ខេត្តប៉ៃលិន ៖ យុវជនម្នាក់ក្នុងចំណោម២នាក់ ខណៈពេលកំពុងអង្គុយលេងលើម៉ូតូសុខៗ ត្រូវជនសង្ស័យពីរនាក់ពាក់ម៉ាស់បិទមុខជិះម៉ូតូ១គ្រឿងមកក្បែរដកដាវសាមួរ៉ៃកាប់ប្រហារបណ្តាលឱ្យរងរបួសខ្នង និងប្រអប់ដៃស្តាំស្ទើរដាច់ ហើយគេចខ្លួនបាត់។
ហេតុការណ៍នេះបានកើតឡើងកាលពីវេលាម៉ោង១២ និង៣០នាទីថ្ងៃត្រង់ ថ្ងៃទី២៣ ឧសភា ២០១៥ ស្ថិតនៅចំណុចក្បែរផ្ទះសំណាក់មួយក្នុងភូមិដីថ្មី ឃុំស្ទឹងកាច់ ស្រុកសាលាក្រៅ ។
យុវជនរងគ្រោះឈ្មោះ ដា និត ភេទប្រុស អាយុ១៩ឆ្នាំ ជាកម្មករធ្វើការនៅប្រទេសថៃ រងរបួសខ្នងស្រាល និងរបួសប្រអប់ដៃស្តាំដេរអស់ច្រើនថ្នេរ និងម្នាក់ទៀតឈ្មោះ ចិត្រា ហៅយួន ភេទប្រុស អាយុ១៨ឆ្នាំ រត់គេចទាន់ពេល ទាំងពីរនាក់រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ។ ចំណែកឯជនដៃដល់ត្រូវគេស្គាល់ឈ្មោះ សំភ័ស្ត ភេទប្រុស អាយុ១៩ឆ្នាំ ជាអ្នកយកដាវសាមួរ៉ៃកាប់ប្រហារទៅលើជនរងគ្រោះ និងម្នាក់ទៀតមិនស្គាល់អត្តសញ្ញាណជាអ្នកបើកបរម៉ូតូ រស់នៅភូមិដីថ្មី ឃុំស្ទឹងកាច់ ស្រុកសាលាក្រៅ ។
សូមបញ្ជាក់ថា កាលពីមុនជនរងគ្រោះធ្លាប់ឈ្លោះប្រកែកទាស់ពាក្យសម្តីជាមួយជនសង្ស័យបន្តិចបន្តួចដែរ រួចក៏បែកគ្នារៀងៗខ្លួនទៅធ្វើការនៅប្រទេសថៃ លុះត្រឡប់មកវិញក៏ត្រូវជនដៃដល់កាប់ប្រហារតែម្តង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ