រាជធានីភ្នំពេញ ៖ រដ្ឋមន្ត្រីក្រសួងសុខាភិបាលបានអះអាងថា រហូតមកដល់ពេលនេះ កម្ពុជាមិនទាន់ទទួលបានវ៉ាក់សាំងព្យាបាលជំងឺកូវីដ១៩ ផ្លូវការនោះទេ ។ ការលើកឡើងរបស់រដ្ឋមន្ត្រីក្រសួងសុខាភិបាលនេះ ក្រោយមានការចេញផ្សាយព័ត៌មានថា ប្រទេសដែលរកឃើញវ៉ាក់សាំងកូវីដ១៩ នេះនឹងផ្តល់មកកម្ពុជា ។
ឯកឧត្តមម៉ម ប៊ុនហេង រដ្ឋមន្ត្រីក្រសួងសុខាភិបាលបានឲ្យដឹងនៅថ្ងៃទី២៦ ខែវិច្ឆិកា ឆ្នាំ ២០២០ នៅព្រលានយន្តហោះអន្តរជាតិភ្នំពេញមុននឹងនាំយកម៉ាស់ជាង២លាន និងសំ ភារៈពេទ្យមួយចំនួនទៀតថា ដូចអ្វីដែលសម្តេចតេជោហ៊ុន សែន នាយករដ្ឋមន្ត្រីលើកឡើង ថា កម្ពុជាជាប្រទេសតូចមែន តែបេះដូងទូលាយក្នុងការជួយប្រទេសជិតខាង តាមលទ្ធភាព ។
ឯកឧត្តមបានបន្តថា ម៉ាស់ដែលកម្ពុជានាំយកទៅមានម៉ាស់សម្រាប់ប្រជាពលរដ្ឋ ម៉ាស់ សម្រាប់គ្រួពេទ្យទៅមើលអ្នកជំងឺក៏ដូចជា យកសំណាក និងសំភារៈពេទ្យសម្រាប់ជួយអ្នកជំងឺ ។ ឯកឧត្តមរដ្ឋមន្ត្រីបានលើកឡើងទៀតថា ទោះបីជាការផ្តល់ជូនទៅកាន់ប្រទេសមួយចំនួនរួចមកហើយ ហើយម៉ាស់មានការសល់ខ្លះក្តី ក៏ប្រមុខរាជរដ្ឋាភិបាលបានអនុញ្ញាតឲ្យ ទិញបន្ថែម ដើម្បីបំពេញខ្វះខាត និងសម្រាប់ការប្រើប្រាស់នៅក្នុងប្រទេស ។
ឯកឧត្តមគូសបញ្ជាក់ថា ៖«ទោះបីមានការធូរស្រាលចំពោះជំងឺកូវីដ១៩ នៅកម្ពុជាពិ សេសនោះព្រឹត្តិការណ៍៣វិច្ឆិកា តែយើងត្រូវតែរក្សាគម្លាត និងគោរពតាមវិធានការសុខាភិបាលជានិច្ច ។ អាលូវនេះអ្នកធ្វើដំណើរមកពីក្រៅត្រូវធ្វើចត្តាឡីស័ក១៤ថ្ងៃ តែកាលពីមុន ចំពោះយន្តហោះដែលរកមិនឃើញឆ្លងជំងឺកូវីដ១៩ យើងអនុញ្ញាតឲ្យធ្វើចត្តាឡីស័កនៅផ្ទះតែអត់ទេអាលូវនេះ គឺត្រូវធ្វើចត្តាឡីស័កនៅកន្លែងដែលរៀបចំច្បាស់លាស់» ។
រដ្ឋមន្ត្រីក្រសួងសុខាភិបាលបានលើកឡើងទៀតថា ទោះបីជាមានប្រទេសមួយចំនួនរកឃើញវ៉ាក់សាំងព្យាបាលជំងឺកូវីដ១៩ក្តី តែកម្ពុជាកំពុងរងចាំ តែវ៉ាកសាំងនេះមិនទាន់មានការប្រកាសជាផ្លូវការនោះទេ ។ ឯកឧត្តមបញ្ជាក់ថា៖«យើងមិនទាន់ទទួលបានជាផ្លូវការនោះទេ សម្រាប់វ៉ាក់សាំងព្យាបាលជំងឺកូវីដ១៩ យើងគ្រាន់បានឮគេសរសេរតែប៉ុណ្ណោះ ។ តែយើងកំពុងចាំវ៉ាក់សាំង តែវ៉ាក់សាំងមានច្រើនណាស់ គេមិនទាន់ឲ្យព័ត៌មានជាផ្លូវការនោះទេ ។ គេនិយាយតែមាត់ ហើយខ្ញុំមិនទាន់ទទួលបានឯកសារជាផ្លូវការនោះទេ ដូចជាផលប៉ះពាល់ ឬប្រសិទ្ធភាពនោះទេ ខ្ញុំឮតែតាមសារព័ត៌មាននោះទេ» ។
ឯកឧត្តមបន្ថែមថា យើងមិនទាន់ទទួលបានវ៉ាក់សាំងណាមួយនោះទេ ព្រោះយើងមិនទាន់មានអ្នកស្លាប់នោះទេ តែបើយើងយកមកបែរជាមានបញ្ហា គឺពិបាក ដូច្នេះយើងត្រូវតែប្រុងប្រយ័ត្ន ។ រដ្ឋមន្ត្រីបានលើកឡើងថា សម្រាប់ប្រទេសគេមានមនុស្សឈឺច្រើន និងស្លាប់ច្រើនទើបគេយកវ៉ាក់សាំងសាកល្បង តែកម្ពុជាមិនមានទេ ព្រោះកម្ពុជាឆ្លងសុទ្ធតែជាអ្នកនាំយកពីក្រៅ ។ យើងឃើញថា ប្រជាពលរដ្ឋបានទទួលការអប់រំ និងអនុវត្តន៍បានល្អចំពោះវិធានការសុខាភិបាល ៕
ចែករំលែកព័តមាននេះ