ខេត្តស្វាយរៀង ៖ កសិករម្នាក់ឈ្មោះ សុខ សាំ ភេទប្រុស អាយុ៥៨ឆ្នាំ នៅភូមិតាស្អាងឃុំកំពង់ចំឡង ស្រុកស្វាយជ្រំ បាននិយាយប្រកបដោយសប្បាយរីករាយពីព្រោះបន្លែរបស់គាត់មានទីផ្សារ…
ខេត្តស្វាយរៀង ៖ កសិករម្នាក់ឈ្មោះ សុខ សាំ ភេទប្រុស អាយុ៥៨ឆ្នាំ នៅភូមិតាស្អាងឃុំកំពង់ចំឡង ស្រុកស្វាយជ្រំ បាននិយាយប្រកបដោយសប្បាយរីករាយពីព្រោះបន្លែរបស់គាត់មានទីផ្សារ ហើយលក់បានតម្លៃខ្ពស់ បើគិតជាមធ្យមក្នុងមួយខែ អាចរកប្រាក់ចំណូលបាន២លានរៀល ។
លោក សុខ សាំ បានប្រាប់អ្នកយកព័ត៌មានយើង កាលពីវេលាម៉ោង១១និង១៥នាទីព្រឹក ថ្ងៃទី៧ ធ្នូ ២០២០នេះថា គាត់បានរៀបការជាមួយប្រពន្ធគាត់ រយៈពេល៣០ឆ្នាំ មកហើយ មានកូន២នាក់ ស្រីម្នាក់ជាចំណងដៃ ។
ក្រោយពីរៀបការរួច គឺឪពុកម្តាយមិនបានចែកទ្រព្យសម្បត្តិអីទេ គ្មានដីស្រែរហូតដល់ឆ្នាំ១៩៩៣ ក៏នាំប្រពន្ធមករស់នៅក្នុងភូមិតាស្អាងនេះ ប្រកបមុខរបរនេសាទត្រីក្នុងព្រែកទន្លេវ៉ៃគោ ក្រោយមកបានទិញដីនៅមាត់ព្រែកអូស្មាច់សង់ខ្ទមរស់នៅរហូតបច្ចុប្បន្ន សន្សំប្រាក់ទិញដីបានទំហ១ហិកតា ហើយបានលើជាភូមិសង់ផ្ទះតូចមួយរស់នៅប្រកបមុខរបរនេសាទត្រីផង និងដាំដំណាំផងទើបមានជីវភាពល្អប្រសើរ ក៏ប៉ុន្តែ៥ឆ្នាំចុងក្រោយនេះត្រីខ្សត់រកលែងបាន ម្យ៉ាងមានអ្នកមានលុយម្នាក់គេមកប្រមូលទិញដីនៅតាមមាត់ព្រែក និងដីចំណីព្រែក ហើយចាក់ដីលប់ចំណីព្រែកជីករណ្តៅ ហ៊ុមព័ទ្ធធ្វើជាស្រះ តាមបណ្តោយព្រែកអូស្មាច់រហូតដល់ទន្លេវ៉ៃគោ ធ្វើឲ្យគ្រួសាររបស់គាត់ក៏ដូចជា អ្នកនេសាទមួយចំនួន បាត់បង់កន្លែងនេសាទ ក៏ងាកមកប្រកបមុខរបរដាំដំណាំបន្លែវិញ។ ក៏ប៉ុន្តែកន្លងមកការដាំបន្លែ គឺពិបាករកទីផ្សារដោយមានបន្លែនាំមកពីប្រទេសជិតខាងច្រើន ហើយលក់ថោកដូច្នេះពិបាកក្នុងការប្រកួតប្រជែងលើទីផ្សារ ។ ទើបតែមានវិបត្តិកូវីដ-១៩នេះ ឈ្មួញដែលនាំបន្លែពីប្រទេសជិតខាងត្រូវបានរិត្បិតពីអាជ្ញាធរតាមព្រំដែនធ្វើឲ្យបន្លែរបស់ពួកគាត់មានទីផ្សារ ។
លោកសុខសាំ បានឲ្យដឹងទៀតថា ផ្ទៃដីទំហំ១ហិកតា នេះគាត់ដាំដំណាំវិលជុំ រួមមានបន្លែត្រសក់ ត្រឡាច ននោងជ្រុង សណ្តែកគួ និងម្ទេស ហើយការរៀបចំជាកសិដ្ឋានរៀបចំប្រព័ន្ធទុយោទឹកស្រោចស្រប់ដំណាំតាមបែបបច្ចេកទេស មិនចាំបាច់រែកទឹកស្រោចដូចពីមុននោះទេ ។ ការដាំបន្លែនេះ គាត់ដាំ០២នាក់ កូនប្រុស អាយុ២៧ឆ្នាំ ពេលបានបន្លែ គឺដឹកទៅផ្សារប្រពន្ធគាត់ជាអ្នកលក់ ចំណែកកូនស្រីអាយុ២៣ឆ្នាំ ទៅធ្វើការនៅក្នុងរោងចក្រ ។ ហើយនៅឆ្នាំ២០២០នេះគាត់ដាំបន្លែវិល។
លទ្ធផលបន្លែ ត្រសក់១គីឡូ តម្លៃ២,៥០០រៀលទៅ២,៨០០រៀល ត្រឡាច១គីឡូតម្លៃ៣,០០០រៀល ម្រះ១គីឡូតម្លៃ៣,០០០រៀល. ននោងជ្រុង១គីឡូតម្លៃ ៣,០០០រៀល ។ ដូច្នេះជាមធ្យមក្នុង១ខែអាចរកប្រាក់ចំណូលបាន២លានរៀល ៕
ចែករំលែកព័តមាននេះ