អាជ្ញាធរទុកពេល១០ថ្ងៃ ឲ្យរុះរើសំណង់នានាលើប្រព័ន្ធលូ ក្នុងបុរី នៅខណ្ឌពោធិ៍សែនជ័យ
រាជធានីភ្នំពេញ ៖ នាព្រឹកថ្ងៃទី២៩ ខែតុលា ឆ្នាំ២០២០នេះ លោក ប៉ាង លីដា អភិបាលរងខណ្ឌពោធិ៍សែនជ័យ បានដឹកនាំក្រុមការងារខណ្ឌ…
រាជធានីភ្នំពេញ ៖ នាព្រឹកថ្ងៃទី២៩ ខែតុលា ឆ្នាំ២០២០នេះ លោក ប៉ាង លីដា អភិបាលរងខណ្ឌពោធិ៍សែនជ័យ បានដឹកនាំក្រុមការងារខណ្ឌ និងជំនាញដែនដីខណ្ឌ បន្តចុះវាស់វែងលើកំណត់ផ្លូវ នៅក្នុងបុរីពិភពថ្មី(ត្រពាំងថ្លឹង) និងបុរីពិភពថ្មី២ ក្នុងភូមិត្រពាំងថ្លឺង៤ សង្កាត់ចោមចៅទី១ ខណ្ឌពោធិ៍សែនជ័យ និងដាក់លិខិតឲ្យរុះរើ ដោយទុករយៈពេល១០ថ្ងៃ ។
ការឲ្យរុះរើ ក្នុងរយៈពេល១០ថ្ងៃនេះ ដោយរដ្ឋបាលខណ្ឌពោធិ៍សែនជ័យ បានសង្កេតឃើញថា ម្ចាស់បុរី និងបងប្អូនប្រជាពលរដ្ឋដែលរស់នៅក្នុងបុរី បានធ្វើការសាងសងសំណង់បន្ថែម នៅលើសំណង់ចាស់ ដែលមានស្រាប់ខុសពីច្បាប់អនុញ្ញាតឲ្យសាងសង់ ។ ម្យ៉ាងវិញទៀត ម្ចាស់បុរី មិនបានយកចិត្តទុកដាក់ក្នុងការកែលម្អប្រព័ន្ធលូបង្ហូរទឹក រហូតទៅដល់បងប្អូនប្រជាពលរដ្ឋខ្លះ បានធ្វើការសាងសង់សំណង់ផ្សេងៗ បិទអណ្ដូងលូ និងប្រព័ន្ធលូបង្ហូរទឹកថែមទៀត ។
អាស្រ័យដូច្នេះ ដើម្បីចូលរួមការស្ដារអណ្ដូងលូ និងកែលម្អប្រព័ន្ធលូឡើងវិញ ចៀសវាងការជន់លិចដោយសារទឹកភ្លៀង ឫទឹកជំនន់ផ្សេងៗ ស្នើលោក-លោកស្រីម្ចាស់បុរី ទាំងអស់ និងបងប្អូនប្រជាពលរដ្ឋទាំងអស់ ដែលរស់នៅក្នុងបុរី ចូលរួមរក្សាឲ្យបាននូវសណ្ឋានភាពដើម មិនសាងសង់បន្ថែម និងត្រូវរុះរើ សំណង់នានា ដែលបានសង់រំលោភលើចិញ្ចើមផ្លូវ និងអណ្ដូងលូចេញឲ្យអស់ចាប់ពីថ្ងៃជូនដំណឹងនេះតទៅ ។
ក្នុងករណី អស់លោក-លោកស្រី មិនអនុវត្តតាម ការជូនដំណឹងខាងលើនេះទេ រដ្ឋបាលខណ្ឌពោធិ៍សែនជ័យ នឹងមានវិធានការចុះរុះរើ ដោយមិនទទួលខុសត្រូវលើការបាត់បង់ ខូចខាតទ្រព្យសម្បត្តិ និងសម្ភារផ្សេងៗ ដែលមាននៅលើទីតាំងនោះឡើយ ។
សូមជម្រាបថា ភ្លៀងធ្លាក់ជាប់គ្នាជាច្រើនថ្ងៃ ដោយសារឥទ្ធិពលព្យុះ ចាប់តាំងពីថ្ងៃទី០១ ខែកញ្ញា ដល់ថ្ងៃទី១៧ ខែតុលា ឆ្នាំ២០២០ បានធ្វើតំបន់មួយចំនួន នៅក្នុងរាជធានីភ្នំពេញ ទទួលរងនូវការលិចលង់ ដោយឡែកប្រជាពលរដ្ឋដែលរស់នៅក្នុងបុរីពិភពថ្មី ត្រពាំងថ្លឹង ក្នុងខណ្ឌពោធិ៍សែនជ័យ ក៏ទទួលរងនូវការលិចលង់លំនៅឋានយ៉ាងធ្ងន់ ផងដែរ ។
បើតាមមន្ទីរសាធារណការរាជធានីភ្នំពេញ បានឲ្យដឹងថា ក្រោយការបូមទឹកចេញពីក្នុងបុរី ឃើញថា មកដល់ពេលនេះ ស្ថានភាពទឹកបានស្រកអស់ពីក្នុងបុរីហើយ ។ អ្វីដែលនៅសេសសល់ គឺក្រុមការងារកំពុងបន្តបូមស្តារលូ បាញ់ទឹកលាងសំអាត កើបសំអាតភក់ សំរាម និងបាញ់ថ្នាំសម្លាប់មេរោគជូនបងប្អូនប្រជាពលរដ្ឋក្នុងបុរី ខណៈពេលនេះមានប្រជាពលរដ្ឋប្រមាណ៩០% បានមកចូលរស់នៅតាមលំនៅដ្ឋានជាធម្មតាហើយ ។
ជាការកត់សម្គាល់ ភ្លៀងធ្លាក់ខ្លាំង នៅរាជធានីភ្នំពេញ មិនមែនកើតឡើងតែនៅឆ្នាំនេះទេ ក៏ប៉ុន្តែនៅបុរីពិភពថ្មី ត្រពាំងថ្លឹង ចាប់តាំងពីកកើតបុរី យូរឆ្នាំមកហើយ មិនដែលមានទឹកភ្លៀង នៅលិចត្រាំត្រែង ជាច្រើនថ្ងៃ ដូចពេលនេះឡើយ ។ បឹង ប្រឡាយខាងក្រៅជាប់បុរីពិភពថ្មី ត្រពាំងថ្លឹង ជាប់ផ្លូវវេងស្រេង គឺត្រូវបានគេចាក់លុប ដើម្បីរៀបចំសាងសង់បុរីផ្ទះល្វែង ។ ដូច្នេះហើយ ទើបលែងមានកន្លែងទឹកហូរចេញពីបុរី ដូចលើកមុនៗ ។ ហេតុផល ដែលទឹកលិចនៅតំបន់ផ្សេងទៀត នៅពេលនេះ ក៏មិនខុសពីករណីបុរីពិភពថ្មី ត្រពាំងថ្លឹង នោះឡើយ ។
ដូច្នេះ គួរតែអាជ្ញាធរមានសមត្ថកិច្ច មានវិធានការដោះស្រាយ ដើម្បីកុំឲ្យហេតុការណ៍ដដែលៗនេះ កើតមានបន្តទៀត ។ ក្នុងនោះ ស្រះ បឹង ប្រឡាយផ្លូវបង្ហូរទឹក លូ ដែលមានស្រាប់ ក៏គួររក្សាទុក ហើយកាយស្តារជីកពង្រីកបន្ថែម ដើម្បីបើកផ្លូវរំដោះទឹក ។ រីឯម្ចាស់បុរីផ្ទះល្វែង ក៏ត្រូវតែសិក្សាជាមួយមន្ត្រីជំនាញអាជ្ញាធរដែនដីឲ្យបានច្បាស់លាស់ មុននឹងចាក់ដីលុបតំបន់ទំនាប ស្រះ បឹង ប្រឡាយ ប្រព័ន្ធលូបង្ហូរទឹក និងកន្លែងស្តុកទឹកស្អុយ ក៏គួរតែរៀបចំឡើងវិញ ដើម្បីកុំឲ្យបុរីផ្ទះល្វែង ដែលមានប្លង់រឹង បែរក្លាយជាបុរីផ្ទះល្វែងប្លង់រាវ នៅពេលមានភ្លៀងធ្លាក់ខ្លាំងម្តងៗ ៕
ចែករំលែកព័តមាននេះ