ខេត្តរតនគិរី ៖ បុរសម្នាក់បានបាត់បង់ជីវិតពេលដឹកដល់មន្ទីរពេទ្យបង្អែកខេត្តខណៈដែលជួបគ្រោះថ្នាក់ចរាចរណ៍ជិះម៉ូតូមិនប្រុងប្រយ័ត្នត្រូវបុកជាមួយនឹងរថយន្តបញ្ច្រាសទិសគ្នាយ៉ាងពេញទំហឹង ។ ហេតុការណ៍គ្រោះថ្នាក់ចរាចណ៍នោះបានកើតឡើងនៅថ្ងៃទី២៧ ខែវិច្ឆិកា ឆ្នាំ២០២០ លើកំណាត់ផ្លូវជាតិលេខ៧៨ ផ្លូវបត់ចូលភូមិកក់ ស្ថិតក្នុងភូមិមួយ ឃុំឡាមិញ ស្រុកបរកែវ ខេត្តរតនគីរី។ ប្រភពពីសមត្ថកិច្ចបានឱ្យដឹងថា ជនរងគ្រោះដែលស្លាប់ក្នុងហេតុការនោះឈ្មោះ ស៊ី សុធាត់ ហៅតួ អាយុ២៣ឆ្នាំ ជនជាតិខ្មែរ មានទីលំនៅភូមិមួយឃុំឡាមិញ ស្រុកបរកែវ ខេត្តរតនគិរី។ ជិះម៉ូតូម៉ាក ZOOMER ពណ៌ក្រហម ពាក់ស្លាកលេខ ស្ទឹងត្រែង ១C-០៤៨៣។
ឯអ្នកបើកបររថយន្តបង្កគ្រោះថ្នាក់នោះឈ្មោះ ស៊ិន វាសនា ភេទប្រុស អាយុ៤៦ឆ្នាំ ជនជាតិខ្មែរ មានគ្នា២នាក់ ប្រពន្ធឈ្មោះ សុខ លីដា អាយុ៣៨ឆ្នាំ ជនជាតិខ្មែរ មានទីលំនៅភូមិឈើឈ្លើង ឃុំកំពង់ត្រាច ស្រុករមាសហែក ខេត្តស្វាយរៀង។ ជិះរថយន្តម៉ាក HYUNDAI MIGHTY ពណ៌ស ពាក់ស្លាកលេខ ភ្នំពេញ ៣F-២០៦៦។
ប្រភពពីលោកអធិការស្រុកបរកែវបានឱ្យដឹងថា មូលហេតុដែលបណ្ដាលឱ្យមានគ្រោះចរាចរណ៍នេះ ដោយសារជនរងគ្រោះជិះម៉ូតូក្នុងល្បឿនលឿនហើយឆ្លងចូលក្នងកន្លងផ្លូវរថយន្តទៀតផងទើបត្រូវរថយន្តបុកពេញទំហឹងតែម្តង។ ក្រោយកើតហេតុរថយន្ត និងម៉ូតូត្រូវបានកម្លាំងយកមករក្សាទុកនៅប៉ុស្ដិ៍រដ្ឋបាលឃុំឡាមិញដើម្បីដោះស្រាយតាមក្រោយ។ ឯសាកសពជនរងគ្រោះសមត្ថកិច្ចធ្វើកំណត់ហេតុប្រគល់ឱ្យសាច់ញាតិយកទៅធ្វើបុណ្យតាមប្រពៃណីផងដែរ៕ ដោយ ៖ ផង់ វិន
ចែករំលែកព័តមាននេះ