ខេត្តស្វាយរៀង ៖ នៅថ្ងៃទី៨ ខែធ្នូ ឆ្នាំ២០២០ វេលាម៉ោង១ និង៥០នាទីរសៀល មានករណីគ្រោះថ្នាក់ចរាចរណ៍មួយដ៏អាក្រក់កើតឡើងរវាងរថយន្តកុងតឺន័រ និងរថយន្តកុងតឺន័រនៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ១៣៩-១៤០ស្ថិតក្នុងភូមិលៀប ឃុំកណ្តៀងរាយ ស្រុកស្វាយទាប ខេត្ត ស្វាយរៀង បង្កឲ្យរងបួសធ្ងន់០១នាក់។
បើតាមសមត្ថកិច្ចនគបាលស្រុកស្វាយទាបបានឲ្យដឹងថា មុនពេលកើតហេតុគេឃើញមានរថយន្តកុងតឺន័រ១គ្រឿង ម៉ាកHYUNDAI ពណ៌ស ពាក់ស្លាកលេខ ស្វាយរៀង ៣A-៧៨៨៨ និងសឺមីសណ្ដោងរ៉ឺម៉កពណ៌ក្រហម ពាក់ស្លាកលេខ ស្វាយរៀង៤A-០៨៨៨ បើកទិសដៅពីលិចទៅកើតបើកបរយ៉ាងលឿនលុះមកដល់កន្លែងកើតហេតុក៏បុកជាមួយរថយន្តកុងតឺន័រសណ្តោងរ៉ឺម៉ក១គ្រឿងទៀតដែលបើកបញ្ច្រាសទិសគ្នាលាន់ដូចរន្ទះបង្កឲ្យអ្នកបើកបរម្នាក់កៀបជាប់ក្នុងកាប៊ីនតែម្តង។
ប្រភពដដែលបន្តទៀតថា អ្នកបើកបរឈ្មោះហែម ហុង ភេទប្រុស អាយុ៥១ឆ្នាំ មុខរបរបើកបរ រស់នៅស្រុកថ្មពួក ខេត្តសៀមរាប (គ្មានរបួសស្នាមទេ បានរត់គេចខ្លួនពីកន្លែងកើតហេតុភ្លាមៗ)។ ចំណែករថយន្តកុងតឺន័រ១គ្រឿងទៀតម៉ាកHYUNDAI ពណ៌សខៀវ ពាក់ស្លាកលេខស្វាយរៀង៣F-២៨៥៤ និងសឺមីសណ្ដោងរ៉ឺម៉ក ពណ៌លឿង ពាក់ស្លាកលេខ ស្វាយរៀង ៤A-១៣៦៦ ទិសដៅពីកើតទៅលិចបញ្ច្រាសទិសគ្នា បើកបរដោយជនរងគ្រោះឈ្មោះ វ៉ន រិន ភេទប្រុស អាយុ៣០ឆ្នាំ មុខរបរបើកបរ រស់នៅភូមិកំពកភ្លើង ឃុំស្អាង ស្រុកស្អាង ខេត្តកណ្តាល រងរបួសជើងធ្ងន់កៀបជាប់ក្នុងកាប៊ីនរថយន្ត។
បន្ទាប់មកជនរងគ្រោះត្រូវសមត្ថកិច្ចគាស់ចេញពីកាប៊ីនរថយន្តហើយហៅរថយន្តសាមុយដឹកបញ្ចូនទៅសង្គ្រោះព្យាបាលនៅមន្ទីរពេទ្យបង្អែកស្រុកស្វាយទាប រឺឯមធ្យោបាយទាំងពីរ ខូចខាតធ្ងន់ បានយកមករក្សាទុកនៅអធិការដ្ឋាននគរបាលស្រុកស្វាយទាបដើម្បីដោះស្រាយតាមក្រោយ៕ ដោយ ៖ វ៉ាន់ ប៊ុនធឿន
ចែករំលែកព័តមាននេះ