រាជធានីភ្នំពេញ ៖ ក្រសួងកិច្ចការនារី សហការ ជាមួយក្រសួងព័ត៌មាន ក្លឹបអ្នកាសែត និងអង្គការអាក់សិនអេតកម្ពុជាគាំទ្រថវិកាដោយស្ថានទូតបារាំងប្រចាំនៅកម្ពុជា រៀបចំសិក្ខាសាលាស្តីអំពី «លើកកម្ពស់ការយល់ដឹងពីការអនុវត្តក្រមប្រតិបត្តិប្រព័ន្ធផ្សព្វផ្សាយ សម្រាប់ការរាយការណ៍អំពើហិង្សាលើស្ត្រី» នៅថ្ងៃទី ២៧ ខែ វិច្ឆិកា ឆ្នាំ២០២០នៅក្រសួងកិច្ចការនារី។
កម្មវិធីនេះត្រូវបានដាក់ឱ្យអនុវត្តនៅឆ្នាំ២០១៧ ក្នុងគោលបំណងសំខាន់ ៣ ៖ ទី១) ផ្សព្វផ្សាយ និងលើកទឹកចិត្តឱ្យសិក្ខាកាម ចូលរួមអនុវត្តក្រមប្រតិបត្តិប្រព័ន្ធផ្សព្វផ្សាយ សម្រាប់ការរាយការណ៍ព័ត៌មានអំពើហិង្សាលើស្ត្រី ឱ្យកាន់តែមានប្រសិទ្ធភាព។ ទី២) ដើម្បីឱ្យសិក្ខាកាមបានយល់ដឹងបន្ថែមពីឬសគល់ ព្រមទាំងផលប៉ះពាល់នៃអំពើហិង្សាលើស្ត្រី និងដឹងពីរបៀបក្នុងការផ្តល់សេវាជួយជនរងគ្រោះដោយអំពើហិង្សា។ និងទី៣) ដើម្បីលើកទឹកចិត្តឱ្យសិក្ខាកាមចូលរួមអនុវត្ត ក្រមប្រតិបត្តិប្រពន្ធ័ផ្សព្វផ្សាយ សម្រាប់ការរាយការណ៍ព័ត៌មានអំពើហិង្សាលើស្ត្រី កាន់តែមានប្រសិទ្ធិភាព។
នាឳកាសនោះផងដែរ លោកជំទាវ ប៊ុនពុទ្ធី អនុរដ្ឋលេខាធិការ ក្រសួងកិច្ចការនារី និងជាប្រធានក្រុមការងារតាមដាន ការអនុវត្តក្រមនេះ បានមានប្រសាសន៍ថា «រាជរដ្ឋាភិបាលកម្ពុជា និងអ្នកជំនាញ ទទួលស្គាល់ថា ការងារលើកកម្ពស់សមភាពយេនឌ័រ ក៏ដូចជាការទប់ស្កាត់អំពើហិង្សាលើស្ត្រីនិងក្មេងស្រី គឺចាំបាច់ណាស់ត្រូវការការចូលរួមពីគ្រប់ដៃគូពាក់ព័ន្ធនៅក្នុងសង្គម ជាពិសេសតាមរយៈតួនាទីយ៉ាងសំខាន់របស់ប្រព័ន្ធផ្សព្វផ្សាយព័ត៌មាន និងបណ្តាញផ្សព្វផ្សាយសង្គម ដែលជាភ្នាក់ងារដ៏មានឥទ្ធិពលលើសាធារណជនទូទៅ»។
សូមជម្រាបជូនផងដែរថា ក្នុងឆ្នាំ២០១៧ “ក្រមប្រតិបត្តិប្រព័ន្ធផ្សព្វផ្សាយ សម្រាប់ការរាយការណ៍អំពើហិង្សាលើស្ត្រី” ត្រូវបានប្រកាសឱ្យអនុវត្តក្រមនេះដែលមាន ១៥ប្រការផងដែរ ដោយមានការចុះហត្ថលេខារួម រវាងក្រសួងព៍ត៌មាននិងក្រសួងកិច្ចការនារី។ ក្នុងនោះនៅក្នុងប្រការ១០ បានចែងថា៖ សារព័ត៌មានគួរប្រើប្រាស់ភាសាឱ្យបានសមរម្យ នឹងសុក្រឹត ដើម្បីរក្សាភាពថ្លៃថ្នូររបស់ជនរងគ្រោះនៅពេលរៀបរាប់អំពីករណីអំពើហិង្សាលើស្ត្រី។ ត្រូវចៀសវាងប្រើប្រាស់ពាក្យដូចជា ស្រីសាវា ខ្ជិលច្រអូស អាស សហាស្មន់ ល្មោភកាម ជាដើមទៅលើជនរងគ្រោះ និងភាសាអសុរោះដែលមិនសមរម្យផ្សេងទៀត នៅពេលដែលរៀបរាប់អំពីអំពើហិង្សាលើស្ត្រី។
លោកជំទាវ សង្កតធ្ងន់ថា «សារព័ត៌មាន ពិតជាមានតួនាទីសំខាន់ណាស់ ក្នុងការទប់ស្កាត់អំពើហិង្សាលើស្ត្រី ជាពិសេសតួនាទីក្នុង ការផ្តល់ព័ត៌មាននិងសារនានា ដើម្បីជួយដល់ជនរងគ្រោះទទួលបាននូវភាពយុត្តិធម៌ និងលើកទឹកចិត្តដល់សង្គម និងអ្នកពាក់ព័ន្ធក្នុងការជួយគាំទ្រដល់ជនរងគ្រោះ ដោយគ្មានការរើសអើង និងជំរុញការអនុវត្តច្បាប់ ព្រមទាំងការបញ្ជាក់យ៉ាងច្បាស់ អំពីគ្មានវប្បធម៌លើកលែងទោសដល់ជនល្មើសឬអ្នកប្រព្រឹត្ត»។
លោក Laurent Triponey ទីប្រឹក្សាទីមួយនៃស្ថានទូតបារាំងប្រចាំកម្ពុជា បានមានប្រសាសន៍ថា «ស្ថានទូតបារាំងមានសេចក្តីរីករាយក្នុងការជួយគាំទ្រដល់វគ្គបណ្តុះបណ្តាលនេះ ព្រោះការលើកកម្ពស់សមភាពរវាងបុរសនិងស្ត្រី គឺជាអាទិភាពមួយនៃគោលនយោបាយរបស់រដ្ឋាភិបាលបារាំង។ ក្នុងន័យនេះ ប្រទេសបារាំងបានដាក់ចេញនូវយុទ្ធសាស្ត្រអន្តជាតិមួយសម្រាប់ឆ្នាំ២០១៨-២០២២ ដើម្បីលោកស្ទួយសមភាពយែនឌ័រ ដោយរួមបញ្ចូលផងដែរនូវការការពារស្ត្រីប្រឆាំងនឹងអំពើហិង្សាគ្រប់ទម្រង់»។
សូមជម្រាបជូនថា អង្គការអាក់សិនអេតកម្ពុជា បានចូលរួមឃ្លាំមើលប្រព័ន្ធផ្សព្វផ្សាយដើម្បីតាមដានការអនុវត្តក្រមសីលធម៌ក្នុងចំណោមអ្នកសារព័ត៌មាននៅលើប្រព័ន្ធផ្សព្វផ្សាយសង្គម។ ក្រុមការងារអង្គការអាក់សិនអេតកម្ពុជា បានរកឃើញថាករណីអំពើហឹង្សាលើស្ត្រីត្រូវបានអ្នករាយការណ៍ព័ត៌មាន និងអ្នកអត្ថាធិប្បាយព័ត៌មាន មួយចំនួន បានធ្វើសេចក្តីរាយការណ៍ ប្រាសចាកពីក្រមប្រតិបត្តិប្រព័ន្ធផ្សព្វផ្សាយ សម្រាប់ការរាយការណ៍អំពើហិង្សាលើស្ត្រី និងវិជ្ជាជីវៈអ្នកសារព័ត៌មាន៕
ចែករំលែកព័តមាននេះ