រាជធានីភ្នំពេញ ៖ ដោយសារតែមានឪពុកជាតន្ដ្រីករ ម្ដាយជាអ្នកចំរៀង នាងនៅ ស្រីពៅ បានហាត់រៀនពីពួកគាត់តាំងពីកុមារភាពមក ហើយនៅពេលពេញវ័យនាងបានចាប់អាជីពជាអ្នកចំរៀងក្នុងក្រុមតន្ដ្រីរបស់ឪពុកម្ដាយដែលប្រគំនៅតាមកម្មវិធីមង្គលការនៅឯខេត្ដកំពង់ស្ពឺដែលជាស្រុកកំណើតរបស់នាង។ នាង នៅ ស្រីពៅ ក្នុងវ័យ២៥ឆ្នាំ បានរៀបរាប់ឱ្យដឹងថា នាងមានស្រុកកំណើតនៅស្រុកច្បារមន ហើយមានបងប្អូន៧នាក់ ក្នុងនោះប្រុស២នាក់ ចំណែកនាងជាកូនទី៤ ។
ក្នុងក្រុមគ្រួសារនាងសុទ្ធតែជាអ្នកសិល្បៈចំរៀងទាំងអស់គ្នា តែអភ័ព្វតែនាង ក្រោយពេលរៀបការរស់នៅជាមួយគ្នាមិនបានប៉ុន្មានឆ្នាំផង ក៏លែងលះគ្នាវិញដោយរស់នៅមិនចុះសំរុងនឹងគ្នា ។ នាងនៅ ស្រីពៅ បានរៀបការកាលពី ឆ្នាំ១៩៩៩ ហើយនៅឆ្នាំ២០០០ នាងមករស់នៅភ្នំពេញចាប់អាជីពជាអ្នកចំរៀងនៅតាមភោជនីយដ្ឋានរហូតសព្វថ្ងៃ។ នាងច្រៀងមិនប្រកាន់ថា បទមនោសញ្ចេតនាឬបទឌីស្កូញ័រញាក់កន្ដ្រាក់អារម្មណ៍ទេ គឺនាងច្រៀងទាំងអស់។ នាងនៅ ស្រីពៅ រៀបរាប់ថា ក្រោយពីនាងបែកបាក់ស្វាមីទៅជីវិតរបស់នាងរស់នៅល្ហល្ហេវខ្លាំងណាស់ តែដោយសារតែនាងជាអ្នកសិល្បៈចំរៀងនាងសប្បាយច្រើនធ្វើឱ្យភ្លេចរឿងស្នេហា ហើយគិតតែពីអាជីពរកប្រាក់ចិញ្ចឹមជីវិតប៉ុណ្ណោះ ។ ទោះជាយ៉ាងណាក្ដី នាងបានគិតឃើញដល់ទ្រឹស្ដីមួយថា “ជីវិតត្រូវតែតស៊ូ” ដូច្នេះហើយទើបពីមួយថ្ងៃទៅមួយថ្ងៃ នាងខិតខំតស៊ូក្នុងអាជីពរបស់ខ្លួន ។ មិនត្រឹមតែច្រៀងក្នុងភោជនីយដ្ឋានប៉ុណ្ណោះទេ ស្រីពៅធ្លាប់ថតសំលេងឱ្យផលិតកម្មក្រៅ ប្រទេសមួយចំនួន ជាពិសេសនោះផលិតកម្មមរតក។ ជាងនេះទៀតនាងធ្លាប់មានកិត្ដិយសឡើងច្រៀងជាកិត្ដិយសក្នុងកម្មវិធីប្រគំតន្ដ្រីចុងសបា្ដហ៍តាមស្ថានីយទូរទស្សន៍នានាជារឿយៗ ។
ស្ដ្រីមេម៉ាយគ្មានកូនដ៏ស្រស់សោភារូបនេះឱ្យដឹងថា ក្រោយពីបែកបាក់ពីស្វាមីជាង៥ឆ្នាំកន្លងមកនេះ នាងភ្លេចអស់ហើយរឿងស្នេហា ទោះបីជាកន្លងមក មានបុរសជាច្រើនសុំសេចក្ដីស្នេហាពីនាងយ៉ាងណាក៏ដោយ ក៏នាងតែងតែបដិសេធដោយរអានឹងការបែកបាក់គ្នាវិញដោយសារចិត្ដមិនស្មោះ ។ ទោះជាយ៉ាងណាក្ដី នាងនិយាយថា បើមាននិស្ស័យជួបបុរសមានចិត្ដស្មោះនាងនឹងផ្ញើប្រាណទៅលើបុរសនោះឱ្យគេថែរក្សានាងដល់ចាស់ព្រឹទ្ធចាស់ព្រេង ៕
ចែករំលែកព័តមាននេះ