទស្រី អាយុ១៨ឆ្នាំ ទីលំនៅភូមិសង្កែពង ឃុំស្រម៉រ ស្រុកជើងព្រៃខេត្តកំពង់ចាម(អត់ពាក់មួកសុវត្ថិភាព)បណ្តាលឲ្យស្លាប់ និងរបួសមនុស្សម្នាក់ស្រី អ្នករួមដំណើរឈ្មោះសុខ ស្រីនាង ភេទស្រី អាយុ១៤ឆ្នាំ នៅភូមិ ឃុំជាមួយគ្នា។
បន្ទាប់ពីកើតហេតុអ្នកបើកបររថយន្តបានប្រញាប់បើកទ្វារត់គេចខ្លួនបាត់ស្រមោលមុនពេលកម្លាំងនគរបាលចរាចរណ៍ចុះទៅដល់។ អ្នករងគ្រោះដែលជាអ្នកបើកម៉ូតូត្រូវបានសមត្ថកិច្ចនាំមកសង្គ្រោះជាបន្ទាន់នៅមន្ទីរពេទ្យបង្អែកស្រុកជើងព្រៃ។នគរបាលចរាចរណ៍ស្រុកជើងព្រៃបញ្ជាក់ថា មូលហេតុដែលបង្កឱ្យគ្រោះថ្នាក់ចរាចរណ៍នេះកើតឡើងដោយសារតែរថយន្តបើកបរធ្វេសប្រហែសជែងក្នុងស្ថានភាពគ្រោះថ្នាក់។ សាកសពជនរងគ្រោះប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។
វត្ថុតាងបានយកមករក្សាទុកនៅអធិការដ្ឋាននគរបាលស្រុកជើងព្រៃជាបណ្ដោះអាសន្នដើម្បីរងចាំដោះស្រាយតាមច្បាប់។ សូមបញ្ជាក់ថា ត្រង់ទីតាំងកើតហេតុនេះ គឺឧស្សាហ៍កើតមានគ្រោះថ្នាក់ចរាចរណ៍ជាញឹកញាប់ នាពេលកន្លងមក ជាមួយនោះអាជ្ញាធរ និងស្ថាប័នជំនាញសាធារណៈការគ្រោងនឹងធ្វើរង្វង់មូល ដើម្បីបញ្ចៀសកុំឲ្យមានគ្រោះថ្នាក់ចរាចរណ៍កើតឡើងបន្តទៀត៕ ដោយ ៖ យ៉ាន់ ចាន់ថេត
ចែករំលែកព័តមាននេះ