ហុងកុង ៖ កំពូល​តារា​សម្តែង និង​ជា​អ្នកដឹកនាំ​រឿង​ដ៏​ល្បីល្បាញ​របស់​ហុងកុង លោក Stephen Chow ដែល​ប្រជាជន​ខ្មែរ​ស្គាល់​យ៉ាង​ច្បាស់​បំផុត​គឺ «​ទិន​ហ្វី​» ត្រូវ​បាន​អតីត​មិត្ត​ស្រី​គឺ​នាង Alice Yu ប្តឹង​ពី​បទ​មិន​បាន​បង់ប្រាក់​កម្រៃជើងសារ​ដល់​រូប​នាង ដែល​មាន​ចំនួន​ជាង៧០​លាន​ដុល្លារ​ហុងកុង ស្មើនឹង​១២​លាន​ដុល្លារ​អា​មេ​រិ​ក​។

Stephen Chow ដែល​បច្ចុប្បន្ន​ឈាន​ដល់​អាយុ ៥៨​ឆ្នាំ និង​នាង Alice Yu ដែល​គេ​ជឿ​ថា​មាន​អាយុ​ជាង ៤០​ឆ្នាំ​បាន​ចែកផ្លូវ​គ្នា​កាលពី​ឆ្នាំ ២០១០ កន្លង​ទៅ បន្ទាប់​ពី​មាន​ទំនាក់ទំនង​ស្នេហា​អស់​រយៈពេល ១៣​ឆ្នាំ​។

នាង Alice Yu គឺជា​កូនស្រី​របស់​អ្នកជំនួញ​អចលនទ្រព្យ លោក Yu Ching Po ហើយ​ក៏​ជា​ដៃគូ​ជំនួញ​អចលនទ្រព្យ​ជាមួយ​ទិន​ហ្វី​ផង​ដែរ អំឡុង​ពេល​ដែល​ពួក​គេ​មាន​ទំនាក់ទំនង​ស្នេហា​ជាមួយ​គ្នា​។

យោង​តាម​ឯកសារ​តុលាការ​បានឱ្យ​ដឹង​ថា Alice Yu បាន​សម្រេច​ប្តឹង​អតីត​មិត្ត​ប្រុស បន្ទាប់​ពី​នាង​មិន​ទាន់​ទទួល​បានការ​ផ្តល់​ណាមួយ​ពី Stephen Chow សូ​ម្បី​តែ​មួយ​សេន តាម​ការ​ព្រមព្រៀង​ជាមួយ​គ្នា​កាលពី​ពេល​កន្លង​ទៅ ពាក់ព័ន្ធ​នឹង​ប្រាក់​កម្រៃជើងសារ ដែល​នាង​ត្រូវ​ទទួល​បាន​ពី​ជំនួញ​រវាង​ពួក​គេ​ទាំង​២​។

សវនាការ​ដំបូង​ត្រូវ​បាន​ធ្វើ​ឡើង​កាល​ថ្ងៃ​ពុធ ១៨ វិច្ឆិកា កន្លង​ទៅ ខណៈ​ដែល​មេធាវី​របស់ Stephen Chow បាន​អះអាង​ថា ការ​ផ្តល់​ជូន​ប្រាក់​កម្រៃជើងសារ​ដល់ Alice Yu ពី​ចំណែក​នៃ​ប្រាក់​ចំណេញ​លើ​ការ​វិនិយោគ​របស់​ពួក​គេ​ទាំង​២ គឺ​មិន​ត្រូវ​បាន​គោរព​តាម​ផ្លូវច្បាប់​នោះ​ទេ​។ ព្រោះ​វា​គ្រាន់តែ​ជា​ករណី​ដែល​សា​ម៉ី​ខ្លួន​ទាំង​សងខាង សន្យា​ជាមួយ​គ្នា​ដោយ​មាត់​ទៅ​វិញ​ទៅ​មក​តែ​ប៉ុណ្ណោះ​។ ហើយ​ការ​ជំនុំជម្រះ បាន​បន្ត​រហូត​ដល់​ថ្ងៃ​ទី​១៩ វិច្ឆិកា ដោយ​ក្នុង​នោះ​នាង Alice Yu បាន​បង្ហាញខ្លួន​ដោយ​ផ្ទាល់ ដើម្បី​ប្រាប់​រឿងរ៉ាវ​ទាំងអស់​របស់​នាង​ទៅ​ដល់​តុលាការ​៕ (​ដកស្រង់​ចេញពី Asiaone និង 8days)