ខេត្តកំពង់ឆ្នាំង ៖ លោកអ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង បានដឹកនាំសមត្ថកិច្ចចម្រុះ មន្ត្រីជំនាញជលផល ព្រមទាំងកម្មសិក្សាជាចៅក្រម ចុះធ្វើការបង្ក្រាប និងស្វែងយល់ពីបទល្មើសនេសាទ…
ខេត្តកំពង់ឆ្នាំង ៖ លោកអ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង បានដឹកនាំសមត្ថកិច្ចចម្រុះ មន្ត្រីជំនាញជលផល ព្រមទាំងកម្មសិក្សាជាចៅក្រម ចុះធ្វើការបង្ក្រាប និងស្វែងយល់ពីបទល្មើសនេសាទ នៅក្នុងភូមិសាស្ត្រនានា ក្នុងស្រុកកំពង់លែងនិងស្រុកជលគិរី ខេត្តកំពង់ឆ្នាំង ។
កិច្ចការចុះបង្ក្រាបនិងស្វែងយល់ស្ដីពីបទល្មើសនេសាទនេះ បានធ្វើឡើងរយៈពេលពេញមួយថ្ងៃ កាលពីថ្ងៃទី៩ ខែវិច្ឆិកា ឆ្នាំ២០២០ ។
នៅក្នុងឱកាសនោះព្រះរាជអាជ្ញាអមសាលាដំបូងខេត្តកំពង់ឆ្នាំង លោក អ៊ិត សុធា បានផ្ដាំផ្ញើដល់សិស្សចៅក្រម កម្មសិក្សាទាំងអស់ត្រូវបង្កើនការយកចិត្តដាក់ ក្នុងរយៈពេលធ្វើកម្មសិក្សា៦ខែនេះ ធ្វើយ៉ាងណាពង្រឹងសមត្ថភាពឲ្យខ្លាំង មុននឹងចេញទៅបម្រើការងារនៅអង្គភាពស្ថាប័នយុត្តិធម៌ ដើម្បីឲ្យមានប្រសិទ្ធភាពខ្ពស់ និងធានា ដល់ការបំពេញតួនាទីរបស់ខ្លួនគឺចៅក្រម នៅពេលចូលទៅបំពេញការងារក្នុងក្របខណ្ឌរបស់រដ្ឋ ។
ក្នុងឱកាសនោះដែរ ព្រះរាជអាជ្ញាអមសាលាដំបូងខេត្តក៏បានផ្ដាំផ្ញើនិងសំណូមពរដល់បងប្អូនប្រជាពលរដ្ឋ ដែលរកស៊ីនេសាទ ធ្វើយ៉ាងណាកុំប្រើប្រាស់នូវឧបករណ៍នេសាទខុសច្បាប់ ដែលបានកំណត់ ជាសវាងការខាតបង់ទ្រព្យសម្បត្តិនិងថវិកា នៅពេលដែល សមត្ថកិច្ចចុះធ្វើការបង្ក្រាបនិងរឹបអូស យកមករក្សាទុក ។
នៅក្នុងឱកាសនោះដែរ កម្មសិក្សាជាចៅក្រមបានចាប់អារម្មណ៍ពីបទល្មើសនេសាទ ដែលបានកើតឡើងនៅក្នុងភូមិសាស្ត្រដងទន្លេ ដោយបានបញ្ជាក់ថាបទល្មើសនេសាទ ពិតជានៅកើតមានពិតមែន ។បទល្មើសទាំងនោះមាន ដូចជាការដាក់របាំងស្បៃមុង របាំងសាច់អួនក្រឡាញឹក ដែលមានប្រវែង វែងខុសនឹងច្បាប់ស្ដីពីជលផល ៕ (កែសម្រួលដោយ ៖ ធីតា)
ចែករំលែកព័តមាននេះ